અબતક, અમદાવાદ
ગુજરાત હાઈકોર્ટે ફોજદારી કાર્યવાહી પર સ્ટે ઓર્ડર આપ્યો હોવા છતાં અરેસ્ટ વોરંટ જારી કરવા બદલ જજને કોર્ટના તિરસ્કારની નોટિસ ફટકારવામાં આવી છે.
આ કેસમાં કથિત પ્રતિસ્પર્ધી ખેડા જિલ્લાની વસો કોર્ટમાં નિયુક્ત પ્રથમ વર્ગના ન્યાયિક મેજિસ્ટ્રેટ આર. કે. ત્રિવેદી છે. અરજદાર જયંતિભાઈ ચૌહાણ છે, જેઓ તેમના બે ભાઈઓ સાથે આત્મહત્યા માટે ઉશ્કેરવા અને ઘરેલું હિંસાના કેસમાં આરોપી છે. આ કેસની એફઆઈઆર વસો પોલીસમાં ૨૦૧૫ માં નોંધવામાં આવી હતી.
ચૌહાણની ધરપકડ અને જામીન પર મુક્ત થયા પછી તેણે તેની અને તેના પરિવારના સભ્યો સામે નોંધાયેલી એફઆઈઆર રદ કરવા માટે હાઈકોર્ટના દ્વાર ખખડાવ્યા હતા. ૨૪ ઓગસ્ટ ૨૦૧૫ ના રોજ હાઈકોર્ટે નીચલી કોર્ટને ફોજદારી કાર્યવાહી પર સ્ટે આપવાનો આદેશ આપ્યો હતો. સ્ટે ઓર્ડરને કારણે કેસ સેશન્સ કોર્ટમાં ટ્રાયલ માટે પ્રતિબદ્ધ ન હતો.
હાઇકોર્ટે આપેલા સ્ટેના ઓર્ડરની અવમાનના કરી બિનજામીનપાત્ર વોરંટ જારી કરનાર જજને નોટિસ ફટકારાઈ
જો કે, ૬ જુલાઈ ૨૦૧૯ ના રોજ, જ્યુડિશિયલ મેજિસ્ટ્રેટ ફર્સ્ટ કલાસ ત્રિવેદીએ ચૌહાણ અને તેના ભાઈઓ સામે બિનજામીનપાત્ર વોરંટ જારી કર્યું હતું. ચૌહાણ અને તેના ભાઈ લાલજીભાઈની ધરપકડ કરવામાં આવી હતી અને ૧૬ જુલાઈ ૨૦૧૯ ના રોજ કોર્ટમાં રજૂ કરવામાં આવ્યા હતા.
ચૌહાણે કોર્ટને માહિતી આપી હતી કે, હાઈકોર્ટે પહેલા જ કેસ પર સ્ટે મુકી દીધો છે. ન્યાયિક અધિકારીએ તે જ દિવસે તેઓને જામીન આપ્યા હતા પરંતુ લાલજીભાઈ જામીનની વ્યવસ્થા કરી શક્યા ન હોવાથી તેમને જેલમાં મોકલવામાં આવ્યા હતા અને જ્યાં સુધી તેઓ જામીન રજૂ ન કરી શકે ત્યાં સુધી એક દિવસ માટે જેલમાં રહેવું પડ્યું હતું.
હાઈકોર્ટના સ્ટે ઓર્ડર છતાં ધરપકડથી પરેશાન ચૌહાણે એડવોકેટ દર્શિત ભ્રમભટ્ટ મારફત હાઈકોર્ટનો સંપર્ક કર્યો હતો. જેમાં રજૂઆત કરાઈ કે હાઈકોર્ટના સ્ટે ઓર્ડરની ડિસેમ્બર ૨૦૧૫ માં નીચલી કોર્ટને યોગ્ય રીતે જાણ કરવામાં આવી હતી. કોર્ટ દ્વારા નોટિસ, સમન્સ અને જામીનપાત્ર વોરંટ જારી કર્યા પછી આરોપીની હાજરી અને બિનજામીનપાત્ર વોરંટ જારી કરવું એ છેલ્લો તબક્કો છે. એડવોકેટે કહ્યું કે, આ કેસમાં ન્યાયિક અધિકારીએ જાણી જોઈને હાઈકોર્ટના નિર્દેશનો અનાદર કર્યો અને ધરપકડ વોરંટ જારી કર્યું અને કોર્ટની અવમાનના કરી.
ચીફ જસ્ટિસ અરવિંદ કુમાર અને જસ્ટિસ આશુતોષ શાસ્ત્રીની બેન્ચે ગુરુવારે જજને નોટિસ જારી કરી હતી અને વધુ સુનાવણી ૪ માર્ચે રાખી છે.
