- શિવરાજપુર બીચ ખાતે 13 જાન્યુઆરીના રોજ ઉજવાશે આંતરરાષ્ટ્રીય પતંગ મહોત્સવ યોજાશે
- આકાશ રંગબેરંગી પતંગોથી છવાશે
દેવભૂમિ દ્વારકાના શિવરાજપુર બીચ ખાતે આગામી 13 જાન્યુઆરી, 2025 દરમિયાન આંતરરાષ્ટ્રીય પતંગ મહોત્સવનું આયોજન કરવામાં આવ્યું છે. તેમજ પતંગબાજોનો ઉત્સાહ વધારવા માટે આકાશ રંગબેરંગી પતંગોથી છવાશે.
દેવભૂમિ દ્વારકા જિલ્લામાં તારીખ 13મી જાન્યુઆરીના શિવરાજપુર બીચ ખાતે આંતરરાષ્ટ્રીય પતંગ મહોત્સવનું આયોજન કરવામાં આવ્યું છે. તેમજ આંતરરાષ્ટ્રીય પતંગ મહોત્સવના સુચારૂ આયોજન અંગે કલેકટર કચેરી-ખંભાળીયા ખાતે જિલ્લા કલેકટર જી.ટી.પંડ્યાના અધ્યક્ષસ્થાને બેઠક યોજવામાં આવી હતી.
રાજ્ય સરકાર દ્વારા ગુજરાતને પ્રવાસન ક્ષેત્રે આગવું સ્થાન પ્રાપ્ત થાય તે માટે દર વર્ષની જેમ આ વર્ષે પણ સાબરમતી રિવરફ્રન્ટ ખાતે આંતરરાષ્ટ્રીય પતંગ મહોત્સવનું તા.11મીથી 14મી સુધી આયોજન કરવામાં આવ્યું છે. આ દરમિયાન દેવભૂમિ દ્વારકા જિલ્લામાં તારીખ 13મી જાન્યુઆરીના રોજ શિવરાજપુર બીચ ખાતે પતંગ મહોત્સવનું આયોજન થશે.
આ બેઠકમાં કલેકટરએ પતંગ મહોત્સવમાં પતંગબાજો માટે તમામ આગતા-સ્વાગત તેમજ પતંગ ઉત્સવ દરમિયાનની તમામ આનુષાંગિક વ્યવસ્થાઓ અંગે વિગતો મેળવી જરૂરી સૂચનો કર્યા હતા. આ કાર્યક્રમને અનુરૂપ કાઇટીસ્ટો માટેના સ્ટોલ, સ્ટેજ તેમજ આનુષાંગિક અન્ય વ્યવસ્થા કરવા જરૂરી સૂચના આપવામાં આવી હતી.
આ સમગ્ર કાર્યક્રમની રૂપરેખાની વિગતો મેળવવા સાથે સાંસ્કૃતિક કાર્યક્રમની પ્રસ્તૃતિ, ઉપરાંત ફાયર બ્રિગેડ, ટોયલેટની સુવિધા, પાર્કિંગ વ્યવસ્થા, મેડીકલ ટીમ, સહિતની બાબત સુનિશ્ચિત કરવા ખાસ સૂચના આપવામાં આવી હતી.
