વર્તમાન ચીફ જસ્ટિસ યુયુ લલિતે પોતાના અનુગામીની કેન્દ્ર સરકારને કરી ભલામણ : 9 નવેમ્બરે જસ્ટિસ ડીવાય ચંદ્રચુડ બે વર્ષ માટે ચીફ જસ્ટિસની જવાબદારી સંભાળશે
જસ્ટિસ ડીવાય ચંદ્રચુડ દેશના આગામી મુખ્ય ન્યાયાધીશ હશે. વર્તમાન ચીફ જસ્ટિસ યુયુ લલિતે પોતાના અનુગામી એટલે કે દેશના આગામી સીજેઆઈ તરીકે જસ્ટિસ ડીવાય ચંદ્રચુડના નામની કેન્દ્ર સરકારને ભલામણ કરી છે. કેન્દ્રને પત્ર મોકલતા પહેલા ચીફ જસ્ટિસ યુયુ લલિતે આજે સુપ્રીમ કોર્ટના તમામ જજોની બેઠક બોલાવી હતી. રિવાજ મુજબ, દેશના વર્તમાન સીજેઆઈ સરકારને તેમના અનુગામીની ભલામણ કરતો ઔપચારિક પત્ર મોકલે છે.
હકીકતમાં, કેન્દ્ર સરકારે સીજેઆઈ યુયુ લલિતને આગામી સીજેઆઈના નામની ભલામણ કરવા કહ્યું હતું. યુયુ લલિતનો કાર્યકાળ 8 નવેમ્બર સુધીનો છે. સીજેઆઈ સરકારને બીજા સૌથી વરિષ્ઠ ન્યાયાધીશના નામની ભલામણ કરે છે. હાલમાં જસ્ટિસ ડીવાય ચંદ્રચુડ જસ્ટિસ યુયુ લલિત પછી બીજા સૌથી વરિષ્ઠ જજ છે. આ એક પ્રકારની પરંપરા છે, જે મુજબ મુખ્ય ન્યાયાધીશ, કેન્દ્ર તરફથી ઔપચારિક વિનંતી પ્રાપ્ત કરીને, તેમની નિવૃત્તિના લગભગ એક મહિના પહેલા સીલબંધ કવરમાં તેમના અનુગામીના નામની ભલામણ કરે છે. જો કે, મુખ્ય ન્યાયાધીશ તેમના પછીના સૌથી વરિષ્ઠ ન્યાયાધીશના નામની ભલામણ કરે છે, ત્યારબાદ સરકાર તેમની નિમણૂક કરે છે.
ચીફ જસ્ટિસ યુયુ લલિતનો 74 દિવસનો કાર્યકાળ પૂરો થવા જઈ રહ્યો છે. તેઓ 8 નવેમ્બરે નિવૃત્ત થઈ રહ્યા છે. 9 નવેમ્બરે જસ્ટિસ ડીવાય ચંદ્રચુડ બે વર્ષ માટે દેશના આગામી ચીફ જસ્ટિસ હશે. હાલના નિયમ મુજબ, જસ્ટિસ ચંદ્રચુડ 11 નવેમ્બરે તેમના 65માં જન્મદિવસના એક દિવસ પહેલા 10 નવેમ્બર, 2024ના રોજ નિવૃત્ત થશે.
સુપ્રીમ કોર્ટમાં શપથ ગ્રહણ દરમિયાન એ સ્પષ્ટ થઈ જાય છે કે મુખ્ય ન્યાયાધીશ કોણ બનશે અને તેમનો કાર્યકાળ કેવો રહેશે. વર્તમાન રેકોર્ડ અનુસાર, દેશને 2027માં પ્રથમ મહિલા મુખ્ય ન્યાયાધીશ મળશે. જસ્ટિસ બીવી નાગરથ્ના માત્ર 27 દિવસ માટે દેશની સુપ્રીમ કોર્ટનું નેતૃત્વ કરશે. તેમના પિતા જસ્ટિસ ઇએસ વેંકટરામૈયા પણ સુપ્રીમ કોર્ટના ચીફ જસ્ટિસ રહી ચૂક્યા છે.
ઇતિહાસમાં પ્રથમ વખત એવું બનશે કે પિતા બાદ તેમના પુત્ર પણ સીજેઆઈની જવાબદારી સંભાળશે
ઇતિહાસમાં એવું પ્રથમવાર બનશે કે પિતા બાદ તેમના દીકરા પણ ચીફ જસ્ટિસનો હોદ્દો સંભાળશે. વર્તમાન ચીફ જસ્ટિસે આગામી સીજેઆઈ માટે જે નામની ભલામણ કરી છે તે જસ્ટિસ ડીવાય ચંદ્રચુડના પિતા યશવંત વિષ્ણુ ચંદ્રચુડ દેશના 16મા ચીફ જસ્ટિસ હતા. તેમનો કાર્યકાળ 22 ફેબ્રુઆરી, 1978 થી 11 જુલાઈ, 1985 સુધી લગભગ 7 વર્ષ ચાલ્યો, જે અત્યાર સુધીનો સૌથી લાંબો કાર્યકાળ છે. હવે પિતાની નિવૃત્તિના 37 વર્ષ બાદ જસ્ટિસ ડીવાય ચંદ્રચુડને પણ આ જ જવાબદારી મળવા જઈ રહી છે.
ડીવાય ચંદ્રગુડ સબરીમાલા, સમલૈંગિકતા, આધાર અને અયોધ્યા સંબંધિત કેસોમાં જજ રહી ચૂક્યા છેે
11 નવેમ્બર, 1959ના રોજ જન્મેલા જસ્ટિસ ધનંજય યશવંત ચંદ્રચુડ સુપ્રીમ કોર્ટના વર્તમાન સીટિંગ જજ છે. તેણે દિલ્હી યુનિવર્સિટીમાંથી એલએલબી કર્યું છે. તેમણે ઓસ્ટ્રેલિયન નેશનલ યુનિવર્સિટી, હાર્વર્ડ લો સ્કૂલ અને ઘણી વિદેશી કાયદાની શાળાઓમાં વ્યાખ્યાન આપ્યું છે. 1998માં બોમ્બે હાઈકોર્ટ દ્વારા તેમને વરિષ્ઠ વકીલ તરીકે નામાંકિત કરવામાં આવ્યા હતા. હાલ તેઓ સુપ્રીમ કોર્ટના સીટીંગ જજ છે. જસ્ટિસ ડીવાય ચંદ્રચુડે 13 મે 2016ના રોજ સુપ્રીમ કોર્ટના જજ તરીકેનો કાર્યભાર સંભાળ્યો હતો. સુપ્રીમ કોર્ટમાં જોડાયા પહેલા તેઓ અલ્હાબાદ હાઈકોર્ટના મુખ્ય ન્યાયાધીશ હતા. આ પહેલા તેઓ બોમ્બે હાઈકોર્ટમાં પણ કામ કરી ચૂક્યા છે. તેમણે ઘણા મોટા કેસોમાં ચુકાદા પણ આપ્યા છે. તેઓ સબરીમાલા, સમલૈંગિકતા, આધાર અને અયોધ્યા સંબંધિત કેસોમાં જજ રહી ચૂક્યા છે.
