મોદી મંત્ર -2 : આતંકવાદનો ખાત્મો
પાકિસ્તાનના પેશાવરમાં મસ્જિદમાં ફિદાયીન હુમલો, 72ના મોત અને અસંખ્ય ઘાયલ : સરકાર ઉપર પ્રજાનો ફિટકાર
પાકિસ્તાને ભૂતકાળમાં જેનો ઉછેર કર્યો તેવા આતંકી સંગઠનો હવે દેશને અંદરથી ખતમ કરી રહ્યા છે, દર થોડા સમયે હુમલાની ઘટનાઓથી દેશ ધ્રુજી ઉઠે છે
અબતક, નવી દિલ્હી : આતંકવાદને સતત પોષતા પાકિસ્તાનને હવે ભારતની વાત સમજાય છે. આતંકવાદનો નાશ જ દેશના વિકાસને શક્ય બનાવે છે. આ વાતથી હવે પાકિસ્તાન સહમત થતું જોવા મળી રહ્યું છે.કારણકે પાકિસ્તાન દર થોડા દિવસે આતંકવાદનો ભોગ બની રહ્યું છે.
પાકિસ્તાને ભૂતકાળમાં અનેક આતંકવાદી સંગઠનોને દૂધ પાઈને મોટા કર્યા છે. હવે આ સંગઠનો જ પાકિસ્તાનમાં હુમલાઓ કરી રહ્યા છે. અંદરખાને પાકિસ્તાન આતંકી સંગઠનોથી પરેશાન થઈ રહ્યું છે. પણ આ પીડા વિશ્વ સમક્ષ મૂકી શકાય એમ નથી. તેનું કારણ છે કે આ સંગઠનોને એક સમયે પાકિસ્તાન સરકારે જ મદદ કરી હતી. જો કે હજુ પણ પાકિસ્તાન આતંકી સંગઠનોને છાવરવાની ભૂલો કરી રહ્યું છે.
પાકિસ્તાનના પેશાવર શહેરમાં ગઈકાલે પોલીસ લાઈન્સમાં બનેલી મસ્જિદમાં ફિદાયીન હુમલો થયો હતો. જેમાં 72 લોકો મૃત્યુ પામ્યા છે. 150 થી વધુ લોકો ઘાયલ થયા છે. જેમાંથી 47ની હાલત ગંભીર છે. બ્લાસ્ટ એટલો જોરદાર હતો કે તેનો અવાજ લગભગ બે કિલોમીટર સુધી સંભળાયો હતો. મસ્જિદનો મોટો ભાગ પડી ગયો. ઇમામ નૂર-અલ-અમીન પણ મૃત્યુ પામ્યા. પાકિસ્તાનના પીએમ શાહબાઝ શરીફ હોસ્પિટલ પહોંચ્યા બાદ ઘાયલોને મળ્યા હતા.
એક પ્રત્યક્ષદર્શીએ કહ્યું- બપોરના સમયે મસ્જિદમાં લગભગ 500 લોકો હાજર હતા. ફિદાયીન હુમલાખોર વચ્ચેની હરોળમાં હાજર હતો.
પાકિસ્તાની મીડિયા અનુસાર, તહરીક-એ-તાલિબાન પાકિસ્તાન એ હુમલાની જવાબદારી લીધી છે. સેનાએ વિસ્તારને ઘેરી લીધો હતો. તેની નજીક આર્મી યુનિટની ઓફિસ પણ છે. ટીટીપીનો આ વિસ્તારમાં ઘણો પ્રભાવ છે અને ભૂતકાળમાં આ સંગઠને હુમલાની ધમકી પણ આપી હતી.
અહેવાલ અનુસાર, વિસ્ફોટ લગભગ 1:40 વાગ્યે થયો હતો.વિસ્ફોટની માહિતી મળ્યા બાદ પાકિસ્તાનના પૂર્વ વડાપ્રધાન ઈમરાન ખાને તેની નિંદા કરી છે.આ પહેલા પાકિસ્તાનમાં મસ્જિદ હુમલાના મામલા સામે આવતા રહ્યા છે. 16 મે 2022ના રોજ પાકિસ્તાનના કરાચીમાં વિસ્ફોટ થયો હતો. એમએ જિન્નાહ રોડ પર મેમણ મસ્જિદ પાસે વિસ્ફોટ થયો હતો, જેમાં એક મહિલાનું મોત થયું હતું. જ્યારે 8 લોકો ઘાયલ થયા છે.
ઘાયલોમાં એક પોલીસકર્મી પણ સામેલ છે.ગત રાત્રે થયેલા બોમ્બ વિસ્ફોટમાં એક વ્યક્તિનું મોત થયું હતું. જ્યારે 13 લોકો ઘાયલ થયા છે. આ બ્લાસ્ટ કરાચીના સૌથી વ્યસ્ત કોમર્શિયલ વિસ્તાર સદરમાં થયો હતો. પોલીસે જણાવ્યું હતું કે બ્લાસ્ટ એક હોટલની બહાર ડસ્ટબીનમાં થયો હતો. પ્રત્યક્ષદર્શીઓએ જણાવ્યું કે વિસ્ફોટ એટલો ભયંકર હતો કે આસપાસના એપાર્ટમેન્ટ, દુકાનો, કારની બારીઓના કાચ તૂટી ગયા અને આગ લાગી ગઈ.
આ પહેલા 26 એપ્રિલ 2022ના રોજ પાકિસ્તાનની કરાચી યુનિવર્સિટીમાં આત્મઘાતી હુમલો થયો હતો. જેમાં 3 ચીની અને એક પાકિસ્તાની નાગરિક માર્યા ગયા હતા. આ હુમલો બલૂચિસ્તાન લિબરેશન આર્મીના આત્મઘાતી બોમ્બર શરી બલોચે કર્યો હતો.
