- તમારી ગોપનિયતાની કિંમત ફક્ત 450 ડોલર
- ડાર્ક વેબ પર ડિજિટલ માફિયાઓ બેફામ: ગમે તે વ્યક્તિના આઈડીથી માંડી સીસીટીવી હેક કરી નાખવાનો દાવો
રાજકોટની પ્રગતિ હોસ્પિટલના સીસીટીવી ફૂટેજ હેક કરી બિભત્સ વિડીયો ઓનલાઇન વેંચી મારવાનું મોટું કૌભાંડ તાજેતરમાં સામે આવ્યું હતું. હજુ આ ઘટનાની શાહી સુકાઈ નથી ત્યાં હવે ડાર્ક વેબ પર ગમે તે વ્યક્તિનું સોશિયલ મીડિયા એકાઉન્ટ હેક કરી નાખી ફક્ત રૂ.38,600 એટલે કે 450 ડોલરમાં વેંચી મારવાનું કૌભાંડ સામે આવતા ખળભળાટ મચી જવા પામ્યો છે.
તમારી ગોપનીયતાની કિંમત ફક્ત 450 ડોલર છે! આ વાત હચમચાવી નાખે તેવી છે. હવે ડાર્ક વેબ હેકિંગ સેવાઓનું બજાર બની ગયું છે, જે 450 ડોલર (લગભગ રૂ. 38,600) માં સોશિયલ મીડિયા એકાઉન્ટ્સની ગેરકાયદેસર ઍક્સેસ આપે છે. તપાસમાં જાણવા મળ્યું છે કે, હેકિંગ જૂથો છુપાયેલી સાઇટ્સ પર કાર્યરત છે અને ખુલ્લેઆમ ઇન્સ્ટાગ્રામ, વોટ્સએપ અને ઇમેઇલ હેકિંગની ખુલ્લેઆમ જાહેરાતો કરવામાં આવે છે. ’હેકિંગ સ્ક્વોડ’ તરીકે ઓળખાતું હેકિંગ જૂથ હેકિંગ માટેની 100% પરિણામોનો દાવો કરે છે અને ટેલિગ્રામ દ્વારા લોકોનો સંપર્ક કરે છે.
તાજેતરમાં અમદાવાદ શહેરની એક મહિલાએ સાયબર ક્રાઇમ પોલીસને જાણ કરી હતી કે તેનું ઇન્સ્ટાગ્રામ એકાઉન્ટ હેક થયું છે. એક વરિષ્ઠ પોલીસ અધિકારીના જણાવ્યા અનુસાર, બોપલની એક મહિલાનું ઇન્સ્ટાગ્રામ એકાઉન્ટ હેક કરવામાં આવ્યું હતું અને મહિલા પાસેથી 2 લાખ રૂપિયાની માંગણી કરવામાં આવી હતી. આ ઘટનાની તપાસમાં મોટો ઘટસ્ફોટ થયો હતો.
ડાર્ક વેબ પર એવા ટુલ્સ ઉપલબ્ધ છે જેનો ઉપયોગ કરીને કોઈપણ સોશિયલ મીડિયા એકાઉન્ટ અથવા કોઈપણ ઉપકરણને ઍક્સેસ કરી શકાય છે, તેવું ક્રાઇમ બ્રાન્ચના એક વરિષ્ઠ પોલીસ અધિકારીએ જણાવ્યું હતું. એક ચિંતાજનક ખુલાસામાં સાયબર ક્રાઇમ સંશોધકોએ ડાર્ક વેબ પર હેકિંગ સેવાઓ માટે વધતા જતા બજારનો પર્દાફાશ કર્યો છે. જ્યાં ઇન્સ્ટાગ્રામ એકાઉન્ટ્સની ગેરકાયદેસર ઍક્સેસ ફક્ત રૂ. 38,600ની કિંમતે ઓફર કરવામાં આવી રહી છે. આ ખુલાસો એવા સમયે થયો છે જ્યારે રાજકોટની પાયલ હોસ્પિટલના સીસીટીવી હેક કરવામાં આવ્યા હતા, જેમાં આરોપીઓએ વિદેશી હેકર્સ દ્વારા સંચાલિત ટેલિગ્રામ પરના ટ્યુટોરિયલ્સની મદદ લીધી હતી.
છુપાયેલી સાઇટ્સ અને એન્ક્રિપ્ટેડ પ્લેટફોર્મ પર ખુલ્લેઆમ માર્કેટિંગ કરવામાં આવતી આ હેકિંગ ઑનલાઇન ગોપનીયતા અને સુરક્ષા પર સીધો ખતરો ઉભો કરે છે. ઓળખાયેલા હેકિંગ જૂથોમાંથી એક “હેકિંગ સ્ક્વોડ” નામથી કાર્યરત છે. જે એક સમર્પિત ડાર્ક વેબ પોર્ટલ ચલાવે છે અને ટેલિગ્રામ દ્વારા તેની સેવાઓનો સક્રિયપણે પ્રચાર કરે છે, તેવું અધિકારીએ જણાવ્યું હતું. તેમણે ઉમેર્યું હતું કે, આ જૂથ ઇન્સ્ટાગ્રામ, વોટ્સઅપ, સ્નેપચેટ, ઇમેઇલ, વેબસાઇટ્સ અને શૈક્ષણિક ડેટાબેઝમાં હેકિંગમાં 100% ગેરંટીકૃત સફળતા પ્રદાન કરવાનો દાવો કરે છે. હેક કરેલ એકાઉન્ટના એક્સેસ માટે ફક્ત 450 ડોલરની કિંમત રાખવામાં આવી છે.
પ્રાપ્ત વિગત અનુસાર હેકિંગ પ્રક્રિયામાં કથિત રીતે સોશિયલ મીડિયા પ્લેટફોર્મની નબળાઈઓનો અથવા ફિશિંગ તકનીકોનો સમાવેશ થાય છે. એકવાર એકાઉન્ટ સાથે ચેડા થઈ જાય પછી હેકર્સ ખરીદનારને સંપૂર્ણ ઍક્સેસ આપે છે. વ્યક્તિગત એકાઉન્ટ્સ ઉપરાંત, કોર્પોરેટ ઇન્સ્ટાગ્રામ પ્રોફાઇલ્સ અને પ્રભાવક એકાઉન્ટ્સ પણ જોખમમાં છે.
ડિજિટલ માફિયાઓ તમારા માનસ સાથે કેવી રીતે કરે છે રમત?
જાણવા જેવું…
હાલ સોશિયલ મીડિયાના યુગમાં ડિજિટલ માફિયાઓ લોકો પાસે નાણાં પડાવવા અનેક કિમીયા અજમાવતા હોય છે. તેમાં પણ ખાસ તો હાલ ડિજિટલ અરેસ્ટ શબ્દ નવો નથી. આ શબ્દથી સોશિયલ મીડિયાનો ઉપયોગ કરતી દરેક વ્યક્તિ પરિચિત હશે તેમ છતાં ડિજિટલ માફિયા ડિજિટલ અરેસ્ટ કરી કરોડો રૂપિયા પડાવી લેતા હોય છે તે વાત પણ સાચી છે. ત્યારે અત્યંત જાણવા જેવી બાબત એ છે કે, કેવી રીતે લોકોના માનસ સાથે રમત કરી ડિજિટલ માફિયાઓ નાણાં પડાવતા હોય છે. અહીં સત્ય ઘટના આધારિત અનેક કિસ્સા રજુ કરવામાં આવ્યો છે. એક નાણાકીય સંસ્થાના સહાયક નિર્દેશકે કરેલા વર્ણન મુજબ ગત વર્ષે તેમને એક ફોન આવ્યો હતો. આ ફોન ઉપાડતા જ સામેની વ્યક્તિએ પોતાની ઓળખ પોલીસ અધિકારી તરીકે આપી તેમના પર ડ્રગ્સની હેરાફેરીનો આરોપ લગાવી ડિજિટલ અરેસ્ટ કર્યા હતા. સહાયક નિર્દેશક મહિલાને ફોન કરનાર શખ્સે દોઢ કલાક સુધી બેડરૂમમાં ડિજિટલી બંધક બનાવી લીધા હતા. જે ધરપકડ અને કાર્યવાહીથી બચવા પીડિતાએ 11 લાખ ડિજિટલ માફિયાને ચૂકવ્યા હતા. તેણી સાથે કેવી રીતે છેતરપિંડી થઈ તે યાદ કરતાં, સહાયક નિર્દેશકે કહ્યું કે તેણી કામ પર જવાની તૈયારીમાં હતી ત્યારે સવારે 8.45 વાગ્યે એક ફોન આવ્યો. ફોન કરનાર વ્યક્તિ પાસે તેનો આધાર નંબર હતો અને દાવો કર્યો હતો કે તેણીએ મોકલેલા પાર્સલમાં ડ્રગ્સ મળી આવ્યું છે. મને મારા બેડરૂમમાં મારી જાતને બંધ રાખવા અને મારા પરિવારનો સંપર્ક ન કરવા કહેવામાં આવ્યું હતું. ફોન કરનાર વ્યક્તિએ ધમકી આપી હતી કે જો એફઆઈઆર નોંધવામાં આવશે તો તે મારા વિદેશ જવાની શક્યતાઓને જોખમમાં મૂકશે. તે ક્ષણે મારો એકમાત્ર વિચાર એ હતો કે તેની માંગણીઓનું પાલન કરીને પરિસ્થિતિમાંથી બહાર નીકળવું.
બીજા કિસ્સાની જો વાત કરવામાં આવે તો એક વરિષ્ઠ આઇટી વ્યાવસાયિકે તેની ડિજિટલ ધરપકડ વિશે જણાવ્યું હતું કે, મને એવું લાગ્યું કે મને હિપ્નોટાઇઝ કરવામાં આવ્યો. હું કંઈ પણ વિચારી શકતો ન હતો. જ્યારે મારું વાઇફાઇ કનેક્શન કટ થઇ ગયું ત્યારે હું તેમના ખાતામાં 25 લાખ ટ્રાન્સફર કરવા જઈ રહ્યો હતો. તે સમયે હું મૂર્ખતામાંથી બહાર આવ્યો અને મને ખ્યાલ આવ્યો કે હું શું કરવાનો હતો.
ડિજિટલ અરેસ્ટમાં ફક્ત સરળ છેતરપિંડીનો સમાવેશ થતો નથી. કૌભાંડીઓ મનોવૈજ્ઞાનિક ચાલાકીનો ઉપયોગ કરે છે. વ્યવસ્થિત રીતે તેમના લક્ષ્યોને અલગ કરે છે, વિસ્તૃત વાસ્તવિકતાઓ બનાવે છે અને અનિવાર્ય ગભરાટની ભાવના પેદા કરવા માટે અત્યાધુનિક તકનીકોનો ઉપયોગ કરે છે. આ એક સંભવિત સમજૂતી હોઈ શકે છે કે સ્કેમર્સ પીડિતોને ફસાવી રહ્યા છે.ગયા વર્ષે મુંબઈ પોલીસે ડિજિટલ એરેસ્ટ છેતરપિંડીના 195 કેસ નોંધ્યા હતા. આ વર્ષના પહેલા બે મહિનામાં આ આંકડો 15 પર પહોંચી ગયો છે.
આ કૌભાંડોમાં લક્ષિત વ્યક્તિઓ ઘણીવાર સમાજમાં ચોક્કસ અંશે નાણાકીય સ્થિરતા, પ્રતિષ્ઠા અને આદર ધરાવે છે. જ્યારે આ પાસાઓ જોખમમાં મુકાય છે, ખાસ કરીને જીવન માટે જોખમ, ત્યારે વ્યક્તિઓ અત્યંત સંવેદનશીલ બની જાય છે, તેવું સલાહકાર મનોચિકિત્સક ડો. અવિનાશ દે સોસાએ જણાવ્યું.
પશ્ચિમ ઉપનગરના એક વરિષ્ઠ નાગરિકે જણાવ્યું કે તેમણે છેતરપિંડી કરનારની સૂચનાઓનું આંધળું પાલન કર્યું અને તેમની પુત્રીને સંભવિત નુકસાનની ધમકી મળ્યા પછી 19 લાખ ચૂકવી દીધા હતા. ડો. ડી સોસાએ કહ્યું કે પ્રિયજનોને નુકસાન પહોંચાડવાની ધમકીઓનો સામનો કરીને પીડિતો સૌથી તાત્કાલિક ઉકેલ શોધવાનું વલણ ધરાવે છે. કોઈ પણ ઇચ્છતું નથી કે તેમના પરિવારને નુકસાન થાય. જો પૈસા ચૂકવવા એ પરિસ્થિતિનો ઉકેલ લાવવાનો સૌથી સરળ રસ્તો લાગે છે, તો તે જ કરવામાં આવે છે અને તેનો જ લાભ ડિજિટલ માફિયાઓ ઉઠાવી લેતા હોય છે.
વૃદ્ધો જ નહિ બેન્કર, તબીબો અને મલ્ટીનેશનલ કંપનીના ડિટેકટરો પણ ડિજિટલ એરેસ્ટના શિકાર
સાયબર પોલીસ કહે છે કે, જ્યારે પીડિતોમાં મોટાભાગના વરિષ્ઠ નાગરિકો હોય છે પણ તેમની સાથે ત્યારે બેંકર, ડોકટરો અને બહુરાષ્ટ્રીય કંપનીઓના ડિરેક્ટરો જેવા લાયક વ્યાવસાયિકો પણ ડિજિટલ અરેસ્ટનો શિકાર બની ચુક્યા છે.
ખાખી વર્દી, ન્યાયાધીશનો બ્લેક કોટ જોઈને ડરશો નહિ
સાયબર મનોવૈજ્ઞાનિક નિરાલી ભાટિયાએ લોકોની નબળાઈને કથિત સત્તાધીશોની સૂચનાઓનું પાલન કરવાની આપણી જન્મજાત વૃત્તિને કારણે છે. ખાખી યુનિફોર્મ પહેરેલી વ્યક્તિ, પૃષ્ઠભૂમિમાં પોલીસ લોગો પ્રદર્શિત કરતી હોય અથવા વિડીયો કોલ દરમિયાન ન્યાયાધીશનો ઝભ્ભો પહેરેલી વ્યક્તિને જોઈ આપણે સામાન્ય રીતે ડરી જતાં હોઈએ છીએ જેનો લાભ ડિજિટલ માફિયાઓ ઉઠાવતા હોય છે.
લોકોની વિચાર શક્તિને ટાર્ગેટ કરવો પ્રથમ લક્ષ્યાંક
ડિજિટલ માફિયાઓ ડિજિટલ અરેસ્ટ કરતા સૌ પ્રથમ લોકોની વિચારશક્તિને ટાર્ગેટ કરે છે. ડિજિટલ અરેસ્ટ કરનારાઓના ભયથી પીડિતોના હાથ પગ લકવાગ્રસ્ત જેવા થઇ જાય છે અને લોકો સ્પષ્ટ રીતે વિચારવામાં અસમર્થ થઇ જતાં હોય છે અને ત્યારબાદ આ માનવસર્જિત આફતમાંથી બહાર નીકળવા લોકો ગમે તે કરવા તૈયાર થઇ જતાં હોય છે અને તેના લીધે જ મોટી રકમ પડાવવામાં ડિજિટલ માફિયા સફળ થઇ જતાં હોય છે.
