- ડેટા સુરક્ષા, કવરેજ વિસ્તાર અને અન્ય મુખ્ય પરિમાણો સંબંધિત વિગતવાર માહિતી સાથે નિયમોના પાલનની બાહેંધરી બાદ જ કંપનીને ભારતીય માર્કેટમા મળશે પ્રવેશ
ડિપાર્ટમેન્ટ ઓફ ટેલિકોમ્યુનિકેશન્સ એ ભારતમાં સેટેલાઇટ સંચાર સેવાઓને મંજૂરી આપતા પહેલા એલોન મસ્કની સ્ટારલિંક અને જેફ બેઝોસની એમેઝોન પર કડક સુરક્ષા ધોરણો લાદ્યા છે. અહેવાલ મુજબ, બંને કંપનીઓ ડેટા સુરક્ષા, કવરેજ વિસ્તાર અને અન્ય મુખ્ય પરિમાણો સંબંધિત વિગતવાર પાલન માહિતી પ્રદાન કરે તેવી અપેક્ષા છે. સ્ટારલીન્ક અને એમેઝોનની અરજીઓ વધારાની સુરક્ષા તપાસને કારણે હજુ પણ પેન્ડિંગ છે.
વિગતોથી વાકેફ અધિકારીઓએ જણાવ્યું હતું કે તાજેતરમાં યુએસ સ્થિત બંને કંપનીઓને પત્રો મોકલવામાં આવ્યા હતા અને વિભાગ તેમના જવાબની રાહ જોઈ રહ્યું છે. “તેમની અરજીઓ માત્ર ત્યારે જ પ્રક્રિયા કરી શકાય છે જો તેઓ પાલન સબમિટ કરે. કંપનીઓએ હજુ સુધી જવાબ આપ્યો નથી,” વિગતોથી પરિચિત વ્યક્તિએ જણાવ્યું હતું.
અન્ય એક અધિકારીએ જણાવ્યું હતું કે સરકાર તેમના પ્રતિસાદની વધુ થોડો સમય રાહ જોશે, પરંતુ જ્યાં સુધી તેઓ સુરક્ષાની તમામ શરતો સાથે સંમત ન થાય ત્યાં સુધી અરજીઓ પર પ્રક્રિયા કરવામાં આવશે નહીં. ત્રીજા અધિકારીએ જણાવ્યું હતું કે, “ભારતમાં સેવાઓ પૂરી પાડવા માટે, સેટ કોમ પ્રદાતાઓએ સરકારને વિવિધ સુરક્ષા-સંબંધિત અનુપાલનો તેમજ ડેટા, કવરેજ વિસ્તાર વગેરેને લગતા અનુપાલન વિશે જાણ કરવી જરૂરી છે. તમામ શરતોને પૂર્ણ કરવી જરૂરી છે.”
સુરક્ષા જરૂરિયાતો અનુસાર, જો અક્ષાંશ અને રેખાંશ સ્થિતિમાં કોઈ ફેરફાર થાય તો કોઈપણ દુરુપયોગને રોકવા માટે ટર્મિનલ્સે સંચાર બંધ કરવો પડશે. સરકારને તેના જવાબોમાં, સ્ટારલિંકે કથિત રીતે એવી ઘોષણા કરી હતી કે તેના કોઈપણ રોકાણકારો ભારત સાથે જમીનની સરહદો વહેંચતા દેશોમાંથી નથી – મુખ્યત્વે ચીન અને પાકિસ્તાન. સરકારે તે ઘોષણા સ્વીકારી લીધી હતી.
સરકારનો સાવચેતીભર્યો અભિગમ સંભવિત સુરક્ષા જોખમો અંગેની ચિંતાઓથી પ્રેરિત છે, ખાસ કરીને સેટેલાઇટ સંચારના વ્યૂહાત્મક મહત્વને ધ્યાનમાં રાખીને. ડીઓટી એ સુનિશ્ચિત કરવામાં ખાસ કરીને રસ ધરાવે છે કે સરહદી વિસ્તારોની નજીકના સેટેલાઇટ ટર્મિનલ્સનું સુરક્ષિત રીતે નિરીક્ષણ અને નિયંત્રણ કરવામાં આવે જેથી અનધિકૃત ઍક્સેસ અથવા દુરુપયોગને અટકાવી શકાય.
ટેલિકોમ રેગ્યુલેટરી ઓથોરિટી ઓફ ઈન્ડિયા હાલમાં સેટેલાઇટ સ્પેક્ટ્રમ ફાળવવા માટે કિંમતો અને અન્ય નિયમો અને શરતો માટેની ભલામણો પર કામ કરી રહી છે. જો કે, પરંપરાગત ટેલિકોમ ઓપરેટરો જેમ કે ભારતી એરટેલ, રિલાયન્સ જિયો અને વોડાફોન આઇડિયા લેવલ પ્લેઇંગ ફિલ્ડની હિમાયત કરે છે, એવી દલીલ કરે છે કે સેટેલાઇટ કંપનીઓ ટેરેસ્ટ્રીયલ ઓપરેટરોની જેમ જ નિયમો અને જવાબદારીઓને આધીન હોવી જોઈએ.
