ભારતના રશિયા સાથે જુના સબંધ, રશિયાની સામે પડવું ઉચિત નહિ
ભારત અને ચીને સંયુક્ત રાષ્ટ્ર સુરક્ષા પરિષદમાં યુક્રેન પર રશિયાના આક્રમણની નિંદા કરી છે. પરંતુ તેમણે સુરક્ષા પરિષદમાં મતદાન કરવાનું ટાળ્યું છે. યુક્રેન પર રશિયન આક્રમણની નિંદા કરતા ઠરાવ પર મતદાન કરવા માટે યુએનએસસીનું કટોકટી સત્ર ચાલી રહ્યું છે. જેમાં ચીન અને ભારત બંનેએ મતદાન કરવાનું ટાળ્યું છે. યુક્રેન પર યુએનએસસીની બેઠકમાં, યુએનમાં ભારતના સ્થાયી પ્રતિનિધિ ટીએસ તિરુમૂર્તિએ કહ્યું, “યુક્રેનની હાલતથી ભારત ખૂબ જ વ્યથિત છે. અમે વિનંતી કરીએ છીએ કે હિંસા અને દુશ્મનાવટનો તાત્કાલિક અંત લાવવાના તમામ પ્રયાસો કરવામાં આવે. માનવ જીવનની કિંમત પર ક્યારેય કોઈ ઉકેલ શોધી શકાતો નથી.
ટીએસ તિરુમૂર્તિએ વધુમાં કહ્યું હતું કે, દુ:ખની વાત છે કે કૂટનીતિનો માર્ગ છોડી દેવામાં આવ્યો. આપણે તેના પર પાછા ફરવું પડશે. ટીએસ તિરુમૂર્તિએ એમ પણ કહ્યું હતું કે તમામ સભ્ય દેશોએ રચનાત્મક રીતે આગળ વધવા માટે આ સિદ્ધાંતોનું સન્માન કરવાની જરૂર છે. મતભેદો અને વિવાદોને ઉકેલવા માટે સંવાદ એ એકમાત્ર ઉકેલ છે, આ ક્ષણે તે ભલે ગમે તેટલું મુશ્કેલ લાગે.
સાથે જ ચીને પણ યુક્રેન પર હુમલાની નિંદા કરી છે. સંયુક્ત રાષ્ટ્રમાં ચીનના સ્થાયી પ્રતિનિધિ ઝાંગ જુને કહ્યું, “અમે માનીએ છીએ કે તમામ રાજ્યોની સાર્વભૌમત્વ અને પ્રાદેશિક અખંડિતતાનું સન્માન કરવું જોઈએ અને સંયુક્ત રાષ્ટ્ર ચાર્ટરના ઉદ્દેશ્યો અને સિદ્ધાંતોનું સમર્થન કરવું જોઈએ.” એક દેશની સુરક્ષા અન્ય દેશોની સુરક્ષાને નબળી પાડવાની કિંમતે કરી શકાતી નથી. તેથી ચીન આ મતનો ભાગ નથી.
