તોશાખાન કેસમાં પોલીસ પકડથી દૂર રહેવાના પૂર્વ વડાપ્રધાનના પ્રયાસો, પોલીસને રોકવા સમર્થકોની ફોજ ખડકી દીધી
તોશાખાન કેસમાં ઈસ્લામાબાદ હાઈકોર્ટ દ્વારા ધરપકડ વોરંટ જારી કરવા છતાં પોલીસ રવિવારે ઈમરાન ખાનની ધરપકડ કરી શકી નથી. ઘણા કલાકો સુધી નાટક ચાલ્યું. આ દરમિયાન કહેવામાં આવ્યું હતું કે ઈમરાન ઘરે હાજર નથી. આમ ઇમરાન નાસી છુટ્યો હતો. બાદમાં ખાનના સ્ટાફે કોર્ટની નોટિસ સ્વીકારી હતી.
ધરપકડથી બચવા માટે ઈમરાન ખાને લાહોરમાં પોતાના ઘર જમાન પાર્કની બહાર પોતાના સમર્થકોને ભેગા કર્યા હતા. ચાર રસ્તા જમાન તરફ દોરી જાય છે અને ચારેય રસ્તા પર લાકડીઓ અને સળિયા સાથે તેના સમર્થકો હાજર હતા. આમાં મહિલાઓનો પણ સમાવેશ થાય છે. ત્યાં આ લોકોને ભોજન અને પાણી બધું આપવામાં આવ્યું હતું.
ઈમરાને તાજેતરમાં જ જેલ ભરો આંદોલન શરૂ કર્યું હતું. તેમની પાર્ટીના ઘણા નેતાઓ જેલમાં છે. ખાસ વાત એ છે કે ઈમરાન પોતે જેલમાં જવાનું ટાળી રહ્યો છે. આ માટે તેણે તમામ પ્રકારની તૈયારીઓ શરૂ કરી દીધી છે.
ઇમરાનના ભાષણ ઉપર પ્રતિબંધ!
ઈમરાન ખાન ધરપકડથી બચી ગયો પરંતુ શહેબાઝ શરીફ સરકારે વધુ એક પગલું ભરીને તેમની મુશ્કેલીઓ વધારી દીધી છે. પાકિસ્તાનની શાહબાઝ શરીફ સરકારે ઈમરાન ખાનના ભાષણો પર પ્રતિબંધ મૂક્યો છે. ઈમરાન ખાનના લાઈવ કે રેકોર્ડેડ નિવેદન પર પણ પ્રતિબંધ મુકવામાં આવ્યો છે. મીડિયા ઓથોરિટીએ આ અંગે આદેશ જારી કર્યો છે. ઈમરાન ખાન પર ભડકાઉ નિવેદનો આપવાનો આરોપ છે. પાકિસ્તાન ઈલેક્ટ્રોનિક મીડિયા કંટ્રોલ ઓથોરિટી એ કહ્યું કે ઈમરાન ખાને પોતાના ભાષણોમાં અધિકારીઓ અને સરકારી સંસ્થાઓ વિરુદ્ધ ઉશ્કેરણીજનક નિવેદનો કર્યા, પાયાવિહોણા આરોપો લગાવ્યા અને નફરત ફેલાવી.
ઈમરાનને કાલે ઈસ્લામાબાદ કોર્ટમાં રજૂ થવું પડશે
અગાઉ ઈમરાનની ધરપકડ કરવા ગયેલી પોલીસે કહ્યું હતું કે તેની ધરપકડ કરવાનો હેતુ તેને જેલમાં નાખવાનો નથી. જો આ કરવાનું હતું તો કોઈ બળ તેને રોકી શકે નહીં. અમે ઈમરાનને બિલકુલ મળ્યા નથી. અમે ઈમરાન વતી પૂર્વ વિદેશ મંત્રી શાહ મહેમૂદ કુરેશીને 7 માર્ચે કોર્ટમાં હાજર રહેવા નોટિસ આપી છે. ઈસ્લામાબાદ પોલીસે પણ ટ્વીટ કર્યું હતું કે ઈમરાન ધરપકડથી બચવાનો પૂરો પ્રયાસ કરી રહ્યો છે.
