વિશ્વભરમાં અબજો લોકો દરરોજ ઇન્ટરનેટનો ઉપયોગ કરે છે. ઘણા લોકો કામ માટે ઇન્ટરનેટનો ઉપયોગ કરે છે, જ્યારે ઘણા લોકો સમય પસાર કરવા માટે કલાકો સુધી વેબની શોધખોળ કરતા રહે છે.
ઘણા લોકોને ઇન્ટરનેટની લત લાગી જાય છે અને તેના કારણે ઘણીવાર એવું કહેવામાં આવે છે કે ઇન્ટરનેટનો વધુ પડતો ઉપયોગ આપણા માનસિક સ્વાસ્થ્ય માટે હાનિકારક છે. જોકે, એક નવા અભ્યાસમાં સામે આવ્યું છે કે ઈન્ટરનેટ લોકોના સ્વાસ્થ્ય માટે ફાયદાકારક સાબિત થઈ શકે છે. એવું પણ જાણવા મળ્યું છે કે ઇન્ટરનેટ આપણા સંતોષના સ્તરને સુધારી શકે છે.
અભ્યાસમાં જાણવા મળ્યું કે
ઓક્સફર્ડ યુનિવર્સિટીની ઓક્સફર્ડ ઈન્ટરનેટ ઈન્સ્ટિટ્યૂટ દ્વારા કરવામાં આવેલા અભ્યાસમાં જાણવા મળ્યું છે કે ઈન્ટરનેટનો ઉપયોગ કરવાથી લોકોના માનસિક સ્વાસ્થ્ય માટે સકારાત્મક લાભ મળી શકે છે. સંશોધકોએ 2006 થી 2021 દરમિયાન 168 દેશોના 20 લાખથી વધુ લોકો પર ઈન્ટરનેટના ઉપયોગ અને માનસિક સુખાકારી અંગે આ અભ્યાસ હાથ ધર્યો છે. આ સંશોધનના ડેટાનું વિશ્લેષણ કરીને, સંશોધકોએ શોધી કાઢ્યું કે ઇન્ટરનેટનો ઉપયોગ લોકોની સકારાત્મક સુખાકારી સાથે જોડાયેલો છે. ઇન્ટરનેટનો ઉપયોગ જીવનની ગુણવત્તામાં સુધારો કરી શકે છે અને મનોવૈજ્ઞાનિક સુખાકારીને પ્રોત્સાહન આપવામાં મદદ કરી શકે છે.
નુકસાન કરતાં વધુ ફાયદાકારક પરંતુ
સંશોધકોના મતે, જે લોકો પાસે ઈન્ટરનેટની સુવિધા છે તેઓ ઈન્ટરનેટ ન ધરાવતા લોકો કરતા વધુ સારું અનુભવે છે. ઈન્ટરનેટ વપરાશકર્તાઓ અન્ય લોકો કરતા જીવનમાં વધુ સંતુષ્ટ અનુભવે છે. એવું નથી કે આ અભ્યાસમાં માત્ર ઈન્ટરનેટના ફાયદા જ જોવા મળ્યા હતા પરંતુ ઈન્ટરનેટ વિશે ઘણી રીતે નકારાત્મક બાબતો પણ સામે આવી છે. જો કે, એકંદર પરિણામ જોતા એમ કહી શકાય કે ઈન્ટરનેટ લોકો માટે નુકસાન કરતાં વધુ ફાયદાકારક સાબિત થઈ શકે છે, પરંતુ લોકોએ તેનો યોગ્ય ઉપયોગ કરવાની જરૂર છે.
સાવધાની સાથે ઇન્ટરનેટનો ઉપયોગ
આ રિસર્ચમાં ભલે ઈન્ટરનેટના ફાયદાઓ સામે આવ્યા હોય, પરંતુ આંખના ડોકટરોના મતે લોકોએ પોતાના સ્ક્રીન ટાઈમને કંટ્રોલ કરવો જોઈએ, નહીં તો તેનાથી આંખોની સમસ્યા થઈ શકે છે. લાંબા સમય સુધી સ્ક્રીનને જોવાથી આંખની શુષ્કતા, દ્રષ્ટિની ખામી, આંખમાં બળતરા સહિતની ઘણી સમસ્યાઓ થઈ શકે છે. તેનાથી બચવા માટે લોકોએ સ્ક્રીન ટાઈમ ઘટાડવાનો પ્રયાસ કરવો જોઈએ. અગાઉના ઘણા સંશોધનોમાં એ પણ સામે આવ્યું છે કે સોશિયલ મીડિયાનો વધુ પડતો ઉપયોગ માનસિક સ્વાસ્થ્ય માટે હાનિકારક હોઈ શકે છે. તેથી લોકોએ સાવધાની સાથે ઇન્ટરનેટનો ઉપયોગ કરવો જોઈએ.
