શાંઘાઈ કોઓપરેશન ઓર્ગેનાઈઝેશનની ગોવા ખાતેની વિદેશ મંત્રીઓની બેઠકમાં ભારતના એસ. જયશંકર અને ચીનના કિન ગેંગ વચ્ચે સફળ મંત્રણા
ગોવામાં એસસીઓની વિદેશ મંત્રીઓની બેઠકમાં ભારતના એસ. જયશંકર અને ચીનના કિન ગેંગ વચ્ચે મહત્વપૂર્ણ મંત્રણા કરવામાં આવી હતી. સરહદી તણાવ મુદ્દે બન્ને નેતાઓ વાતચિત કરી હતી. જેને પગલે હવે સરહદી તણાવ ઘટે તેવી શક્યતાઓ સેવાઇ રહી છે.
ચીનના વિદેશ મંત્રી કિન ગેંગ શાંઘાઈ કોઓપરેશન ઓર્ગેનાઈઝેશનની વિદેશ મંત્રીઓની બેઠકમાં ભાગ લેવા માટે ગોવા આવ્યા છે. દરમિયાન, વિદેશ પ્રધાન ડૉ. એસ. જયશંકર ગુરુવારે તેમના ચીની સમકક્ષ કિન ગેંગને મળ્યા હતા. અહીં કિને બંને પક્ષો વચ્ચે શાંતિ સ્થાપવાનો આગ્રહ કર્યો છે. ગેંગે કહ્યું કે ભારત-ચીન સરહદ પર સ્થિતિ હજુ પણ સ્થિર છે. તેને જાળવી રાખવા માટે બંને પક્ષોએ જોરશોરથી કામ કરવું જોઈએ.
ગુરુવારે ગોવાના બેનૌલિમમાં એસસીઓના વિદેશ મંત્રીઓની બેઠક દરમિયાન વિદેશ મંત્રી એસ. જયશંકર સાથેની વાતચીતમાં કિને કહ્યું કે ચીન-ભારત સરહદ પર વર્તમાન સ્થિતિ સ્થિર છે. બંને દેશોના નેતાઓ વચ્ચે થયેલ મહત્વની સમજૂતીનો અમલ થતો રહેવો જોઈએ.જોકે પૂર્વ લદ્દાખમાં ચાલી રહેલી સૈન્ય ગતિરોધ અંગે કહ્યું કે તેના કારણે અમારા સંબંધો સુધરી રહ્યા નથી.
શુક્રવારના રોજ જારી કરાયેલ કિન-જયશંકર વાટાઘાટો પર એક પ્રેસ રિલીઝ અનુસાર, કિને કહ્યું કે હાલની સિદ્ધિઓને એકીકૃત કરવા પર વાતચીત થવી જોઈએ. તે જ સમયે, સંબંધિત કરારોનું સખતપણે પાલન કરવું જોઈએ. એટલું જ નહીં, સરહદની સ્થિતિ પર શાંતિ જાળવવા પર ભાર મૂકવો જોઈએ.
મંત્રણા પછી એક ટ્વીટમાં જયશંકરે કહ્યું કે અમારું ધ્યાન બાકી રહેલા મુદ્દાઓને ઉકેલવા અને સરહદ પર શાંતિ સુનિશ્ચિત કરવા પર છે. તેમણે કહ્યું કે ચીનના સ્ટેટ કાઉન્સિલર અને વિદેશ મંત્રી કિન ગેંગ સાથે અમારા દ્વિપક્ષીય સંબંધો પર વિગતવાર ચર્ચા કરવામાં આવી હતી. આ સાથે એસસીઓ, જી20, અને બ્રિક્સ સંબંધિત મુદ્દાઓ પર પણ ચર્ચા કરવામાં આવી હતી.
કિન ગેંગે કહ્યું કે ચીન સફળ એસસીઓ સમિટની યજમાનીમાં ભારતનું સમર્થન કરે છે અને આશા છે કે ભારત સમિટની સફળતા માટે સકારાત્મક ભૂમિકા ભજવશે.
છેલ્લા બે મહિનામાં જયશંકર અને ગેંગ વચ્ચે આ બીજી મુલાકાત છે. ચીનના વિદેશ મંત્રી પણ માર્ચમાં યોજાયેલી જી20 વિદેશ મંત્રીઓની બેઠકમાં ભાગ લેવા આવ્યા હતા. ભારતે ગયા અઠવાડિયે એસસીઓ સંરક્ષણ મંત્રી સ્તરની બેઠકનું આયોજન કર્યું હતું. ભારત, રશિયા, ચીન અને શાંઘાઈ કોઓપરેશન ઓર્ગેનાઈઝેશનના અન્ય સભ્ય દેશોએ શુક્રવારે આ બેઠકમાં પ્રાદેશિક સુરક્ષા પડકારો અને સંબંધિત મુદ્દાઓ પર ચર્ચા કરી.
ભારત સાથે સંબંધોને મજબૂત બનાવવા ચીન તૈયાર : ચીનના વિદેશ મંત્રી
કિને કહ્યું કે ચીન અને ભારત વિશ્વના બે સૌથી વધુ વસ્તી ધરાવતા વિકાસશીલ દેશો તરીકે ઉભરી આવ્યા છે. તેમણે કહ્યું કે આપણે ઈતિહાસમાંથી બોધપાઠ લેવો જોઈએ, વ્યૂહાત્મક અને લાંબા ગાળાના પરિપ્રેક્ષ્યથી દ્વિપક્ષીય સંબંધોનો સંપર્ક કરવો જોઈએ, આદર કરવો જોઈએ, એકબીજા પાસેથી શીખવું જોઈએ અને સિદ્ધિઓ કરવી જોઈએ અને સુમેળભર્યું સહઅસ્તિત્વ, શાંતિપૂર્ણ વિકાસ અને નવી દુનિયામાં સામાન્ય કાયાકલ્પ કરવો જોઈએ. તેમણે કહ્યું કે ચીન દ્વિપક્ષીય પરામર્શ અને આદાનપ્રદાન કરવા, બહુપક્ષીય માળખામાં સંવાદ અને સહયોગ વધારવા, આંતરરાષ્ટ્રીય અને પ્રાદેશિક મુદ્દાઓ પર સંકલન અને સહયોગને વધુ ગાઢ બનાવવા અને ચીન-ભારત સંબંધોને મજબૂત કરવા માટે ભારત સાથે કામ કરવા તૈયાર છે.
