રોડ ક્રોસ કરતી વેળાએ સર્જાઈ કરુણાંતિકા: પોલીસ કાફલો દોડી ગયો
જેતલસર પાસે જૂનાગઢ રોડ પર સુરત પાસિંગની કારે બાઇકને અડફેટે લેતાં સર્જાયેલા અકસ્માતમાં વૃદ્ધ દંપતીના મોત નિપજયા હોવાનુ જાણવા મળ્યું છે. ઘટનાની જાણ થતા પોલીસ કાફલો ઘટનાસ્થળે દોડી ગયો હતો અને મૃતદેહ પીએમ અર્થે ખસેડી આગળની કાર્યવાહી હાથધરી છે.
આ અંગેની પોલીસમાંથી પ્રાપ્ત વિગત મુજબ જેતલસર પાસે જૂનાગઢ રોડ પર આવેલી સોરઠ હોટલ પાસે વહેલી સવારે માર્ગ અકસ્માતમાં વૃદ્ધ દંપતિનું મોત નિપજ્યું હતું. જે ઘટના અંગે જાણ થતાં જેતપુર તાલુકા પોલીસ મથકનો સ્ટાફ ઘટના સ્થળે દોડી ગયો હતો અને મૃતકોની ઓળખ મેળવવા તજવીજ હાથધરી છે.
પોલીસની પ્રાથમિક તપાસમાં જાણવા મળ્યા મુજબ આજરોજ સવારે બાઈક પર પસાર થતા વૃદ્ધ દંપતિને જૂનાગઢ રોડ પર સોરઠ હોટલ પાસે જીજે-૦૫-આરએલ-૩૮૦૭ નંબરની લાલ કલરની ટાટા હેરિયરના કાર ચાલકે બાઈકને ઠોકરે લેતાં ગમખ્વાર અકસ્માત સર્જાયો હતો. જેમાં બાઈક સવાર વૃદ્ધ દંપતિનું ઘટના સ્થળ પર જ પ્રાણ પંખેરું ઉડી ગયું હતું. પોલીસે ઘટનાની નોંધ કરી બંને મૃતદેહને પોસ્ટમોર્ટમ અર્થે ખસેડી મૃતકોના પરિવારજનોની શોધખોળ હાથધરી છે. કાર ચાલક સુરતના હોવાનુ અને સોમનાથ દર્શન માટે નીકળ્યા હોવાનુ સામે આવ્યું છે. જેમાં સુરતનો પરિવાર વહેલી સવારે વિરપુર જલારામ મંદિર દર્શન કરી કારમાં નીકળ્યા હતા અને સોરઠ હોટલ પાસે બાઈક આડે ઉતરતા અકસ્માત સર્જાયો હતો જેમાં વૃદ્ધ દંપતિનું મોત નિપજ્યું હતું.
