જો ફરિયાદમાંથી હત્યાની કોશિશની કલમ હટશે તો આમરણાંત ઉપવાસ પર ઉતરીશ: જયંતિ સરધારા

• વડાપ્રધાન, ગૃહમંત્રી, સુપ્રીમ કોર્ટને લેખિત અરજી કરતા સરધારા

સરદારધામના ઉપપ્રમુખ જયંતિ સરધારા પર ગત સપ્તાહે પીઆઈ સંજય પાદરિયાએ જીવલેણ હુમલો કર્યાનો બનાવ સામે આવ્યો હતો. જે મામલામાં પોલીસે પહેલા બીએનએસની કલમ 109(હત્યાની કોશિશ) હેઠળ પીઆઈ પાદરીયા વિરુદ્ધ ગુનો નોંધ્યો હતો પણ પાછળથી પોલીસે કલમ 109 હટાવી લેવા કોર્ટ સમક્ષ લેખિત રજુઆત કરી હતી. જેની સામે જયંતિ સરધારાએ વડાપ્રધાન, ગૃહમંત્રી, સુપ્રીમ કોર્ટને લેખિત અરજી કરી આ મામલે યોગ્ય કરવા ગુહાર લગાવી છે. ઉલ્લેખનીય બાબત છે કે, જયંતિ સરધારાએ જણાવ્યું છે કે, મને ન્યાયતંત્ર પર સંપૂર્ણ ભરોશો છે પરંતુ જો કલમ 109 હટાવી લેવામાં આવશે તો હું આમરણાંત ઉપવાસ પર ઉતરી જઈશ.

જયંતિ સરધારા પર થયેલા હુમલાની ઘટનામાં અગાઉ તાલુકા પોલીસ મથકમાં બીએનએસની કલમ 109(હત્યાની કોશિશ) હેઠળ પીઆઈ સંજય પાદરીયા વિરુદ્ધ ગુનો નોંધવામાં આવ્યો હતો. તું સરદારધામમાંથી રાજીનામુ આપી દે નહીંતર તને પતાવી દેવાનો છે, નરેશભાઈ પટેલે મને તારો હવાલો આપ્યો છે તેમ કહી પાદરીયાએ રિવોલ્વર વડે હુમલો કર્યાનું જયંતિ સરધારાએ આક્ષેપ કર્યો હતો. ત્યારે આ મામલામાં નવો વળાંક આવ્યો હતો.

મામલામાં ડીસીપી ઝોન-2 જગદીશ બંગરવાના જણાવ્યા અનુસાર પોલીસે સાહેદોના નિવેદન, સીસીટીવી ફૂટેજ અને મેડિકલ રિપોર્ટ સહિતના પુરાવા ધ્યાને લેતા હુમલો જીવલેણ નહિ હોવાનું સપાટી પર આવ્યું હતું. જેથી જયંતિ સરધારાની ફરિયાદમાં ઉમેરવામાં આવેલી બીએનએસની કલમ 109 રદ્દ કરવા અને નાકમાં ફ્રેક્ચર સહીતની ઇજા હોવાથી કલમ 117(2)નો ઉમેરો કરવા અદાલતને લેખિત અરજી કરવામાં આવી છે. વધુમાં બંગરવાના જણાવ્યા અનુસાર પોલીસની તપાસમાં એવુ સામે આવ્યું છે કે, ટ્રેનિંગ એકેડમીમાંથી પીઆઈ પાદરીયાને કોઈ હથિયાર ઇસ્યુ જ કરવામાં આવ્યું નથી તેમજ સીસીટીવી સહિતના પુરાવા પરથી એવુ સ્પષ્ટ થઇ રહ્યું છે કે, પાદરીયાના હાથમા કોઈ જ હથિયાર હુમલા સમયે હાજર ન હતું.

ત્યારે હવે ફરિયાદમાંથી કલમ 109 હટાવી લેવા મામલે જયંતિ સરધારાએ વડાપ્રધાન, ગૃહમંત્રી, સુપ્રીમ કોર્ટ, ગુજરાત હાઇકોર્ટ, રાજકોટ ડિસ્ટ્રિક્ટ એન્ડ સેશન્સ કોર્ટ, રાજ્ય પોલીસવડા, રાજ્યના મુખ્યમંત્રી – ગૃહમંત્રી તેમજ હાઇકોર્ટના રજીસ્ટ્રાર સહીતનાને લેખિત રજુઆત કરવામાં આવી છે. જયંતિ સરધારાએ કરેલી રજુઆતમાં જણાવ્યું છે કે, રાજકોટ પોલીસ દ્વારા લેવાયેલા પગલાંમાં તાત્કાલિક હસ્તક્ષેપની જરૂરિયાત છે. 26 નવેમ્બરના રોજ રાજકોટના તાલુકા પોલીસ મથકમાં પીઆઈ સંજય પાદરીયા વિરુદ્ધ ગુનો દાખલ કરવામાં આવ્યો હતો. લોકોની રક્ષા કરવાને બદલે પીઆઈ પાદરીયાએ મારી ઉપર હુમલો કરતા ફક્ત મારા જીવને જોખમ જ નહિ પણ સમગ્ર રાજ્યમાં ભયનો માહોલ સર્જાયો છે.

સરધારાએ અરજીમાં વધુમાં જણાવ્યું છે કે, પીઆઈ પાદરીયાની ધરપકડ કરવાના બદલે ક્યાંક કાચુ કાપતી હોય તેવું ચિત્ર ઉપસી આવ્યું છે. ત્યારે આ બાબતના લીધે લોકોનો કાયદો અને વ્યવસ્થાની સ્થિતિ પરનો વિશ્વાસ ડગમગી રહ્યો છે. ત્યારે મારી ત્રણ જેટલી માંગણીઓ આપની સમક્ષ મૂકી રહ્યો છે. જયંતિ સરધારાએ તાત્કાલિક પીઆઈ પાદરીયાની ધરપકડ કરવામાં આવે, હુમલાની ઘટનામાં નિષ્પક્ષ તપાસ કરવામાં આવે અને લોકોનો પોલીસમાં વિશ્વાસ વધે તેના માટે જરૂરી પગલાં લેવા આદેશ આપવામાં આવે તેવી માંગણી કરવામાં આવી છે.

વધુમાં જયંતિ સરધારાએ જણાવ્યું છે કે, મને દેશના ટોચના નેતાઓ અને સુપ્રીમ કોર્ટ સહીતની ન્યાયિક સંસ્થાઓ પર સંપૂર્ણ ભરોસો છે. તેમ છતાં જો ફરિયાદમાંથી કલમ 109 હટાવી લેવામાં આવશે તો હું આમરણાંત કરીશ.

ખોડલધામ અને સરદારધામ માટે અડધી રાત્રે હાજર: સરધારા

જયંતિ સરધારાએ જણાવ્યું છે કે, ખોડલધામ અને સરદારધામ બંને પાટીદાર સમાજની સંસ્થાઓ છે. સમાજના કામ કરતી સંસ્થાઓ માટે હું અડધી રાત્રે પણ હાજર રહીશ. સમાજના કામમાં હું સદૈવ હાજર રહ્યો છું અને ભવિષ્યમાં પણ હાજર રહીશ. ખોડલધામ અને સરદારધામ માટે હું હંમેશા હાજરાહજુર છું અને રહીશ.

પીઆઈ પાદરીયા સાથે આજે પણ નહિ અને કાલે પણ સમાધાન નહિ

જયંતિ સરધારાએ અબતક સાથેની વાતચીતમાં જણાવ્યું છે કે, મારી ઉપર પીઆઈ પાદરીયા દ્વારા જે જીવલેણ હુમલો કરવામાં આવ્યો છે તેનાથી મારા જીવને જોખમ ઉભું થયું છે. ત્યારે હવે પીઆઈ પાદરીયા સાથે સમાધાન કરવાની કોઈ વાત આવતી નથી. પાદરીયા સાથે આજે પણ નહિ અને કાલે પણ સમાધાન કરીશ નહિ. આ મામલામાં હું પુરેપુરી લડત આપીશ તેવું સરધારાએ ઉમેર્યું છે.