- ટી-20 વિશ્ર્વકપ બાદ ભારતીય લીજેન્ડ્સે પણ પ્રભુત્વ દેખાયું
- ભારત તરફથી અનુરીત સિંહે સૌથી વધુ ત્રણ વિકેટ ઝડપી હતી.વિનય કુમાર, પવન નેગી અને ઈરફાન પઠાણે એક-એક વિકેટ લીધી
લિજેન્ડ્સની વર્લ્ડ ચેમ્પિયનશિપમાં ભારતની ચેમ્પિયન ટીમે પાકિસ્તાન ચેમ્પિયનને 5 વિકેટે હરાવ્યું છે. આ મેચમાં ભારતીય ચેમ્પિયન માટે બોલરો અને બેટ્સમેનોએ શાનદાર પ્રદર્શન કર્યું હતું. અંબાતી રાયડુએ મેચમાં 50 રનની શાનદાર ઇનિંગ રમી હતી. તેના કારણે જ ટીમ મેચ જીતવામાં સફળ રહી હતી. મેચમાં પાકિસ્તાનના કેપ્ટન યુનિસ ખાને ટોસ જીતીને પ્રથમ બેટિંગ કરવાનો નિર્ણય કર્યો હતો. પરંતુ પાકિસ્તાની ચેમ્પિયનની ટીમ 156 રન બનાવી શકી હતી.
ટાર્ગેટનો પીછો કરતી વખતે મેચમાં ભારતની શરૂઆત ખૂબ જ ખરાબ રહી હતી. જ્યારે રોબિન ઉથપ્પા અને સુરેશ રૈના એક જ ઓવરમાં આઉટ થયા હતા. ત્યારબાદ અંબાતી રાયડુ અને ગુરકીરત સિંહે શાનદાર બેટિંગ કરી હતી. આ બંને ખેલાડીઓએ ટીમને ટાર્ગેટની નજીક લઈ ગયા. રાયડુએ 29 બોલમાં પોતાની અડધી સદી પૂરી કરી હતી. પરંતુ તે બીજા જ બોલ પર આઉટ થઈ ગયો હતો. તેણે પોતાની ઇનિંગમાં 5 ફોર અને 2 સિક્સર ફટકારી હતી. ગુરકીરત સિંહે 34 રનનું યોગદાન આપ્યું હતું. અંતમાં ઈન્ડિયા ચેમ્પિયન્સ તરફથી યુસુફ પઠાણે 16 બોલમાં 30 રન ફટકાર્યા હતા. યુવરાજ સિંહ 15 રન બનાવીને નોટઆઉટ રહ્યો હતો. ઈરફાન પઠાણે ચોગ્ગો ફટકારીને ભારતીય ચેમ્પિયન્સને જીત અપાવી હતી.
પાકિસ્તાન ચેમ્પિયન્સ તરફથી આમેર યામીને સૌથી વધુ બે વિકેટ લીધી હતી. તેમના સિવાય સઈદ અજમલ, વહાબ રિયાઝ અને શોએબ મલિકના ખાતામાં એક-એક વિકેટ ગઈ. પરંતુ આ ખેલાડીઓ વધુ અસર છોડી શક્યા ન હતા અને ભારતીય ચેમ્પિયન બેટ્સમેનોએ મુક્તપણે સ્ટ્રોક રમ્યા હતા અને ઘણા રન બનાવ્યા હતા. પ્રથમ બેટિંગ કરતા પાકિસ્તાન ચેમ્પિયન્સે 156 રન બનાવ્યા હતા. ટીમનો ઓપનર શરજીલ ખાન મોટી ઇનિંગ રમી શક્યો ન હતો અને 12 રન બનાવીને આઉટ થયો હતો. આ પછી કામરાન અકમલ અને સોહેબ મકસૂદે થોડો સમય વિકેટ પર ટકી રહેવાનો પ્રયાસ કર્યો હતો. કામરાન 24 રન બનાવીને પવન નેગીના હાથે આઉટ થઈને પેવેલિયન પરત ફર્યો હતો. શોએબ મલિકે 36 બોલમાં 41 રન બનાવ્યા હતા. તેણે પોતાની ઇનિંગ દરમિયાન ત્રણ સિક્સર પણ ફટકારી હતી. તેના કારણે જ પાકિસ્તાનની ચેમ્પિયન ટીમ સન્માનજનક સ્કોર સુધી પહોંચવામાં સફળ રહી હતી. ભારત તરફથી અનુરીત સિંહે સૌથી વધુ ત્રણ વિકેટ ઝડપી હતી. તેમના સિવાય વિનય કુમાર, પવન નેગી અને ઈરફાન પઠાણે એક-એક વિકેટ લીધી હતી.
