અર્થતંત્રની હરણફાળ અને ડિજિટલાઇઝેશનને લઈ ગૂગલ હવે મુંબઇમાં ડેટા સેન્ટર ઉભુ કરશે

• 22.5 એકર જગ્યામાં સ્થપાશે પ્રોજેકટ : રૂ.850 કરોડની જમીનનો સોદો અંતિમ તબક્કામાં

અર્થતંત્રની હરણફાળ અને ડીજીટલાઇઝેશનને લઈ ગૂગલ હવે ડેટા સેન્ટર ઉભુ કરશે. નવી મુંબઈમાં  22.5 એકર જગ્યામાં પ્રોજેકટ સ્થપાશે. જેના માટે રૂ.850 કરોડની જમીનનો સોદો અંતિમ તબક્કામાં હોવાનું જાણવા મળી રહ્યું છે.

ઝડપથી વધી રહેલા ડેટા વપરાશ, અર્થતંત્રનું ડિજિટલાઇઝેશન, 5જીનો વપરાશ અને ડેટા સ્થાનિકીકરણના વલણોને કારણે ભારતમાં ડેટા સેન્ટરની માંગ મજબૂત ગતિએ વધવાની અપેક્ષા છે. જેને કારણે ગૂગલ નવી મુંબઇ ખાતે દેશનું પ્રથમ કેપટીવ ડેટા સેન્ટર ખોલવાનું છે. આ માટે જુઇનગરમાં 22.5 એકર જમીન ખરીદવા માટે વાટાઘાટો ચાલુ છે. આ જમીન મહારાષ્ટ્ર ઇન્ડસ્ટ્રીયલ ડેવલપમેન્ટ કોર્પોરેશનની માલિકીની લીઝહોલ્ડ જમીન છે. આ સંભવિત સોદો આશરે રૂ. 850 કરોડનો છે. જ્યારે ગૂગલે નવી મુંબઈ અને નોઈડામાં કોલોકેશન ડેટા સેન્ટર્સમાં જગ્યા ભાડે આપવા માટે થોડા સોદા કર્યા છે, ત્યારે આ કંપની દ્વારા વિકસાવવામાં આવનાર પ્રથમ ડેટા સેન્ટર હશે.ગૂગલ, માઈક્રોસોફ્ટ અને એમેઝોન જેવી ટેક જાયન્ટ્સ ડિજીટલાઈઝેશનમાં આ બજારના રોગચાળા પછીના ઉછાળાનો લાભ લેવા ભારતમાં હાઈપરસ્કેલ ડેટા સેન્ટર સ્થાપી રહી છે.વૈશ્વિક ક્લાઉડ ફર્મ્સ દ્વારા તેમના પોતાના ડેટા સેન્ટર્સ હસ્તગત કરવા અને બનાવવાનો ટ્રેન્ડ છેલ્લા કેટલાક વર્ષોથી દેખાઈ રહ્યો છે.  “કોવિડ પછીના ડિજિટલાઇઝેશન તરફના વૈશ્વિક વલણને કારણે આને પ્રોત્સાહન મળ્યું છે,” વિવેક દહિયા, એમડી અને હેડ – એશિયા પેસિફિક, ડેટા સેન્ટર, કુશમેન અને વેકફિલ્ડે જણાવ્યું હતું.

તેમના મતે, મુંબઈ અને ચેન્નાઈને સિંગાપોર, દક્ષિણપૂર્વ એશિયા, યુરોપ અને મધ્ય પૂર્વ સાથે જોડતી સબમરીન કેબલ ઈન્ફ્રાસ્ટ્રક્ચર ભારતને ડેટા સેન્ટરના વિકાસ, વિસ્તરણ અને રોકાણ માટે વધુ આકર્ષક એશિયા-પેસિફિક સ્થાન તરીકે સ્થાન આપવામાં મદદ કરશે.