સંયુક્ત રાષ્ટ્ર મહાસભામાં રશિયા સામેના ઠરાવમાં ભારત સહિતના 35 દેશો મતદાનથી દુર રહ્યા, રશિયા, બેલારુસ, એરિટ્રિયા, ઉત્તર કોરિયા અને સીરિયાએ રશિયાના સમર્થનમાં મતદાન કર્યું, જ્યારે 141 દેશોએ રશિયા વિરુદ્ધ મત આપ્યો
અબતક, નવી દિલ્હી
યુક્રેન પર રશિયન હુમલાની નિંદા કરવાના સંયુક્ત રાષ્ટ્ર મહાસભાના ઠરાવ સામે રશિયાને બાકીના દેશોનું સમર્થન મળ્યું. ગુરુવારે યુએનમાં લાવવામાં આવેલા નિંદાના પ્રસ્તાવની તરફેણમાં 141 મત પડ્યા હતા, જ્યારે 35 સભ્યોએ મતદાનમાં ભાગ લીધો ન હતો. એવા પણ પાંચ સભ્ય દેશો હતા જેમણે ઠરાવની વિરુદ્ધમાં મતદાન કર્યું હતું. ઠરાવ પસાર થતાં સામાન્ય સભામાં તાળીઓનો ગડગડાટ થયો હતો. ભારત આ ઠરાવ પર મતદાનથી દૂર રહ્યું. આ બીજી વખત છે જ્યારે ભારતે રશિયા વિરુદ્ધ લાવવામાં આવેલા ઠરાવથી પોતાને દૂર કર્યું છે.
યુએનજીએમાં આ ઠરાવના વિરોધમાં મતદાન કરનારા પાંચ દેશોમાં રશિયા, બેલારુસ, એરિટ્રિયા, ઉત્તર કોરિયા અને સીરિયા છે. રશિયા અને યુક્રેન વચ્ચે વધતા તણાવને પગલે એક અઠવાડિયા કરતાં ઓછા સમયમાં સંયુક્ત રાષ્ટ્રમાં રશિયા વિરુદ્ધ આ ત્રીજો ઠરાવ હતો. ઠરાવ પર મતદાન બાદ પોતાના નિવેદનમાં સંયુક્ત રાષ્ટ્રમાં ભારતીય રાજદૂત ટીએસ તિરુમૂર્તિએ કહ્યું કે ભારત યુક્રેનમાં ઝડપથી બગડતી સ્થિતિ અને માનવતાવાદી સંકટને લઈને ખૂબ જ ચિંતિત છે. દરખાસ્તની તરફેણમાં 141 મત પડ્યા હતા જ્યારે 35 સભ્યોએ મતદાનમાં ભાગ લીધો ન હતો અને પાંચ સભ્યોએ દરખાસ્તની વિરુદ્ધમાં મતદાન કર્યું હતું.
સામાન્ય સભામાં ઠરાવ પસાર કરવા માટે બે તૃતીયાંશ બહુમતી જરૂરી છે. જે 35 દેશોએ આ પ્રસ્તાવથી પોતાને દૂર રાખ્યા છે તેમાં ભારત, ઈરાક, ઈરાન, પાકિસ્તાન અને ચીનનો સમાવેશ થાય છે. ફેબ્રુઆરીની શરૂઆતમાં, ચીન અને રશિયાએ નાટોના વિસ્તરણની નિંદા કરતું સંયુક્ત નિવેદન બહાર પાડ્યું હતું પરંતુ યુક્રેનનું સીધું નામ લીધું ન હતું. યુક્રેન પર રશિયન હુમલાનો આજે આઠમો દિવસ છે. યુક્રેનમાં ભીષણ લડાઈ ચાલી રહી છે. રશિયન સેનાએ બુધવારે ખાર્કિવ પર ભયાનક હુમલો કર્યો હતો. અહીં પોલીસ હેડક્વાર્ટર બિલ્ડિંગને નિશાન બનાવીને બોમ્બ હુમલો થયો હતો. રશિયા રાજધાની કિવ પર કબજો મેળવવા માટે સખત દબાણ કરી રહ્યું છે. રશિયાએ કિવને ઘેરી લીધું હોવાનું કહેવાય છે. દરમિયાન રશિયાએ આરોપ લગાવ્યો છે કે યુક્રેને ભારતીય વિદ્યાર્થીઓનો ઢાલ તરીકે ઉપયોગ કરવા માટે તેમને બંધક બનાવ્યા છે. રશિયાએ કહ્યું કે યુક્રેનમાં તેની સેના ભારતીય વિદ્યાર્થીઓને બહાર કાઢવામાં મદદ કરી શકે છે.
