- રફાહ શહેરમાં હવાઇ હુમલો થયો, જેમાં 35 પેલેસ્ટિનિયન માર્યા ગયા
ઇન્ટરનેશનલ કોર્ટના આદેશ પછી પણ ઈઝરાયેલે ફરી એકવાર ગાઝા પટ્ટી ઉપર હુમલો કર્યો છે. પેલેસ્ટિનિયન હેલ્થ અને સિવિલ ઇમરજન્સી સર્વિસના અધિકારીઓએ દાવો કર્યો છે કે ઇઝરાયેલના હુમલામાં ઓછામાં ઓછા 35 પેલેસ્ટિનિયન માર્યા ગયા છે અને ઘણા ઘાયલ થયા છે.
હુમલા અંગે માહિતી આપતાં પેલેસ્ટિનિયન હેલ્થ એન્ડ સિવિલ ઇમરજન્સી સર્વિસના અધિકારીએ જણાવ્યું કે ઇઝરાયેલની સેનાએ દક્ષિણ ગાઝા પટ્ટીમાં રફાહ શહેરના એક વિસ્તારમાં હવાઇ હુમલો કર્યો છે. આ હુમલામાં 35 પેલેસ્ટિનિયન માર્યા ગયા અને ઘણા ઘાયલ થયા. તે જ સમયે, ઇઝરાયેલની સેનાએ કહ્યું કે તેની વાયુસેનાએ રફાહમાં હમાસના એક ઠેકાણા પર હુમલો કર્યો અને આ હુમલો ચોકસાઈપૂર્વકના દારૂગોળા સાથે અને ચોક્કસ ગુપ્ત માહિતીના આધારે કરવામાં આવ્યો.
ગાઝાના હમાસ સંચાલિત આરોગ્ય મંત્રાલયના પ્રવક્તા અશરફ અલ-કિદ્રાએ જણાવ્યું હતું કે હુમલામાં 35 લોકો માર્યા ગયા હતા અને ડઝનેક અન્ય લોકો ઘાયલ થયા હતા, જેમાં મોટાભાગની મહિલાઓ અને બાળકો હતા. આ હુમલો પશ્ચિમી રફાહના તેલ અલ-સુલતાન વિસ્તારમાં થયો હતો, જ્યાં હજારો લોકો આશ્રય લઈ રહ્યા હતા. કારણ કે શહેરના પૂર્વીય વિસ્તારોમાંથી ઘણા લોકો ભાગી ગયા હતા, જ્યાં બે અઠવાડિયા પહેલા ઇઝરાયલી સુરક્ષા દળોએ જમીન પર હુમલો કર્યો હતો.
રેડ ક્રોસની ઇન્ટરનેશનલ કમિટી કહે છે કે રફાહમાં તેઓ ચલાવતી ફિલ્ડ હોસ્પિટલમાં મોટી સંખ્યામાં જાનહાનિ આવી રહી છે, અને અન્ય હોસ્પિટલોમાં પણ ઘણા દર્દીઓ આવી રહ્યા છે. એજન્સીએ એક સ્થાનિકને ટાંકીને જણાવ્યું હતું કે હવાઈ હુમલામાં તંબુ બળી ગયા હતા, અને લોકોના શરીર પર પડી રહ્યા હતા. હમાસ અલ-કાસમ બ્રિગેડના એક નિવેદન અનુસાર, ’નાગરિકો વિરુદ્ધ નરસંહાર’ના જવાબમાં રોકેટ છોડવામાં આવ્યા હતા.તે જ સમયે, ગાઝાના સ્વાસ્થ્ય મંત્રાલયે કહ્યું કે ઇઝરાયેલના હુમલામાં અત્યાર સુધીમાં લગભગ 36,000 પેલેસ્ટિનિયન માર્યા ગયા છે.
