રાષ્ટ્રપતિ પદની ચૂંટણીની મતગણતરી શરૂ: વિપક્ષના યશવંત સિન્હા સામે એનડીએના દ્રૌપદી મુર્મુની જીત નિશ્ર્ચિત
ખરેખર દેશના રાષ્ટ્રપતિ અમારા કે તમારા નહિ આપણા હોવા જોઈએ. પણ એવું શક્ય ન બનતા રાષ્ટ્રપતિ પદ માટે મહાભારત છેડાયું હતું અને મતદાન થયું હતું. હવે મહાભારત 15માં રાષ્ટ્રપતિ તરીકે દ્રૌપદીને પ્રસ્થાપિત કરવાનું છે.
રાષ્ટ્રપતિની ચૂંટણી માટે પડેલા મતોની ગણતરી આજે સવારે 11 વાગ્યાથી શરૂ થઇ હતી. વિપક્ષના યશવંત સિંહા સામે એનડીએના ઉમેદવાર દ્રૌપદી મુર્મુની જીત લગભગ નિશ્ચિત છે. સાંજ સુધીમાં પરિણામ આવે તેવી શક્યતા છે. મતગણતરી એ જ રૂમ નંબર 63માં થશે જ્યાં સાંસદો માટે મતદાન કરવાની વ્યવસ્થા કરવામાં આવી હતી. આ રૂમને સ્ટ્રોંગ રૂમમાં ફેરવીને મતપેટીઓ રાખવામાં આવી છે. અહીં ચુસ્ત સુરક્ષા વ્યવસ્થા છે.
દેશના વર્તમાન રાષ્ટ્રપતિ રામનાથ કોવિંદનો કાર્યકાળ 24 જુલાઈએ પૂરો થશે અને નવા રાષ્ટ્રપતિ 25 જુલાઈએ શપથ લેશે. તમામ રાજ્યોમાંથી બેલેટ પેપર સંસદ ભવનમાં લાવવામાં આવ્યા છે. ચૂંટણી અધિકારીઓ સંસદના રૂમ નંબર 63માં મત ગણતરી માટે તૈયાર છે. આ હોલમાં બેલેટ પેપરની ચોવીસ કલાક સુરક્ષા કરવામાં આવી રહી છે.
ચૂંટણી માટેના મુખ્ય ચૂંટણી અધિકારી, રાજ્યસભાના મહાસચિવ પીસી મોદીએ મત ગણતરીની દેખરેખ રાખી હતી. સાંજ સુધીમાં ચૂંટણીના પરિણામો જાહેર થવાની શક્યતા છે. મોદી સૌપ્રથમ સાંસદોના તમામ મતોની ગણતરી કર્યા બાદ ચૂંટણીના વલણો વિશે માહિતી આપશે અને પછી 10 રાજ્યોના મતોને મૂળાક્ષરોના ક્રમમાં ગણ્યા બાદ ફરીથી માહિતી શેર કરશે.
ઉલ્લેખનીય છે કે, રાષ્ટ્રપતિની ચૂંટણી માટે સોમવારે સવારે 10 વાગ્યાથી સાંજે 5 વાગ્યાની વચ્ચે સંસદ ભવન અને વિધાનસભાની અંદર 30 કેન્દ્રો સહિત 31 સ્થળોએ મતદાન થયું હતું. ઘણા રાજ્યોમાં મુર્મુની તરફેણમાં ’ક્રોસ વોટિંગ’ના અહેવાલો પણ આવ્યા હતા. પ્રમુખપદની ચૂંટણીમાં સભ્યોને વ્હીપ જારી કરવામાં આવતા નથી.સંસદના બંને ગૃહો, લોકસભા અને રાજ્યસભાના સભ્યો અને નામાંકિત સાંસદો સિવાય તમામ રાજ્યોની વિધાનસભાના સભ્યો રાષ્ટ્રપતિની ચૂંટણીમાં મતદાન કરે છે.
રાષ્ટ્રપતિની ચૂંટણીમાં 776 સાંસદો અને 4,033 ચૂંટાયેલા ધારાસભ્યો સહિત કુલ 4,809 મતદારો મતદાન કરવા પાત્ર હતા. નામાંકિત સાંસદો અને ધારાસભ્યો અને વિધાન પરિષદના સભ્યો આમાં મતદાન કરી શકશે નહીં. ચૂંટણી પંચના જણાવ્યા અનુસાર સોમવારે યોજાયેલા મતદાન દરમિયાન 99 ટકાથી વધુ મતદારોએ પોતાનો મત આપ્યો હતો.
ભારતીય જનતા પાર્ટીના સાંસદો સની દેઓલ અને સંજય ધોત્રે સહિત આઠ સાંસદો મતદાન કરી શક્યા ન હતા. દેઓલ મતદાન દરમિયાન સારવાર માટે વિદેશ ગયા છે જ્યારે ધોત્રે આઈસીયુમાં દાખલ છે. સોમવારે ભાજપ અને શિવસેના, બહુજન સમાજ પાર્ટી, કોંગ્રેસ, સમાજવાદી પાર્ટી અને એઆઈએમઆઈએમના બે-બે ધારાસભ્યોએ મતદાન કર્યું ન હતું.
રામનાથ કોવિંદજીએ વર્ષ 2017માં કુલ 10,69,358માંથી 7,02,044 મત મેળવીને રાષ્ટ્રપતિની ચૂંટણી જીતી હતી. તેમના હરીફ મીરા કુમારને માત્ર 3,67,314 વોટ મળ્યા હતા.
દ્રૌપદી મુર્મુને મુખ્ય ન્યાયાધીશ શપથ લેવડાવશે
ભારતના રાષ્ટ્રપતિને દેશના મુખ્ય ન્યાયાધીશ દ્વારા શપથ લેવડાવવામાં આવે છે. મુખ્ય ન્યાયાધીશની ગેરહાજરીમાં, સુપ્રીમ કોર્ટના સૌથી વરિષ્ઠ ન્યાયાધીશ શપથ લેવડાવી શકે છે. બંધારણના અનુચ્છેદ 60માં રાષ્ટ્રપતિને શપથ લેવડાવવાનો સ્પષ્ટ ઉલ્લેખ છે. રાષ્ટ્રપતિનો કાર્યકાળ 5 વર્ષનો હોય છે. તેમની નિમણૂક ઇલેક્ટોરલ કોલેજ દ્વારા કરવામાં આવે છે.
રાષ્ટ્રપતિના શપથ 25 જુલાઈએ જ લેવાની પરંપરા
રાષ્ટ્રપતિ ક્યારે શપથ લેશે તે અંગે બંધારણમાં કોઈ ઉલ્લેખ નથી. હકીકતમાં, 1977માં નીલમ સંજીવા રેડ્ડી બિનહરીફ રાષ્ટ્રપતિ તરીકે ચૂંટાયા હતા. તેમણે 25 જુલાઈ 1977ના રોજ રાષ્ટ્રપતિ તરીકે શપથ લીધા હતા. ત્યારથી તે એક પરંપરા બની ગઈ છે. ત્યારથી તમામ રાષ્ટ્રપતિ 25 જુલાઈએ શપથ લેશે.
