રોહિતે ઇજાના કારણે 9માં નંબરે ઉતરીને પણ શાનદાર ફિફટી ફટકારી, બાંગ્લાદેશની બોલિંગે ભારતના ટોપ ઓર્ડરને ફેઇલ કર્યો
ભારતીય ટીમ બાંગ્લાદેશ સામેની ઓડીઆઈ શ્રેણીની બીજી મેચ પણ હારી ગઈ છે. શેરે બાંગ્લા સ્ટેડિયમમાં રમાયેલી મેચમાં બાંગ્લાદેશે 5 રનથી જીત મેળવી હતી. યજમાન ટીમે શ્રેણીની પ્રથમ મેચ એક વિકેટથી જીતી હતી. બાંગ્લાદેશે બીજી વખત ભારતને વનડે શ્રેણીમાં હરાવ્યું છે. આ પહેલા 2015માં બાંગ્લાદેશના પ્રવાસે ગયેલી ટીમ ઈન્ડિયા મહેન્દ્ર સિંહ ધોનીની કેપ્ટનશીપમાં ત્યાં સિરીઝ હારી ગઈ હતી. પ્રથમ બેટિંગ કરતા બાંગ્લાદેશે 271 રન બનાવ્યા હતા. ટીમ ઈન્ડિયા 9 વિકેટે 266 રન જ બનાવી શકી હતી.ઈજાના કારણે ભારતીય ટીમનો કેપ્ટન રોહિત શર્મા ઇનિંગ્સની સારી શરૂઆત કરી શક્યો ન હતો. તે 9મા નંબરે ઉતર્યો હતો. આ પછી રોહિતે જવાબદારી લીધી અને તોફાની ઈનિંગ રમી પરંતુ અંતે ટીમ ઈન્ડિયા મેચ હારી ગઈ. ટીમને છેલ્લા બોલ પર 6 રનની જરૂર હતી પરંતુ મુસ્તફિઝુર રહેમાને યોર્કર ફટકારીને પોતાની ટીમને જીત અપાવી હતી. રોહિતે 28 બોલમાં 5 છગ્ગા અને 3 ચોગ્ગાની મદદથી 51 રનની અણનમ ઇનિંગ રમી હતી.
ભારતનો સ્કોર એક તબક્કે ચાર વિકેટે 65 રન હતો, ત્યાર બાદ શ્રેયસ અય્યર (82 રન) અને અક્ષર પટેલ (56 રન) વચ્ચે પાંચમી વિકેટ માટે 107 રનની ભાગીદારી થઈ હતી. રોહિતની ઇજાને કારણે ઇનિંગ્સની શરૂઆત કરવા આવેલો વિરાટ કોહલી (5) બીજી ઓવરમાં જ ઇબાદત હુસૈન (45 રનમાં 3 વિકેટ)નો શિકાર બન્યો હતો. શિખર ધવનનું (8) ખરાબ ફોર્મ ચાલુ રહ્યું. વોશિંગ્ટન સુંદર (11)ને ચોથા નંબર પર મોકલવાનો પ્રયોગ સફળ ન થયો અને શાકિબ અલ હસને તેની પ્રથમ ઓવરમાં જ તેને મિડવિકેટ પર કેચ કરાવ્યો.
કેએલ રાહુલ (14) સ્પિનરો સામે સંઘર્ષ કરી રહ્યો હતો અને મેહિદી હસને (46 રનમાં 2 વિકેટ) તેને એલબીડબ્લ્યુ આઉટ કરીને ભારતને ચોથો ઝટકો આપ્યો હતો. બીજી તરફ, અય્યરે 69 બોલમાં તેની પચાસ પૂરી કરી અને પછી મેહિદી હસનને લોંગ-ઓન પર સુંદર સિક્સર ફટકારી. તેણે આ બોલર પર સિક્સર ફટકારીને અક્ષર સાથેની ભાગીદારીને 100 રન સુધી પહોંચાડી દીધી. જો કે, એ જ ઓવરમાં અય્યરે બોલને હવામાં લહેરાવ્યો અને ડીપ મિડવિકેટ પર કેચ લીધો.અક્ષરે નસુમને સિક્સર ફટકારી અને પછી તેની ઓડીઆઈ કારકિર્દીની બીજી અડધી સદી પૂરી કરી. હાથ પર પટ્ટી બાંધેલી હોવા છતાં રોહિત નવમા નંબરે બેટિંગ કરવા આવ્યો હતો. તેની સાથે બીજા છેડે દીપક ચહર (11) હતો, જે બાંગ્લાદેશની ઇનિંગ્સમાં હેમસ્ટ્રિંગની ઈજાને કારણે માત્ર ત્રણ ઓવર જ ફેંકી શક્યો હતો. રોહિતે ઇબાદત હુસૈન અને મહમુદુલ્લાહ પર બે-બે છગ્ગા ફટકારીને મેચને રોમાંચક બનાવી દીધી હતી.
મહેદી અને હમુદુલ્લાહની રેકોર્ડ ભાગીદારી
બાંગ્લાદેશ માટે ખરાબ શરૂઆત થઈ હતી. ટીમ ઈન્ડિયાએ પ્રથમ 20 ઓવરમાં દબાણ બનાવી રાખ્યું હતું. બાંગ્લાદેશે 69 રનમાં 6 વિકેટ ગુમાવી દીધી હતી. આ પછી મહમુદુલ્લાહ અને મેહદી હસન મિરાજ ક્રિઝ પર રહ્યા હતા.બંનેએ 148 રનની ભાગીદારી કરી હતી. ભારત સામે બાંગ્લાદેશની આ સૌથી મોટી ભાગીદારી છે. મહમુદુલ્લાહે 77 રનની ઇનિંગ રમી હતી. આ સાથે જ મિરાજે ઇનિંગના છેલ્લા બોલ પર સદી ફટકારી હતી. તે 83 બોલમાં 8 ચોગ્ગા અને 4 છગ્ગાની મદદથી 100 રન બનાવીને અણનમ રહ્યો હતો. તે નંબર-8 પર બેટિંગ કરીને ઓડીઆઈમાં સદી ફટકારનાર બીજો બેટ્સમેન બન્યો છે.
