ભારતીય સશસ્ત્ર દળો ટૂંક સમયમાં અમદાવાદ સ્થિત કંપની દ્વારા વિકસિત સાધનનો ઉપયોગ કરશે !!
અબતક, અમદાવાદ
હેક થવાના ડર વિના ઉચ્ચ સુરક્ષા ઝોનમાં વાતચીત કરવા માટે ભારતીય સશસ્ત્ર દળો ટૂંક સમયમાં અમદાવાદ સ્થિત કંપની દ્વારા વિકસિત સાધનનો ઉપયોગ કરશે.
નાવ વાયરલેસ ટેકનોલોજી(એનડબ્લ્યુટી)એ વિશ્વની પ્રથમ લાઈફાઈ-આધારિત વ્હીકલ ટુ વ્હીકલ (વી2વી) ટેકનોલોજી સોલ્યુશન સાથે આવ્યું છે, જે ભારતીય સંરક્ષણ દળોને ગોપનીય માહિતી અને ડેટા ટ્રાન્સફર કરવાની મંજૂરી આપશે.
વી2વી પ્રોડક્ટ ગાંધીનગર ખાતેના ડિફેન્સ એક્સ્પોમાં લોન્ચ કરવામાં આવી હતી. એનડબ્લ્યુટીના સ્થાપક હાર્દિક સોનીએ કહ્યું છે કે, વી2વી એ આપણા સશસ્ત્ર દળો માટે ઓપ્ટિકલ લાઇફાઈ-આધારિત વાયરલેસ સંચાર છે. અમે એક વાહનથી બીજા વાહનમાં લાઇટ સ્પેક્ટ્રમનો ઉપયોગ કરીને ડેટા ટ્રાન્સમિટ કરવા માટે વાહનોમાં એલઇડીનો ઉપયોગ કરીએ છીએ.તે સૌથી ઓછી વિલંબિતતા અને પાવર વપરાશ ધરાવે છે અને અન્ય કોઈપણ ટેક્નોલોજી કરતાં તેને ઇન્સ્ટોલ કરવું સરળ છે. જ્યારે લશ્કરી કાફલો કોઈ ગંતવ્ય સ્થાને જઈ રહ્યો હોય, ત્યારે કર્મચારીઓ એકબીજા સાથે તેમના સ્થાનો, જોખમના સંકેતો અને અત્યંત ગોપનીય માહિતી વિશે વાતચીત કરે છે.જો કે, હાલની ટેક્નોલોજીને હેક કરી શકાય છે. સોનીએ કહ્યું છે કે, કંપનીએ સેનાની જરૂરિયાતોને આધારે ટેક્નોલોજી વિકસાવવા માટે રૂ. 20 કરોડનું રોકાણ કર્યું છે અને 30 વાહનો માટે ટેક્નોલોજી સપ્લાય કરી છે. અમે દર વર્ષે 1 લાખ વાહનો માટે ટેકનોલોજી સપ્લાય કરી શકીએ છીએ.
