- આતંકવાદીઓએ રાજૌરીમાં આર્મી કેમ્પ પર કર્યો હુમલો: જવાન ગંભીર
જમ્મુ-કાશ્મીરમાં ફરી એકવાર આતંકીઓએ આર્મી કેમ્પને નિશાન બનાવ્યું છે. આતંકવાદીઓએ રાજૌરીમાં આર્મી કેમ્પ પર હુમલો કર્યો હતો જેને સુરક્ષા દળોએ નિષ્ફળ બનાવ્યો હતો. આતંકી હુમલામાં સેનાનો એક જવાન ગંભીર રીતે ઘાયલ થયો છે. આતંકવાદીઓએ રાજૌરીના એક દૂરના ગામમાં સ્થિત આર્મી કેમ્પને નિશાન બનાવીને ભારે ગોળીબાર કર્યો હતો.
સુરક્ષા દળોએ ચાર્જ સંભાળ્યો અને જવાબી કાર્યવાહી કરીને હુમલાને નિષ્ફળ બનાવ્યો. આ પછી, સુરક્ષા દળોએ સમગ્ર વિસ્તારને કોર્ડન કરી લીધો છે અને મોટા પાયે સર્ચ ઓપરેશન ચલાવવામાં આવી રહ્યું છે અને આતંકવાદીઓની શોધ કરવામાં આવી રહી છે. હજુ સુધી એ જાણી શકાયું નથી કે ત્યાં કેટલા આતંકવાદીઓ હતા. ગંભીર રીતે ઘાયલ સૈનિકને હોસ્પિટલમાં દાખલ કરવામાં આવ્યો છે.
સવારે લગભગ 3.30 વાગ્યે, આતંકવાદીઓએ રાજૌરી જિલ્લાના દૂરના બુધલ વિસ્તારના ગુંડા ગામમાં સ્થિત આર્મી કેમ્પ પર ભારે ગોળીબાર શરૂ કર્યો. આ કેમ્પ તાજેતરમાં બનાવવામાં આવ્યો છે. સતર્ક સેનાના જવાનોએ જવાબી કાર્યવાહી કરીને સંભવિત મોટા આતંકવાદી હુમલાને નિષ્ફળ બનાવ્યો હતો. આ દરમિયાન એક નાનું એન્કાઉન્ટર થયું. જોકે, આતંકીઓ ભાગવામાં સફળ રહ્યા હતા. આ વિસ્તારમાં મોટા પાયે સર્ચ ઓપરેશન ચલાવવામાં આવી રહ્યું છે.
એક મહિના દરમિયાન જમ્મુ-કાશ્મીરમાં આતંકવાદી ઘટનાઓમાં ભારે વધારો થયો છે. આ સમયગાળા દરમિયાન આતંકવાદીઓએ ઘણી મોટી ઘટનાઓને અંજામ આપ્યો, જેમાં 12 જવાનો શહીદ થયા અને 9 નાગરિકોના મોત થયા. તાજેતરનો હુમલો ડોડામાં થયો હતો, જ્યાં ગાઢ જંગલોમાં આતંકવાદીઓ દ્વારા સેનાની સર્ચ પાર્ટી પર હુમલો કરવામાં આવ્યો હતો. આ હુમલામાં એક અધિકારી સહિત ચાર જવાન શહીદ થયા હતા.
