ભારત સાથે સંબંધો મજબૂત કરવા પર અમેરિકાનો ભાર : ચીનના વલણની આકરી ટીકા પણ કરાઈ
ચીનના વિરોધમાં ભારત પડખે રહેવાનો અમેરિકન સંસદે ઠરાવ કર્યો છે. આ ઘટના દર્શાવે છે કે ભારત સાથે સંબંધો મજબૂત કરવા પર અમેરિકા ભાર દઇ રહ્યું છે. બીજી તરફ અમેરિકાએ ચીનના વલણની આકરી ટીકા પણ કરી છે.
અમેરિકાએ ચીન અને અરુણાચલ પ્રદેશને વિભાજિત કરતી રેખાને આંતરરાષ્ટ્રીય સરહદ ગણી છે. આ મુદ્દે અમેરિકી સંસદમાં દ્વિપક્ષીય ઠરાવ રજૂ કરવામાં આવ્યો છે, જેમાં અરુણાચલ પ્રદેશને ભારતનું અભિન્ન અંગ માનવામાં આવે છે. આ પ્રસ્તાવ રજૂ કરનાર સાંસદ બિલ હેગર્ટી અને જેફ માર્કલે જણાવ્યું હતું કે ’જ્યારે ચીન ખુલ્લા અને મુક્ત હિંદ પ્રશાંત મહાસાગર માટે પડકાર બની રહે છે. આવી સ્થિતિમાં અમેરિકા તેના વ્યૂહાત્મક ભાગીદારો સાથે ખાસ કરીને ભારત સાથે ખભે ખભા મિલાવીને ઊભું રહે તે જરૂરી છે.
અમેરિકી સંસદના આ દ્વિપક્ષીય ઠરાવમાં અરુણાચલ પ્રદેશને ભારતનો અભિન્ન ભાગ માનવામાં આવ્યો છે અને એલએસી પર યથાસ્થિતિ બદલવાના ચીનની સૈન્ય કાર્યવાહી અને પ્રયાસોની ટીકા કરવામાં આવી છે. પ્રસ્તાવમાં અમેરિકા-ભારત વચ્ચે વ્યૂહાત્મક ભાગીદારીને મજબૂત કરવા અને ક્વાડમાં સહકાર વધારવાની વાત પણ કરવામાં આવી હતી. ઉલ્લેખનીય છે કે અમેરિકી સંસદનો આ પ્રસ્તાવ એવા સમયે આવ્યો છે જ્યારે એલએસીના પૂર્વ સેક્ટરમાં ચીનના સૈનિકો અને ભારતના સૈનિકો વચ્ચે હિંસક અથડામણ થઈ રહી છે.
ઠરાવમાં કહેવામાં આવ્યું છે કે અમેરિકા અરુણાચલ પ્રદેશને ચીનનું નહીં પણ ભારતનું અભિન્ન અંગ માને છે. યુ.એસ.ના ધારાશાસ્ત્રીઓએ એલએસી પર સૈન્ય બળ સાથે યથાસ્થિતિ બદલવાના ચીનના પ્રયાસો, વિવાદિત સ્થળો પર ચીન દ્વારા ગામડાઓની સ્થાપના અને ચીનના નકશામાં ભારત દ્વારા અરુણાચલ પ્રદેશને તેના પોતાના તરીકે દર્શાવવાના પ્રયાસોની પણ ટીકા કરી હતી. આ સાથે ભૂટાનની સરહદમાં ચીનના દાવાની પણ ટીકા કરવામાં આવી છે. યુએસ હાઉસના બંને પક્ષો દ્વારા સંયુક્ત રીતે રજૂ કરવામાં આવેલા આ ઠરાવમાં ચીનની ઉશ્કેરણીજનક કાર્યવાહી સામે ભારતના વલણની પણ પ્રશંસા કરવામાં આવી છે અને ભારત સાથે ટેકનિકલ, આર્થિક સંબંધોને મજબૂત કરવા પર પણ ભાર મૂકવામાં આવ્યો છે.
