ચીનની મદદથી 2024માં આ સંગઠનમાં પ્રવેશવાના સોગઠા ગોઠવ્યા,અનેક દેશોની ચાંપતી નજર
ચીનના રાષ્ટ્રપતિ શી જિનપિંગના ઈશારા બાદ ડ્રેગનની આર્થિક ગુલામ બની ગયેલી પાકિસ્તાન સરકારે આખરે બ્રિક્સના સભ્યપદ માટે અરજી કરી છે. પાકિસ્તાન વર્ષ 2024માં બ્રિક્સ સભ્યપદ ઈચ્છે છે જ્યારે આ વૈશ્વિક સંગઠનની કમાન રશિયા પાસે હશે. ભારતે પાકિસ્તાનના સમાવેશનો સખત વિરોધ કર્યો છે. રશિયા દાયકાઓથી ભારતનું ગાઢ મિત્ર રહ્યું છે, પરંતુ યુક્રેન યુદ્ધ બાદ હવે તે ચીનનું ’જુનિયર પાર્ટનર’ બની રહ્યું છે. ચીન પર રશિયાની વધતી નિર્ભરતાને કારણે પાકિસ્તાનનું મનોબળ ઉંચુ છે. પાકિસ્તાનના વિદેશ મંત્રીએ ભારત પાસે મદદ માંગવાને બદલે જોરદાર ટોણો માર્યો છે.રશિયન સમાચાર એજન્સી તાસના અહેવાલ મુજબ, રશિયામાં પાકિસ્તાનના તાજેતરમાં નિયુક્ત રાજદૂત મુહમ્મદ ખાલિદ જમાલીએ બ્રિક્સના સભ્યપદ વિશે માહિતી આપી છે. તેમણે કહ્યું કે પાકિસ્તાન બ્રિક્સના સભ્ય બનવા માટે રશિયાની મદદ ઈચ્છે છે. તેમણે કહ્યું, ’પાકિસ્તાન આ મહત્વપૂર્ણ સંગઠનનું સભ્ય બનવા માંગે છે અને અમે સમર્થન મેળવવા માટે તેના સભ્ય દેશોનો સંપર્ક કરવાની પ્રક્રિયામાં છીએ.’ પાકિસ્તાનના રખેવાળ વિદેશ મંત્રીએ ચીનને સમર્થન આપ્યા બાદ ભારત સામે કટાક્ષ કર્યો છે.
ભારતના વીટોના સવાલ પર પાકિસ્તાનના વિદેશ મંત્રીએ કહ્યું કે જો ભારત આમ કરશે તો બ્રિક્સમાં તેની પોતાની સ્થિતિ જોખમમાં આવી જશે. પાકિસ્તાનના વિદેશ મંત્રીએ ભારત સાથે વાત કરવાને બદલે ટોણો મારવાનું શરૂ કરી દીધું છે. એવું માનવામાં આવે છે કે તેની પાછળનું કારણ પાકિસ્તાનનો અતિશય આત્મવિશ્વાસ છે જે ચીનનું સમર્થન મળ્યા બાદ આવ્યો છે. પાકિસ્તાન બ્રિક્સનો સભ્ય દેશ બનવા માટે ઘણા સમયથી પ્રયાસ કરી રહ્યું છે પરંતુ ભારતે તેનો સખત વિરોધ કર્યો છે.
બ્રિક્સમાં પાકિસ્તાનનું સભ્યપદ ભારત તેના દાવાને સમર્થન આપે છે કે નહીં તેના પર નિર્ભર રહેશે. એટલા માટે પાકિસ્તાન ચીનની મદદથી રશિયા પર દબાણ લાવવા માંગે છે જેથી તે ભારતને આવું કરવા દબાણ કરે. પાકિસ્તાન બ્રિક્સ પ્લેટફોર્મનો લાભ લઈને વૈશ્વિક સ્તરે પોતાની ઓળખ વધુ મજબૂત કરવા માંગે છે. તે જ સમયે, ચીની રાષ્ટ્રપતિ ઇચ્છે છે કે આ જૂથમાં તેમને સમર્થન આપતા દેશોની સંખ્યા વધે જેથી તેઓ તેમની મનસ્વી નીતિઓ લાદી શકે.
હવે તમામની નજર રશિયા પર છે કે તે પાકિસ્તાનની અરજી પર શું નિર્ણય લે છે. બ્રિક્સમાં હાલમાં રશિયા, ભારત, ચીન અને દક્ષિણ આફ્રિકા સભ્યો છે. જાન્યુઆરી 2024માં આર્જેન્ટિના, ઈજિપ્ત, ઈથોપિયા, ઈરાન, સાઉદી અરેબિયા અને યુએઇ પણ તેના સભ્ય દેશો બની જશે. વિશ્લેષકોનો દાવો છે કે બ્રિક્સ પ્લસનું આ જૂથ આર્થિક આધાર પર જી7થી આગળ વધશે. આ સિવાય 40 વધુ દેશોએ તેમાં સામેલ થવાની ઈચ્છા વ્યકત કરી છે
