ગેરકાયદેસર ખનીજ ખનન કરી પર્યાવરણને નુકશાની પહોંચાડી
મોરબીના પાનેલી ગામે બારેક દિવસ પૂર્વે થયેલા રોડ અકસ્માત બાદ ગ્રામજનોએ ખનીજચોરી મામલે વ્યાપક રોષ પ્રગટ કર્યો હતો અને તંત્ર દ્વારા ખનીજ ચોરીની તપાસ કરવામાં આવતા ગામના ઉપસરપંચ વિરુદ્ધ ૭.૧૧ લાખથી વધુની ખનીજ ચોરી કરવા ઉપરાંત પર્યાવરણ નુકશાની વળતર મળીને ૧૦.૦૨ કરોડથી વધુની ખનીજચોરી અંગે પોલીસમાં ગુન્હો નોંધવામાં આવ્યો છે
મોરબીના ખાણ ખનીજ વિભાગના રોયલ્ટી ઇન્સ્પેકટર અંકુર ભાદરકા દ્વારા તાલુકા પોલીસ મથકમાં આઈપીસી કલમ ૩૭૯ તથા ગુજરાત મિનરલ્સ (પ્રિવેન્શન ઓફ ઈલીગલ માઈનીંગ ટ્રાન્સપોર્ટશન એન્ડ ટ્રોરેજ) તેમજ એમ એમ આર ડી એક્ટ ૧૯૫૭ ની કલમ ૪ (૧) ૪ (૪ એ) તથા ૨૧ (૧) ૬ મુજબ પાનેલી ગામના ઉપસરપંચ રમેશભાઈ શીવાભાઈ આંતરેસા વિરુદ્ધ પાનેલી ગામની સીમ જગ્યામાં આવતા વિસ્તારમાં હાર્ડ મોરમ (ખનીજ) નું ખોદકામ કરી બિન અધિકૃત રીતે ૩,૧૬,૦૮૬ મેં. ટન કીમત રૂ ૭,૧૧,૧૯,૩૫૦ સરકારની વસુલાત પાત્ર થતી રકમ તથા બિન અધિકૃત રીતે ખનન થયેલ રૂ ૨,૯૧,૫૮,૯૩૩ પર્યાવરણને નુકશાનીનું વળતર મળી કુલ રૂ ૧૦,૦૨,૭૮,૨૮૩ ની ખનીજ ખાતાની કોઈપણ મંજુરી વગર આરોપી તથા ખનન સાથે સંકળાયેલ આરોપીએ ગેરકાયદેસર ખનીજ ચોરી કરી ગુન્હો કર્યાની પોલીસ ફરિયાદ નોંધાવી છે
પાનેલી ગામે તા. ૨૪-૦૩ ના રોજ એક ટ્રક દ્વારા સતવારા વૃદ્ધનું અકસ્માતે મોત થયા બાદ પાનેલી ગ્રામજનોએ આ વિસ્તારમાં વ્યાપક ખનીજચોરીની ફરિયાદ કરી હતી જે ફરિયાદને પગલે પ્રાંત અધિકારી મોરબી દ્વારા તપાસનો આદેશ મળતા ગ્રામજનો, ગામના તલાટી મંત્રીને સાથે રાખીને તપાસ કરવામાં આવી હતી જેમાં ખોદકામ એક કે દોઢ વર્ષથી ચાલુ હોય અને રસ્તો અંદાજે ત્રણ દિવસથી ખોદી નાખ્યો હોવાનું જણાવ્યું હતું અને તપાસ ટીમે સ્થળ પરની તપાસ કરવા દરમિયાન હાર્ડ મોરમ ખનીજનું ખોદકામ ગામના ઉપસરપંચ રમેશભાઈ આતરેસા હોદાનો દુરુપયોગ કરી તેમજ ગ્રામજનોએ ધમકાવીને કરતો હોય અને ગામમાંથી ખેતર જવાનો રસ્તો તોડી નાખી નુકશાન કર્યાનું ગ્રામજનોએ તપાસ ટીમને જણાવ્યું હતું
મોરબી જીલ્લો ખનીજ સંપદાથી સંપન્ન હોય મોરબી પંથક ઉપરાંત વાંકાનેર અને હળવદમાં પણ ખનીજ ચોરીની વ્યાપક ફરિયાદો ઉઠતી રહે છે જોકે એકલ દોકલ કાર્યવાહી કરીને તંત્ર સંતોષ માની લેતું હોય છે પરંતુ ખનીજચોરી કરનાર મોટા માથા સુધી તેના હાથ પહોંચતા નથી પાનેલીના કિસ્સામાં પણ એવું જ બનવા પામ્યું છે જોકે અકસ્માત બાદ ગ્રામજનોએ મૃતદેહ સ્વીકારવા જ ઇનકાર કરી દીધા બાદ છેક તંત્ર તપાસ માટે માન્યું હતું અને કરોડોની ખનીજ ચોરીનો પર્દાફાશ થયો છે જોકે હવે તંત્ર કરોડોની રોયલ્ટી વસુલી સકે છે કે નહિ તે જોવું રહ્યું.
