પાક.માંથી મેડિકલ ડિગ્રી લેવા વાળા કઈ સર્જરી શીખીને આવે છે?
ભારતે પાકિસ્તાનની મેડિકલ ડિગ્રી અમાન્ય જાહેર કરી: પાકિસ્તાન અભ્યાસ કરવા જવામાં મોટાભાગના કાશ્મીરના વિદ્યાર્થીઓ
પાકિસ્તાનમાં મેડિકલ ડિગ્રીના ઓઠા નીચે આતંકવાદનું નેટવર્ક ઉભું કરવાના કાવતરા સામે ભારત સજ્જ છે. જેને પગલે ભારતે પાકિસ્તાનની મેડિકલ ડિગ્રી અમાન્ય જાહેર કરી દીધી છે.
યુનિવર્સિટી ગ્રાન્ટ કમિશન અને ઓલ ઈન્ડિયા કાઉન્સિલ ફોર ટેકનિકલ એજ્યુકેશન એ તેમની નવી એડવાઈઝરીમાં ભારતીય વિદ્યાર્થીઓને ઉચ્ચ શિક્ષણ માટે પાકિસ્તાન ન જવાની સલાહ આપી છે. આ એડવાઈઝરી અનુસાર, પાકિસ્તાનમાંથી મેળવેલી કોઈપણ ડિગ્રી ભારતમાં માન્ય રહેશે નહીં અને આ ડિગ્રીને ભારતમાં નોકરી મેળવવા માટે લાયક ગણવામાં આવશે નહીં.
આ નિયમ તમામ ભારતીય નાગરિકો અને વિદેશમાં રહેતા ભારતીયોને લાગુ પડશે. ભારતીય નાગરિકતા મેળવવા માંગતા સ્થળાંતર કરનારા અને તેમના બાળકોને આ નિયમમાંથી શરતી મુક્તિ આપવામાં આવી છે. યુજીસી અને એઆઈસીટીઇ અનુસાર, સ્થળાંતર કરનારા અને તેમના બાળકો, જેમણે પાકિસ્તાનમાં ઉચ્ચ શિક્ષણ પૂર્ણ કર્યું છે અને તેમને ભારત દ્વારા નાગરિકતા આપવામાં આવી છે.
આવા વ્યક્તિઓ ગૃહ મંત્રાલયની સુરક્ષા મંજૂરી પછી ભારતમાં નોકરીની શોધ માટે પાત્ર બનશે.યુજીસી અને એઆઈસીટી દ્વારા લેવામાં આવેલા આ પગલા બાદ પાકિસ્તાને ભારતને આ મુદ્દે પોતાનું વલણ સ્પષ્ટ કરવા કહ્યું છે. પાકિસ્તાની વિદેશ મંત્રાલય દ્વારા જારી કરવામાં આવેલા નિવેદનમાં કહેવામાં આવ્યું છે કે અમે આ જાહેર માહિતીને લઈને ભારત સરકાર પાસેથી સ્પષ્ટતા માંગી છે.
સરકાર દ્વારા પાકિસ્તાન માંથી મેળવેલી ડિગ્રીઓની માન્યતા રદ કરવાની અસર મુખ્યત્વે કાશ્મીરી વિદ્યાર્થીઓને પડશે. વાસ્તવમાં, પાકિસ્તાનમાં ભારતના મોટાભાગના વિદ્યાર્થીઓ કાશ્મીરના છે. પાકિસ્તાન માં ભારતીય વિદ્યાર્થીઓની ચોક્કસ સંખ્યા સત્તાવાર રીતે જાણી શકાઇ નથી.પાકિસ્તાનમાં અભ્યાસ કરતા કાશ્મીરી વિદ્યાર્થીઓની સંખ્યા 200 થી 1000ની વચ્ચે હોવાનો અંદાજ છે.
એક મીડિયા રિપોર્ટ અનુસાર, 2020 માં, ભારતના 200 થી વધુ વિદ્યાર્થીઓ પાકિસ્તાનમાં અભ્યાસ કરી રહ્યા હતા, જેમાંથી મોટાભાગના જમ્મુ અને કાશ્મીરના હતા. એક રિપોર્ટ અનુસાર, જમ્મુ અને કાશ્મીર ટુડન્ટ એસોસિએશનના ફાઉન્ડર પ્રેસિડેન્ટ નાસિર ખોમેની અનુસાર, પાકિસ્તાનમાં 1000 કાશ્મીરી વિદ્યાર્થીઓ છે. અહેવાલો અનુસાર, કાશ્મીરના મોટાભાગના વિદ્યાર્થીઓ મેડિસિન અને એન્જિનિયરિંગનો અભ્યાસ કરવા માટે પાકિસ્તાન જાય છે.
કાશ્મીરી વિદ્યાર્થીઓને મેડિકલમાં પ્રવેશ આપી પાકિસ્તાનમાં કટ્ટરવાદનું ઝેર ફેલાવતું હોવાની ભીતિ
જમ્મુ-કાશ્મીરના મોટાભાગના વિદ્યાર્થીઓ અભ્યાસ માટે પાકિસ્તાન જાય છે. પાકિસ્તાને તેનો એજન્ડા ચલાવવા માટે પણ તેનો ઉપયોગ કર્યો છે. 2020 માં, પાકિસ્તાને તેની કોલેજોમાં કાશ્મીરી વિદ્યાર્થીઓ માટે 1600 શિષ્યવૃત્તિ ઓફર કરી. ત્યારે સુરક્ષા એજન્સીઓને ડર હતો કે પાકિસ્તાનમાં ભારતીય વિદ્યાર્થીઓ સરળતાથી કટ્ટરપંથી બની જશે. પીઓકે કોલેજોમાં કાશ્મીરી વિદ્યાર્થીઓ માટે તેમજ પાકિસ્તાની કોલેજોમાં કેટલીક બેઠકો માટે 6% અનામત છે. ગયા વર્ષે ડિસેમ્બરમાં જમ્મુ-કાશ્મીર પોલીસે પાકિસ્તાનમાં પ્રવેશના નામે કાશ્મીરમાં અલગતાવાદીઓ દ્વારા ચલાવવામાં આવતા રેકેટનો પર્દાફાશ કર્યો હતો. પોલીસના જણાવ્યા અનુસાર, કાશ્મીરના અલગતાવાદીઓએ કાશ્મીરી વિદ્યાર્થીઓને પાકિસ્તાનમાં એમબીબીએસની સીટો વેચી હતી અને તેમની પાસેથી મેળવેલા પૈસા ખીણમાં અશાંતિ ફેલાવવા માટે આતંકવાદીઓને આપ્યા હતા.
