દેશના સૌથી અમીર વ્યક્તિ મુકેશ અંબાણી હવે એશિયાના સૌથી અમીર વ્યક્તિ બની ગયા છે.ફોર્બ્સ તરફથી બહાર પાડવામાં આવેલી રિયલ ટાઇમ બિલિયનર્સની યાદીમાં 42.1 અબજ ડોલર સાથે ચીનના હુઈ કા યાનને પછાડીને મુકેશ અંબાણી એશિયામાં અમીરોની યાદીમાં સૌથી ટોચ પર પહોંચી ગયા છે. બુધવારે રિલાયન્સ ઇન્ડસ્ટ્રીઝના શેરમાં 1.22 ટકાનો ઉછાળો આવ્યો અને તે 952.30 રૂપિયાના લેવલે પહોંચ્યો હતો. જેથી મુકેશ અંબાણીની વ્યક્તિગત સંપત્તિમાં 466 મિલિયન ડોલરનો વધારો થયો છે. બીજી તરફ ચીનના એવરગ્રેન્ડ ગ્રુપના ચેરમેન હુઇ કા યાનની સંપત્તિ 1.28 બિલિયન ડોલર ઘટીને 40.6 અબજ ડોલર થઇ ગઇ છે. જો કે, દુનિયામાં અમીરોની યાદીમાં મુકેશ અંબાણી 14માં સ્થાને છે. આ યાદી કારોબારીઓની સ્ટોક હોલ્ડિંગ અને રિયલ ટાઇમ એસેટ્સના આધારે તૈયાર કરવામાં આવી છે.
