ઇઝરાયલ યુદ્ધ હવે ભયાનક બનવાના એંધાણ વર્તાઈ રહ્યા છે. ઇઝરાયેલ ગાઝા પટ્ટી ખાલી કરી ત્યાં તબાહી મચાવવા કમર કસી રહ્યું છે. બીજી તરફ મોટી સંખ્યામાં એવા લોકો પણ છે જે પોતાની માતૃભૂમિ છોડવા તૈયાર નથી. તેવામાં અનેક ઈસ્લામિક અને ખાડી દેશોએ પણ ઇઝરાયલના આ પગલાંનો વિરોધ નોંધાવ્યો છે. આમ ઇઝરાયેલ પોતાના આ નિર્ણય ઉપર મક્કમ રહેશે તો હવે અમંગળ થવાના એંધાણ વર્તાઈ રહ્યા છે.
સાઉદી અરેબિયાએ પોતાના નવા મિત્ર ઈઝરાયેલને રોકવા માટે તેના જૂના દુશ્મન ઈરાન સાથે હાથ મિલાવ્યા છે. બંને દેશોની સાથે અન્ય ખાડી દેશો પણ છે જે ગાઝા પર ઈઝરાયેલ દ્વારા કરવામાં આવી રહેલા હુમલાની ટીકા કરી રહ્યા છે. સ્થિતિ એવી છે કે ઇઝરાયેલ મધ્ય પૂર્વમાં અલગ પડી ગયું હોય તેવું લાગે છે. તમામ ઈસ્લામિક દેશો ઈઝરાયેલને ગાઝા પરના હુમલાઓને તાત્કાલિક રોકવા માટે એકતામાં ચેતવણી આપી રહ્યા છે. બે દુશ્મનો વચ્ચેની આ નવી મિત્રતાથી અમેરિકા પણ પરેશાન છે, તેને ડર છે કે જો સાઉદી, ઈરાન અને અન્ય દેશો પેલેસ્ટાઈનને મદદ કરશે તો તે યુદ્ધ અને વિનાશ તરફ દોરી શકે છે.ઈઝરાયેલ-હમાસ યુદ્ધે મધ્ય પૂર્વમાં રાજદ્વારી સમીકરણો તેજ કરી દીધા છે.અહીં ઈસ્લામિક દેશો ઈઝરાયેલ વિરુદ્ધ એક થઈ રહ્યા છે. ગાઝા પર ચાલી રહેલા ઈઝરાયેલ સેનાના હુમલાને રોકવા માટે એક ફૂલપ્રૂફ પ્લાન તૈયાર કરવામાં આવી રહ્યો છે, જેમાં સાઉદી અરેબિયા સૌથી મોટી ભૂમિકા ભજવી રહ્યું છે, જે અન્ય આરબ દેશો સાથે સતત સંપર્કમાં છે, સાઉદી અરેબિયાના ક્રાઉન પ્રિન્સ પોતે જ દેશના વડાઓને મળ્યા છે.
ગાઝા પટ્ટી ખાલી કરવાના પગલાં સામે અનેક ઇસ્લામિક અને ખાડી દેશોએ નોંધાવ્યો વિરોધ
મોટી સંખ્યામાં પેલેસ્ટાઇનીઓનો પણ માતૃભૂમિ છોડવા નનૈયો
અન્ય ખાડી દેશો સાથે વાત કરીએ તો તેમણે અત્યાર સુધીમાં ઈરાન, જોર્ડન, ઈજીપ્ત સહિતના ઘણા દેશોના વડાઓ સાથે વાત કરી છે અને પેલેસ્ટાઈનના સમર્થનમાં ઉભા રહેવાનું વચન આપ્યું છે.
સાઉદી અને ઈરાન વચ્ચેની દુશ્મની જૂની છે, હકીકતમાં ઈરાન શિયા મુસ્લિમ બહુમતી છે અને સાઉદી અરેબિયા સુન્ની બહુમતી છે. મધ્ય પૂર્વમાં તેમના વર્ચસ્વ માટે બંને દેશો વચ્ચે યુદ્ધ છે, તે 7 વર્ષ પહેલા વધુ ગરમાયું હતું જ્યારે સાઉદી અરેબિયા દ્વારા આતંકવાદના આરોપમાં ઈરાનના એક ધાર્મિક નેતા સહિત 47 લોકોને મૃત્યુદંડની સજા ફટકારવામાં આવી હતી. આ પછી, તેહરાનમાં સાઉદી દૂતાવાસ પર ઈરાનીઓએ હુમલો કર્યો અને બંને દેશોએ પોતાની વચ્ચેના સંબંધો તોડી નાખ્યા. 7 વર્ષ બાદ આ વર્ષે એપ્રિલમાં ચીનની મધ્યસ્થી બાદ બંને દેશ એક મંચ પર જોવા મળ્યા હતા. આ પછી ઓગસ્ટમાં સાઉદીએ ફરી એકવાર તેહરાનમાં પોતાનું દૂતાવાસ ખોલવાની જાહેરાત કરી હતી.
72 વર્ષમાં પ્રથમ વખત, મધ્ય પૂર્વના શક્તિશાળી દેશોમાંના એક, ઇઝરાયેલ અને સાઉદી અરેબિયા વચ્ચેના સંબંધો ધીમે ધીમે સામાન્ય થઈ રહ્યા હતા, આ વાતની પુષ્ટિ સાઉદી ક્રાઉન પ્રિન્સ મોહમ્મદ બિન સલમાને પોતે સપ્ટેમ્બરના અંતમાં એક મુલાકાતમાં કરી હતી. બિન સલમાને પોતે કહ્યું હતું કે બંને દેશ ધીરે ધીરે નજીક આવી રહ્યા છે અને વાતચીત અંતિમ તબક્કામાં છે. આ મિત્રતાનો પાયો 2020માં તત્કાલિન અમેરિકી રાષ્ટ્રપતિ ડોનાલ્ડ ટ્રમ્પના પ્રયાસો બાદ નંખાયો હતો.
વાસ્તવમાં, ટ્રમ્પની મધ્યસ્થીથી, બહેરીન, સંયુક્ત આરબ અમીરાત અને ઇઝરાયેલ વચ્ચે અબ્રાહમ સમજૂતી પર હસ્તાક્ષર થયા હતા, આ અંતર્ગત ત્રણેય દેશોએ એક બીજા દેશમાં એમ્બેસી ખોલવાની હતી, જ્યારે ઇઝરાયેલે બહેરીન માટે ફ્લાઇટ્સ શરૂ કરી ત્યારે તેને સાઉદી અરેબિયામાંથી પસાર થવું પડ્યું હતું. , આ રીતે સાઉદી પાસેથી મદદ માંગવામાં આવી હતી, જેના માટે મોહમ્મદ બિન સલમાન તૈયાર હતા. અમેરિકી રાષ્ટ્રપતિ બિડેન ફરી એકવાર બંનેને મિત્રતાના ટેબલ પર લાવ્યા, જેના કારણે બંને દેશો વચ્ચે વાતચીત શરૂ થઈ.
ઇઝરાયલ-હમાસ યુદ્ધથી મધ્ય પૂર્વના સમીકરણો વણસવા લાગ્યા છે, ગાઝામાં ઇઝરાયલી સેનાની એન્ટ્રી બાદ મધ્ય પૂર્વના તમામ ઇસ્લામિક દેશો ધીમે ધીમે એક થઇ રહ્યા છે, જ્યારે ઇરાન તમામ ઇસ્લામિક દેશોને એક થવાનું આહ્વાન કરી રહ્યું છે. જ્યારે સાઉદી અરેબિયાએ આરબ લીગની ઈમરજન્સી બેઠક બોલાવી છે અને સ્પષ્ટ કર્યું છે કે તે પેલેસ્ટાઈનની સાથે છે.
