અલગ થયેલા પત્ની અને બાળકોને ભરણ પોષણ ચૂકવવાની જવાબદારીમાંથી પતિ છટકી ન શકે તેવું જણાવી સુપ્રીમે આપ્યો મહત્વનો ચુકાદો
સુપ્રીમ કોર્ટે ભરણપોષણને લઈને મહત્વનો અને દૂરગામી નિર્ણય આપ્યો છે. કોર્ટે કહ્યું કે જો પતિ શારીરિક રીતે સક્ષમ છે તો તેણે પોતાની વિખૂટા પડી ગયેલી પત્ની અને સગીર બાળકોના ભરણપોષણ માટે મજૂર તરીકે કામ કરીને પૈસા પણ કમાવવા પડશે. સુપ્રીમ કોર્ટે પોતાના નિર્ણયમાં કહ્યું હતું કે સીઆરપીસીની કલમ 125 હેઠળની જોગવાઈ સામાજિક ન્યાય માટે છે, જેને ખાસ કરીને મહિલાઓ અને બાળકોની સુરક્ષા માટે કાયદાનું સ્વરૂપ આપવામાં આવ્યું છે. આવી સ્થિતિમાં પતિ પોતાની જવાબદારીઓથીમોં ફેરવી શકતો નથી.
સુપ્રિમ કોર્ટે પતિની એ દલીલને ફગાવી દીધી હતી કે તે તેની પત્ની અને સગીર બાળકો માટે ભરણપોષણ ચૂકવી શકતો નથી કારણ કે વ્યવસાય બંધ થવાને કારણે તેની પાસે આવકનો કોઈ સ્ત્રોત નથી. જસ્ટિસ દિનેશ મહેશ્વરી અને જસ્ટિસ બેલા એમ ત્રિવેદીની ખંડપીઠે કહ્યું કે પ્રતિવાદી (પતિ) શારીરિક રીતે સક્ષમ છે, તેથી તેણે વ્યાજબી રીતે પૈસા કમાઈને પત્ની અને બાળકોનું ભરણપોષણ કરવું પડશે. ખંડપીઠે જણાવ્યું હતું કે ફેમિલી કોર્ટ સમક્ષ પત્ની દ્વારા આપવામાં આવેલા પુરાવા અને રેકોર્ડ પર ઉપલબ્ધ પુરાવાને ધ્યાનમાં રાખીને, કોર્ટને સ્વીકારવામાં કોઈ ખચકાટ નથી કે પ્રતિવાદી પાસે આવકનો પૂરતો સ્ત્રોત છે. આ હોવા છતાં, તે ફરિયાદીને ભરણપોષણ ચૂકવવામાં નિષ્ફળ ગયો અને તેની અવગણના કરી.
સુપ્રીમ કોર્ટે પંજાબ અને હરિયાણા હાઈકોર્ટના ફેમિલી કોર્ટના નિર્ણયને યથાવત રાખવાના નિર્ણયને પણ ફગાવી દીધો હતો. ઉલ્લેખનીય છે કે પીડિતાએ વર્ષ 2010માં જ તેના પતિનું ઘર છોડી દીધું હતું. તે તેના બાળકો સાથે અલગ રહેતી હતી. હવે સુપ્રીમ કોર્ટે પતિને પત્નીને 10 હજાર રૂપિયા અને સગીર બાળકોને 6 હજાર રૂપિયા ભરણપોષણ તરીકે આપવાનો આદેશ આપ્યો છે.
ભરણપોષણની માંગ ફગાવી દેનાર ફેમિલી કોર્ટની સુપ્રીમે ઝાટકણી કાઢી
સુપ્રિમ કોર્ટે પત્નીની ભરણપોષણની માંગને ફગાવી દેવા બદલ ફેમિલી કોર્ટની પણ ઝાટકણી કાઢી હતી. સર્વોચ્ચ અદાલતની બેન્ચે કહ્યું કે ફેમિલી કોર્ટ વસ્તુઓ જોવા અને કારણો સમજવામાં નિષ્ફળ રહી છે. તે જ સમયે, કોર્ટે કહ્યું કે સીઆરપીસીની કલમ 125નો ઉદ્દેશ્ય તે મહિલાઓને આર્થિક મદદ પૂરી પાડવાનો છે જેઓ તેમના સાસરિયાં છોડીને અલગ રહે છે, કોર્ટે કહ્યું કે પતિએ પણ મજૂરી કરીને પૈસા કમાવવા પડશે, જેથી જીવતી પત્ની અને બાળકોને આર્થિક મદદ કરી શકાય. જો પતિ શારીરિક રીતે સક્ષમ હોય તો તે આ ફરજ બજાવવાની ના પાડી શકે નહીં.
