વૈશ્વિક પડકારો વચ્ચે પણ ભારત વિશ્વનું સૌથી ઝડપી વૃદ્ધિ પામતું અર્થતંત્ર બનશે
નાણાકીય વર્ષ 2023ના ભારતના આર્થિક વૃદ્ધિ અનુમાનને 6.1 ટકાથી ઘટાડીને 5.9 ટકા કરાયુ, સામે વિશ્વની આર્થિક વૃદ્ધિ માત્ર 2.8 ટકા
ઇન્ટરનેશનલ મોનેટરી ફંડ એ મંગળવારે નાણાકીય વર્ષ 2023-24 માટે ભારતના આર્થિક વૃદ્ધિ અનુમાનને 6.1 ટકાથી 20 બેસિસ પોઇન્ટ્સ ઘટાડીને 5.9 ટકા કર્યો છે. આઈએમએફનો આ અંદાજ અન્ય બહુપક્ષીય વિકાસ બેંકોની સરખામણીમાં સૌથી ઓછો છે. વિશ્વ બેંકે 2023-24 માટે ભારતીય અર્થવ્યવસ્થા 6.3 ટકા અને એશિયન ડેવલપમેન્ટ બેંકે 6.4 ટકાના દરે વૃદ્ધિ નોંધાવી છે.
આઈએમએફ આગાહી કરે છે કે વૈશ્વિક વૃદ્ધિ 2023 માં 2.8 ટકાના નીચા સ્તરે પહોંચશે તે પછીના વર્ષે સાધારણ રીતે 3 ટકા સુધી પહોંચશે. તે જ સમયે, ખરીદ શક્તિ સમાનતાના સંદર્ભમાં, માથાદીઠ ઉત્પાદનમાં ભારતની વૃદ્ધિ નાણાકીય વર્ષ 2023માં 5.8 ટકાથી ઘટીને નાણાકીય વર્ષ 2023-24માં 4.9 ટકા રહેવાનો અંદાજ છે.
તાજેતરના દ્વિવાર્ષિક વિશ્વ આર્થિક આઉટલુકમાં, આઈએમએફએ નાણાકીય વર્ષ 2023-24માં ભારતનો છૂટક ફુગાવો ઘટીને 4.9 ટકા રહેવાનો અંદાજ મૂક્યો હતો, જે અગાઉના નાણાકીય વર્ષમાં 6.7 ટકા હતો. ઉપરાંત, આઈએમએફએ ભારતની કરન્ટ એકાઉન્ટ ડેફિસિટના અંદાજને 2.6 ટકાથી ઘટાડીને જીડીપીના 2.2 ટકા કર્યો છે.
ઈન્ટરનેશનલ મોનેટરી ફંડના ટોચના અધિકારીએ જણાવ્યું હતું કે ભારતીય અર્થવ્યવસ્થા સારી રીતે કામ કરી રહી છે અને તે વિશ્વની સૌથી ઝડપથી વિકસતી અર્થવ્યવસ્થાઓમાંની એક છે અને ભારતીય અર્થતંત્ર આગામી વર્ષમાં પણ સારું પ્રદર્શન કરશે.આઈએમએફએ વધુમાં કહ્યું કે આર્થિક વૃદ્ધિ દરના અનુમાનમાં ઘટાડો થવા છતાં ભારત વિશ્વમાં સૌથી ઝડપથી વિકસતી અર્થવ્યવસ્થા બની રહેશે.
ક્યાં દેશનો કેટલો વૃદ્ધિ દર ?
- યુએસએ : ……… 1.6%
- જર્મની: ……… -0.1%
- ફ્રાન્સ: ……… 0.7%
- ઇટાલી: ……… 0.7%
- સ્પેન: ……… 1.5%
- જાપાન: ……… 1.3%
- યુકે : ……… -0.3%
- કેનેડા: ……… 1.5%
- ચીન: ……… 5.2%
- ભારત: ……… 5.9%
- રશિયા: ……… 0.7%
- બ્રાઝિલ: ……… 0.9%
- મેક્સિકો: ……… 1.8%
- કેએસએ: ……… 3.1%
- નાઇજીરીયા: ……… 3.2%
- આરએસએ: ……… 0.1%
