ઇમારતોને નુકસાન, લોકો ભયભીત: અંદાજે 300 લોકો ઇજાગ્રસ્ત, મૃતકોની સંખ્યા વધવાની ભીતિ : સુનામીનો કોઈ ખતરો ન હોવાની તંત્રની સ્પષ્ટતા
ઈન્ડોનેશિયાના જકાર્તામાં 5.6ની તીવ્રતાનો ભૂકંપ આવ્યો છે. જેમાં 44થી વધુ લોકોએ જીવ ગુમાવ્યા છે. તે જ સમયે, 300 થી વધુ લોકો ઘાયલ હોવાનું કહેવાય છે. સિયાંજુરના પ્રશાસનના વડા હરમન સુહરમેને જણાવ્યું કે મને મળેલી માહિતી અનુસાર માત્ર એક હોસ્પિટલમાં લગભગ 44 લોકોના મોત થયા છે અને ઓછામાં ઓછા 300 લોકોની સારવાર ચાલી રહી છે. ઈમારતોમાં ફસાઈ જવાને કારણે મોટાભાગનાને ફ્રેક્ચર થયું છે. મૃતકોની સંખ્યા પણ વધી શકે છે.હવામાનશાસ્ત્ર અને જિયોફિઝિક્સ એજન્સીએ જણાવ્યું કે સોમવારે ઈન્ડોનેશિયાની રાજધાની જકાર્તામાં 5.6ની તીવ્રતાનો ભૂકંપ આવ્યો હતો. ભૂકંપનું કેન્દ્ર પશ્ચિમ જાવાના સિયાનજુરમાં 10 કિમીની ઊંડાઈએ હતું. જો કે તેના કારણે સુનામીની કોઈ શક્યતા વ્યક્ત કરવામાં આવી નથી.
મળતી માહિતી મુજબ, જકાર્તામાં ભૂકંપ બાદ લોકો ભયભીત થઈ ગયા હતા. તેમની ઓફિસમાં કામ કરતા લોકો પણ બહાર આવી ગયા હતા. ભૂકંપના આંચકાને કારણે ઈમારત ધ્રૂજતી દેખાઈ હતી. આથી અરાજકતા સર્જાઈ હતી.સ્થાનિક અધિકારીઓએ જણાવ્યું હતું કે સિયાંજુર જિલ્લામાં મકાનો સહિત ડઝનેક ઈમારતોને નુકસાન થયું છે.દક્ષિણ જકાર્તામાં એક કર્મચારી વિડી પ્રિમધાનિયાએ જણાવ્યું હતું કે, ભૂકંપ ખૂબ જ જોરદાર અનુભવાયો હતો. મારા સહકર્મીઓ અને મેં નવમા માળે આવેલી અમારી ઓફિસમાંથી ઈમરજન્સી સીડીઓ સાથે બહાર નીકળવાનું નક્કી કર્યું.”
વિશાળ દ્વીપસમૂહ રાષ્ટ્રમાં વારંવાર ધરતીકંપો આવે છે, પરંતુ જકાર્તામાં તેનો અનુભવ કરવો અસામાન્ય છે. આ પહેલા પશ્ચિમ ઈન્ડોનેશિયામાં શુક્રવારે રાત્રે જોરદાર ભૂકંપ આવ્યો હતો. રાહતની વાત એ છે કે આ દરમિયાન કોઈ જાન-માલના નુકસાનના સમાચાર નથી. યુએસ જીઓલોજિકલ સર્વે (યુએસજીએસ) એ જણાવ્યું હતું કે ભૂકંપની તીવ્રતા 6.9 હતી. તેનું કેન્દ્રબિંદુ દક્ષિણ બેંગકુલુથી 202 કિમી દક્ષિણપશ્ચિમમાં 25 કિમીની ઊંડાઈએ હતું. આ પછી બીજો આફ્ટરશોક આવ્યો, જેની તીવ્રતા 5.4 હતી.ઇન્ડોનેશિયા, 270 મિલિયનથી વધુ લોકોનો વિશાળ દ્વીપસમૂહ, વારંવાર ભૂકંપ, જ્વાળામુખી ફાટવા અને સુનામીથી પ્રભાવિત થાય છે.
આ વર્ષે ફેબ્રુઆરીમાં, પશ્ચિમ સુમાત્રા પ્રાંતમાં 6.2ની તીવ્રતાના ભૂકંપમાં ઓછામાં ઓછા 25 લોકો માર્યા ગયા હતા અને 460 થી વધુ લોકો ઘાયલ થયા હતા. જાન્યુઆરી 2021 માં, પશ્ચિમ સુલાવેસી પ્રાંતમાં 6.2 ની તીવ્રતાનો ભૂકંપ આવ્યો, જેમાં 100 થી વધુ લોકો માર્યા ગયા અને લગભગ 6,500 ઘાયલ થયા. 2004 માં, હિંદ મહાસાગરમાં એક શક્તિશાળી ભૂકંપ અને સુનામીના કારણે ડઝન દેશોમાં લગભગ 230,000 લોકો માર્યા ગયા, જેમાંથી મોટાભાગના ઇન્ડોનેશિયામાં હતા.
