- યુધ્ધના પ્રકાર બદલી રહ્યા છે!!!
- ઈરાનની સરકારની ત્રણેય શાખાઓ, ન્યાયતંત્ર, ધારાસભા અને કાર્યપાલિકા
- સાયબર હુમલાનો ભોગ બની: દેશના અનેક મહત્વપૂર્ણ ડેટા ચોરાયા
ઈરાનના જોરદાર મિસાઈલ હુમલાનો ઈઝરાયેલે જડબાતોડ જવાબ આપ્યો છે. આ વખતે હુમલો ન તો આકાશમાંથી થયો કે ન તો જમીન પરથી, ન તો મિસાઈલ કે રોકેટનો ઉપયોગ કરવામાં આવ્યો, પરંતુ આ વખતે ઈઝરાયેલે સૌથી ખતરનાક સાઈબર હુમલો કર્યો છે. પીએમ નેતન્યાહુના નિર્દેશ પર ઇઝરાયલના નિષ્ણાતોએ તેમના જ દેશમાં કરેલા આવા હુમલાથી ઈરાનની કમર તૂટી ગઈ છે. આ સાયબર હુમલાની ઝપેટમાં ઈરાનનું સમગ્ર તંત્ર આવી ગયું છે.
રિપોર્ટ અનુસાર ઈરાન સરકાર અને તેમના પરમાણુ ઠેકાણાઓ પર સાયબર હુમલો કરવામાં આવ્યો છે. આના માધ્યમથી ઈઝરાયલે પરમાણુ સાથે જોડાયેલી ઘણી મહત્વપૂર્ણ માહિતી ચોરી કરી છે. ઈરાનની સુપ્રીમ કાઉન્સિલ ઓફ સાયબર સ્પેસના ભૂતપૂર્વ સચિવ ફિરોઝાબાદીએ જણાવ્યું હતું કે ઈરાનની સરકારની ત્રણેય શાખાઓ, ન્યાયતંત્ર, ધારાસભા અને કાર્યપાલિકા આ સાયબર હુમલાનો ભોગ બની છે. જે સંસ્થાઓ પર હુમલો કરવામાં આવ્યો તેની યાદી દર્શાવે છે કે ઈજા કેટલી ઊંડી છે.
ન્યુક્લિયર પાવર પ્લાન્ટ્સ, પોર્ટ ટ્રાન્સપોર્ટેશન નેટવર્ક્સ, ફ્યુઅલ ડિસ્ટ્રિબ્યુશન સિસ્ટમ્સ અને મ્યુનિસિપલ નેટવર્ક આ સાયબર હુમલાથી પ્રભાવિત થયા છે. તુર્કમેનિસ્તાનમાં એક તરફ ઈરાનના રાષ્ટ્રપતિ મસૂદ પેઝેસ્કિયન રશિયન રાષ્ટ્રપતિ પુતિન સાથે મિત્રતા કેળવી રહ્યા હતા તો બીજી તરફ ઈઝરાયેલ તેહરાનમાં સાઈબર હુમલાઓ કરી રહ્યું હતું. ઈઝરાયલે પહેલા જ ધમકી આપી હતી કે ઈરાને બેલેસ્ટિક મિસાઈલથી હુમલો કરીને મોટી ભૂલ કરી છે. તેણે આની કિંમત ચૂકવવી પડશે.
ઈઝરાયેલે તેની ધમકી સાચી સાબિત કરી. અમેરિકા ઈઝરાયલને ચેતવણી આપી રહ્યું હતું કે ઈરાનના પરમાણુ કેન્દ્રો અને તેલ સુવિધાઓને નિશાન ન બનાવે. ઈઝરાયેલે પણ સીધો હુમલો કર્યો ન હતો, પરંતુ સાયબર હુમલા દ્વારા ઈરાનને જડબાતોડ જવાબ આપ્યો હતો. ઈરાન પર ઈઝરાયેલનો આ પહેલો હુમલો છે. બીજો હુમલો ક્યારે થાય છે તે જોવું રહ્યું. જો કે ઈરાન અને ઈઝરાયેલ વચ્ચેની લાંબી દુશ્મનાવટમાં આ પહેલીવાર નથી જ્યારે ઈઝરાયેલે સાઈબર હુમલો કર્યો હોય.
ઈઝરાયેલ સાયબર હુમલામાં નિષ્ણાંત ઈરાન 14 વર્ષથી હુમલા હેઠળ
ઈઝરાયેલ 14 વર્ષથી આવા હુમલાઓ કરી રહ્યું છે. ઈઝરાયેલને સાયબર હુમલામાં નિષ્ણાત માનવામાં આવે છે. તાજેતરના પેજર અને વોકી-ટોકી વિસ્ફોટો પછી, એવું માનવામાં આવે છે કે ઇઝરાયેલ પાસે દુશ્મનોને નુકસાન પહોંચાડવા માટે ઘણા હથિયારો છે. તેની ગુપ્તચર સંસ્થા મોસાદ પહેલા પણ આવા અનેક હુમલાઓ કરી ચૂકી છે. દુશ્મનોને જડબાતોડ જવાબ આપ્યો છે. જૂન 2010 માં, ઇઝરાયેલના ’સ્ટક્સનેટ વાયરસ’ એ ઇરાનના બુશેહરમાં પરમાણુ પ્લાન્ટના કમ્પ્યુટર્સ પર હુમલો કર્યો.
અગાઉ પણ ઈઝરાયેલનો વાયરસ ઈરાનના 30 હજાર કોમ્પ્યુટરમાં ઘૂસ્યો હતો
અગાઉ પણ ઇઝરાયેલે સાયબર હુમલો કર્યો હતો. જેમાં 30 હજાર કોમ્પ્યુટર પ્રભાવિત થયા હતા. એપ્રિલ 2011માં, ઈરાની પરમાણુ કેન્દ્રોમાં ફરીથી ’સ્ટાર્સ’ નામના વાયરસ દ્વારા ઘૂસણખોરી કરવામાં આવી હતી. નવેમ્બર 2011માં ઈરાનને ખબર પડી કે ’ડ્યુક’ નામનો નવો વાયરસ નુકસાન પહોંચાડી રહ્યો છે. તેનો હેતુ ઈરાનના પરમાણુ કેન્દ્રોને નિશાન બનાવવાનો હતો. એપ્રિલ 2012માં ઈરાને ’વાઈપર’ નામનો માલવેર શોધી કાઢ્યો હતો. મે 2012માં ઈરાને દાવો કર્યો હતો કે ’ફ્લેમ’ નામના વાયરસે સરકારી કમ્પ્યુટરમાંથી સરકારી ડેટા ચોરી કરવાનો પ્રયાસ કર્યો હતો.
