વડા પ્રધાન નરેન્દ્ર મોદીએ નવી દિલ્હીના પ્રગતિ મેદાનમાં ભારત મંડપમ ખાતે મુખ્ય ખાદ્ય કાર્યક્રમ ‘વર્લ્ડ ફૂડ ઈન્ડિયા-2023’ ની બીજી આવૃત્તિનું ઉદ્ઘાટન કર્યું હતું. જેમાં પીએમ મોદીએ સ્વસહાય જૂથોને મજબૂત કરવાના ઉદ્દેશ્ય સાથે એક લાખથી વધુ જૂથના સભ્યોને રૂ.380 કરોડની બીજ મૂડી સહાય પૂરી પાડી હતી. પીએમ મોદી દ્વારા આપવામાં આવેલી આ સહાયથી એસએચજીને બહેતર પેકેજિંગ અને ગુણવત્તાયુક્ત ઉત્પાદનો દ્વારા બજારમાં વધુ સારી કિંમતો મેળવવામાં મદદ મળશે. તેમ જણાવાયું હતું.
નવી દિલ્હીના પ્રગતિ મેદાનમાં મુખ્ય ખાદ્ય કાર્યક્રમ ‘વર્લ્ડ ફૂડ ઈન્ડિયા-2023’ ની બીજી આવૃત્તિનું વડાપ્રધાનના હસ્તે ઉદ્ઘાટન
વડાપ્રધાન મોદીએ કહ્યું કે ટેસ્ટ અને ટેક્નોલોજીનું આ મિશ્રણ નવા ભવિષ્યને જન્મ આપશે અને નવી અર્થવ્યવસ્થાને ગતિ આપશે. આજના બદલાતા વિશ્વમાં, ખાદ્ય સુરક્ષા એ 21મી સદીના સૌથી મહત્વપૂર્ણ પડકારો પૈકી એક છે. તેથી વર્લ્ડ ફૂડ ઈન્ડિયાની આ ઈવેન્ટ વધુ મહત્વની બની ગઈ છે. જેમાં પ્રાદેશિક ભોજન અને રોયલ ફૂડનો વારસો બતાવવામાં આવ્યો છે. 200 થી વધુ શેફ તેમાં ભાગ લઈ રહ્યા છે અને પરંપરાગત ભારતીય વાનગીઓ રજૂ કરી રહ્યા છે.
‘વર્લ્ડ ફૂડ ઈન્ડિયા 2023’ કાર્યક્રમનો ઉદ્દેશ્ય ભારતને ‘વિશ્વની ફૂડ બાસ્કેટ’ તરીકે રજૂ કરવાનો છે અને 2023ને ‘આંતરરાષ્ટ્રીય બાજરી વર્ષ’ તરીકે ઉજવવાનો છે. આ ઇવેન્ટ સરકારી સંસ્થાઓ, ઉદ્યોગ વ્યાવસાયિકો, ખેડૂતો, ઉદ્યોગસાહસિકો અને અન્ય હિસ્સેદારોને ચર્ચામાં જોડાવા, ભાગીદારી સ્થાપિત કરવા અને કૃષિ-ખાદ્ય ક્ષેત્રમાં રોકાણની તકો શોધવા માટે નેટવર્કિંગ અને બિઝનેસ પ્લેટફોર્મ પૂરું પાડશે. આ ઇવેન્ટમાં સીઇઓની રાઉન્ડ ટેબલ મીટિંગ્સ રાખવામાં આવી છે. જેમાં રોકાણ પર ધ્યાન કેન્દ્રિત કરવામાં આવશે અને ફૂડ સેક્ટરમાં બિઝનેસ શરૂ કરવામાં સરળતા રહેશે.
ભારતીય ફૂડ પ્રોસેસિંગ ઉદ્યોગમાં નવીનતા અને તેની સંભવિતતા દર્શાવવા માટે વિવિધ પેવેલિયન સ્થાપિત કરવામાં આવશે. આ કાર્યક્રમ ફૂડ પ્રોસેસિંગ ઉદ્યોગના વિવિધ પાસાઓ પર ધ્યાન કેન્દ્રિત કરીને નાણાકીય સશક્તિકરણ, ગુણવત્તાની ખાતરી અને મશીનરી અને ટેકનોલોજીમાં નવીનતાઓ પર ભાર મૂકતા 48 સત્રોનું આયોજન કરશે. આ ઇવેન્ટ 80 થી વધુ દેશોના સહભાગીઓને હોસ્ટ કરવા માટે તૈયાર છે, જેમાં મોટી ફૂડ પ્રોસેસિંગ કંપનીઓના સીઇઓ પણ સામેલ છે. તેમાં 80 થી વધુ દેશોમાંથી 1200 થી વધુ વિદેશી ખરીદદારો આવશે. આ સાથે રિવર્સ બાયર-સેલર મીટની પણ સુવિધા હશે. નેધરલેન્ડ આ ઇવેન્ટમાં ભાગીદાર દેશ તરીકે સેવા આપશે, જ્યારે જાપાન આ ઇવેન્ટનો ફોકસ કન્ટ્રી હશે.
