- વર્ષ 2019માં આચારસંહિતા ભંગ બદલ ભાવનગરમાં નોંધાઈ’તી ફરિયાદ
ગુજરાત હાઈકોર્ટે એક મહત્વપૂર્ણ ચુકાદો આપ્યો છે કે, ‘મોદી હૈ તો મુમકીન હૈ’ નો નારા લગાવવો ચૂંટણી પ્રચાર નથી અને તેથી તે ચૂંટણીની આદર્શ આચારસંહિતાનું ઉલ્લંઘન ગણી શકાય નહિ. હાઇકોર્ટે આવું અવલોકન કરીને ભાજપ નેતા વિભાવરીબેન દવેને ક્લીનચીટ આપી દીધી છે.
વર્ષ 2019માં મતદાન મથક પર આવું કરવા બદલ ભાજપના ભૂતપૂર્વ શિક્ષણ રાજ્ય પ્રધાન વિભાવરી દવે સામે નોંધાયેલી એફઆઈઆરને રદ કરતી વખતે હાઇકોર્ટે જણાવ્યું હતું કે, વિજય પ્રતીક દર્શાવવા સાથે ‘મોદી હૈ તો મુમકીન હૈ’ ના નારા લગાવવા એ ચૂંટણી પ્રચાર નથી.
દવે સામે એપ્રિલ 2019માં ભાવનગરના નિલમબાગ પોલીસ સ્ટેશનમાં લોક પ્રતિનિધિત્વ અધિનિયમ, 1951ની કલમ 13(1)(એ) હેઠળ ગુનો નોંધવામાં આવ્યો હતો.
સોશિયલ મીડિયા પ્લેટફોર્મ પર વાયરલ થયેલા એક
વીડિયોના આધારે ફરિયાદ નોંધવામાં આવી હતી, જેમાં દવેને ‘મોદી હૈ તો મુમકીન હૈ’ના નારા લગાવતા અને વિજયની નિશાની દર્શાવતા બતાવવામાં આવ્યા હતા. જેને ચૂંટણી આચાર સંહિતાનું ઉલ્લંઘન માનવામાં આવતું હતું કારણ કે મતદાન મથકના 100 મીટરની અંદર પ્રચાર કરવાની મંજૂરી નથી.
દવેએ એફઆઈઆર રદ કરવા માટે હાઈકોર્ટનો સંપર્ક કર્યો અને કહ્યું કે સૂત્રોચ્ચાર કરવાથી પ્રચાર નથી થતો. તેણીએ તે બેઠક પરથી ચૂંટણી લડતા કોઈપણ ઉમેદવાર માટે પ્રચાર કર્યો ન હતો જ્યાં તેણી પોતાનો મત આપી રહી હતી. કોઈપણ ઉમેદવાર માટે કોઈ પ્રચાર કરવામાં આવ્યો ન હોવાથી, તેમનો ઈશારો ચૂંટણી આચાર સંહિતાનો ભંગ ન હતો.
જસ્ટિસ સીએમ રોયે તેમની અરજીઓ સ્વીકારી અને અવલોકન સાથે ચૂંટણી આચાર સંહિતાના ઉલ્લંઘન માટે એફઆઈઆર રદ કરી હતી. હાઇકોર્ટે નોંધ્યું હતું કે, અરજીકર્તા હાથની બે આંગળીઓ વડે વિજયનું ચિહ્ન દર્શાવે છે અથવા ફક્ત ‘જો મોદી છે તો બધું શક્ય છે’ તેવું બોલે છે જેનો મતલબ મત માટે પ્રચાર કરવાનો નથી.
કોર્ટે વધુમાં કહ્યું કે, મતદાન મથક પર હાજર કોઈપણ મતદારે ફરિયાદ કરી નથી કે અરજદારે મતદાન મથક પર વિજય પ્રતીક બતાવીને અથવા તે શબ્દો ઉચ્ચારીને મત માંગ્યો હતો.
વધુમાં કોર્ટના દૃષ્ટિકોણમાં, ફક્ત આ હાવભાવ દ્વારા પોતાની જાતને વ્યક્ત કરવી અને ઉક્ત શબ્દો ઉચ્ચારવાથી મત માટે પ્રચાર કરવા સમાન નથી. લોકોના પ્રતિનિધિત્વ અધિનિયમ, 1952માં “પ્રચાર” શબ્દની વ્યાખ્યા કરવામાં આવી નથી. તેથી આપણે આ શબ્દના સામાન્ય અને શાબ્દિક અર્થને ધ્યાનમાં લેવો જોઈએ.
