અબતક, રાજકોટ :
લેન્ડગ્રેબિંગની ઢગલાબંધ ફરિયાદો મળી છે. છતાં તંત્ર તેમાં વામણું પૂરવાર થઇ રહ્યું હોય તેવા આક્ષેપો થઈ રહ્યા છે. રાજ્યમાં લેન્ડ ગ્રેબિંગ એકટ હેઠળ 11,182 ફરિયાદો મળી છે. જેમાંથી 589 સામે જ એફઆઈઆર નોંધ થઈ છે. લેન્ડગ્રેબિંગમાં સરકાર અને કોર્ટ બન્ને વચ્ચે સમન્વયનો અભાવ પણ જોવા મળી રહ્યો છે.
રાજ્યમાં લેન્ડ ગ્રેબિંગ એકટ હેઠળ 11,182 ફરિયાદો મળી જેમાંથી 589 કેસમાં જ એફઆઈઆર નોંધાઈ
ગુજરાત સરકારે ગુજરાત હાઇકોર્ટમાં જણાવ્યું કે તેને લેન્ડગ્રેબિંગની 11,182 ફરિયાદો મળી છે. જેમની 11,036 ફરીયાદો તેની સમિતિ દ્વારા અને 146 વિશેષ અદાલતો દ્વારા જે તેમને સીધી મળી છે. આ ગુનાઓ માટે કુલ 589 એફઆઈઆર નોંધવામાં આવી છે.
ગુજરાત લેન્ડ ગ્રેબિંગ એક્ટ, 2020 ને પડકારતી અરજીઓની સુનાવણી દરમિયાન એડવોકેટ જનરલ કમલ ત્રિવેદીએ રાજ્યભરમાં મળેલી કથિત જમીન પચાવી પાડવાની ફરિયાદો અંગેની વિગતો રજૂ કરી હતી. તેણે કોર્ટને જણાવ્યું હતું કે તમામ ફરિયાદો કાં તો સમિતિઓ અથવા અદાલતો દ્વારા પ્રાપ્ત થઈ હતી અને કોઈએ સીધો પોલીસનો સંપર્ક કર્યો ન હતો.
સરકારી કાયદા અધિકારીએ વધુમાં જણાવ્યું હતું કે નોંધાયેલી કુલ ફરિયાદોમાંથી, સમિતિએ 805 ફરિયાદોને એફઆઇઆર તરીકે નોંધવાની ભલામણ કરી છે. પરંતુ આમાંના ઘણા કેસમાં સમાધાન થયું હતું અને અંતે 589 કેસમાં એફઆઈઆર નોંધવામાં આવી હતી.
સમિતિને મળેલી 11,036 ફરિયાદોમાંથી 467 સરકારી જમીન અને 10,569 કેસ ખાનગી જમીન વિવાદોથી સંબંધિત છે. કોર્ટમાં જમીન હડપ કરવાની 146 ફરિયાદોમાંથી 16 સરકારી જમીન અને 130 ખાનગી મિલકતો સામેલ છે. નોંધાયેલી 589 એફઆઈઆરમાંથી 93 કેસ સરકારી જમીન પર અતિક્રમણ અને 493 ખાનગી જમીન વિવાદો સંબંધિત છે. ઉલ્લેખનીય છે કે આ મહિનાની શરૂઆતમાં, રાજ્ય સરકારે એક વટહુકમ બહાર પાડ્યો હતો જેમાં જમીન હડપ કરવાના દારૂના પ્રતિબંધના કાયદામાં કેટલાક સુધારા કરવામાં આવ્યા હતા.
