- જેટી પર વહાણ લાંગરવા બાબતે ચકમક ઝર્યા બાદ યશવંત નામના શખ્સે કુહાડી વડે કર્યો હુમલો
અમરેલી જિલ્લાના જાફરાબાદમાં વહાણ લાંગરવાને લઈને બબાલ થયા બાદ ધારાસભ્ય હીરા સોલંકીના જમાઈ ચેતન શિયાળ પર હુમલો થતાં તેમને માથાના ભાગે ગંભીર ઇજા પહોંચી છે. તેમને તત્કાળ સારવાર માટે ભાવનગર ખાતે ખસેડવામાં આવ્યા છે. યશવંત નામના શખ્સે કુહાડી વડે હુમલો કરતા ચેતન શિયાળને ગંભીર ઈજાઓ પહોંચી હતી.
અમરેલી જિલ્લાના જાફરાબાદના દરિયા કાંઠે ધારાસભ્ય હીરા સોંલકીના વેવાઈ ને તેમની જ્ઞાતિના યુવક સાથે બોટ લાંગરવાની જેટી પર બોટ રાખવા બાબતે ચકમક ઝરી હતી. જે અંગે ધારાસભ્યના વેવાઈ દ્વારા પોતાના દીકરા ચેતન શિયાળ જે ધારાસભ્ય હીરા સોલંકીના જમાઈ છે અને અમરેલી જિલ્લા યુવા ભાજપના પ્રમુખ છે તે જાફરાબાદ બંદર ચોક પાસે આવેલ જેટી એ પહોચ્યા હતા. ચેતન શિયાળે રિવોલ્વર કાઢી હતી ત્યારે સામે જૂથના યુવક દ્વારા ચેતન શિયાળને માથાના ભાગે મચ્છી કાપવાની કુહાડી મારી દીધી હોવાની પ્રાથમિક માહિતીઓ પ્રાપ્ત થઈ રહી છે.
બોટ કિનારે રાખવા બાબતે રાત્રે ઘટેલી ઘટનાથી પોલીસ તંત્રમાં દોડધામ મચી ગઇ હતી. સામે જૂથના યશવંત નામના યુવાનને હાથના ભાગે આંગળી નજીક રિવોલ્વર માંથી છૂટેલી ગોળી વાગી હોવાની વિગતો મળી રહી છે. અમરેલી જિલ્લા યુવા ભાજપના પ્રમુખ અને ધારાસભ્ય હીરા સોલંકીના જમાઈ ચેતન શિયાળને માથાના ભાગે ગંભીર ઈજા થતાં પ્રથમ રાજુલા બાદ તાત્કાલિક ભાવનગર સારવાર માં ખસેડાયા હોવાની વિગતો મળી રહી છે.
પ્રાપ્ત માહિતી મુજબ જાફરાબાદ જેટી પર વહાણ લાંગરવાને લઈને બે જૂથ વચ્ચે ઘર્ષણ થયું હતું જેમાં ધારાસભ્ય હીરા સોલંકીના જમાઈ ચેતન શિયાળે રિવોલ્વર કાઢી હતી. ચેતન શિયાળનો રિવોલ્વર સાથેનો વીડિયો પણ સામે આવ્યો છે. ચેતન શિયાળે રિવોલ્વર કાઢતા સામે પક્ષેથી હુમલો થયો હતો. યશવંત નામના માછીમારે ચેતન શિયાળ પર કુહાડીથી હુમલો કરતાં ચેતન શિયાળને માથાના ભાગે ગંભીર ઈજા પહોંચી હતી અને માછીમાર યશવંતને પણ આંગળીના ભાગે ગોળી વાગી હતી. ચેતન શિયાળને તત્કાળ સારવાર માટે ભાવનગર લઈ જવાયા છે.
ઉલ્લેખનિય છે કે ચેતન શિયાળ અમરેલી જિલ્લા યુવા ભાજપ પ્રમુખ પણ છે. જેટી પર વહાણ રાખવાને લઈને બંને પક્ષે માથાકૂટ થયા બાદ આ બનાવ બન્યો હતો.
કાયદો કાયદાની રીતે કામ કરશે : હીરા સોલંકી
આ સમગ્ર મામલે ધારાસભ્ય હીરા સોલંકીએ જણાવ્યું હતું કે, ચેતન શિયાળ પર જીવલેણ હુમલો થયો છે. અત્યારે અમે એમને ભાવનગર લઇને આવ્યા છે. આ બધી બાબત એસપી અને જાફરાબાદ પીઆઇના ધ્યાને મૂકી છે. કાયદો કાયદાની રીતે કામ કરશે. આવા તત્વોને સરકાર હંમેશા ગંભીરતાથી લેતી હોય છે. અગાઉ પણ બે-ચાર લોકો પર આવા જીવલેણ હુમલા કર્યા છે, જે પોલીસના ધ્યાને મૂક્યું છે.
સમર્થકોના ટોળા દોડી આવ્યા : જાફરાબાદ શહેરમાં ચુસ્ત પોલીસ બંદોબસ્ત ગોઠવાયો
ચેતન શિયાળ ઉપર હુમલા સમયનો વીડિયો વાયરલ થયો છે. ચેતન શિયાળને ગંભીર ઈજાઓ થતા ભાવનગર હોસ્પિટલ ખસેડાયા છે. ચેતન શિયાળ તેમજ એક અન્ય યુવાન પણ ઇજાગ્રસ્ત થયો છે. ઘટનાને પગલે ધારાસભ્ય હીરા સોલંકી સહિત સમર્થકો હોસ્પિટલ દોડી આવ્યા હતા. જ્યારે જાફરાબાદ શહેરમાં પોલીસ બંદોબસ્ત ગોઠવાયો છે.B V
