વડાપ્રધાન મોદી પણ જેમના વખાણ કરતા થાક્યા ન હતા તેવા કોંગ્રેસના દિગ્ગજ નેતા ગુલામ નબી આઝાદે આજે પાર્ટીના પ્રાથમિક સભ્યપદ સહિત તમામ હોદ્દા પરથી રાજીનામું આપી દીધું છે. આ અચાનક લેવાયેલું પગલું નથી. તેમણે પાર્ટી નેતૃત્વને લાંબા સમયથી પોતાની નારાજગીનો અહેસાસ કરાવ્યો છે.
આઝાદે કોંગ્રેસ અધ્યક્ષ સોનિયા ગાંધીને પોતાનો પાંચ પાનાનો રાજીનામું પત્ર મોકલ્યો છે. આ પત્રમાં ગુલામ નબી આઝાદે કહ્યું છે કે પાર્ટીના નેતા રાહુલ ગાંધી બિનઅનુભવી લોકોથી ઘેરાયેલા છે. તેમણે પત્રમાં લખ્યું છે કે, “ખૂબ જ અફસોસ અને ખૂબ જ ભાવુક હૃદય સાથે, મેં ભારતીય રાષ્ટ્રીય કોંગ્રેસ સાથેના મારા અડધી સદી જૂના જોડાણને તોડવાનો નિર્ણય કર્યો છે.” ગુલામ નબી આઝાદે કોંગ્રેસના નેતા રાહુલ ગાંધી પર નિશાન સાધતા આરોપ લગાવ્યો છે કે તેઓએ પ્રમુખ તરીકે કાર્યભાર સંભાળ્યા પછી કોંગ્રેસ વિખેરી નાખવામાં આવી હતી, જેણે ધીમે ધીમે પાર્ટીના તળિયાના નેતાઓને ખતમ કરી દીધા હતા.
હકીકતમાં, ગુલામ નબી આઝાદની નારાજગી એ જ દિવસે જોવા મળી હતી જ્યારે તેમને રાજ્યસભામાંથી વિદાય આપવામાં આવી રહી હતી. રાજ્યસભાનો તે વિદાય સમારંભ આજે પણ યાદ છે કારણ કે ગૃહમાં ગુલામ નબીના સન્માનમાં આપેલા ભાષણ દરમિયાન વડાપ્રધાન નરેન્દ્ર મોદી રડવા લાગ્યા હતા. રાજ્યસભામાં તે ક્ષણ ખૂબ જ ભાવનાત્મક અને અસ્વસ્થ હતી. તેમના ભાષણમાં પીએમ મોદીએ કહ્યું હતું કે, “હું ફરી એકવાર તેમની સેવાઓ માટે સન્માનપૂર્વક તેમનો આભાર માનું છું અને વ્યક્તિગત રીતે હું તેમને વિનંતી કરીશ કે તમે આ ગૃહમાં નથી એવું માનશો નહીં. મારા દરવાજા તમારા માટે હંમેશા ખુલ્લા રહેશે.”
આ પછી આઝાદે પણ પીએમ મોદીના જોરદાર વખાણ કર્યા. તેમણે કહ્યું હતું કે લોકોએ પીએમ મોદી પાસેથી શીખવું જોઈએ. ગુલામ નબી આઝાદની આ વિદાય વર્ષ 2021ના ફેબ્રુઆરીના પ્રથમ સપ્તાહમાં થઈ હતી. આ સમારોહ પછી એક સમયે ગાંધી પરિવારના લડાયક ગણાતા ગુલામ નબી આઝાદે સોનિયા-રાહુલ ગાંધીથી દૂર રહેવાનું શરૂ કર્યું.
બીજી તરફ ભાજપે પણ ગુલામ નબીને રીઝવવાનો પ્રયાસ કર્યો હતો. રાજ્યસભામાંથી અશ્રુભીની વિદાય પછી, ભાજપે આ વર્ષે માર્ચમાં આઝાદને પદ્મ ભૂષણ એવોર્ડથી સન્માનિત કર્યા. ભલે આ પુરસ્કાર જાહેર ક્ષેત્રે તેમના “યોગદાન” માટે આપવામાં આવ્યો હતો, પરંતુ આ એવોર્ડનો મોટો રાજકીય અર્થ કાઢવામાં આવી રહ્યો હતો.
જો કે કોંગ્રેસની નેતાગીરી પણ તેમને ખુશ રાખવાનો પ્રયાસ કરી રહી છે. આ મહિને 16 ઓગસ્ટે કોંગ્રેસે આઝાદને જમ્મુ અને કાશ્મીર પ્રદેશ પ્રચાર સમિતિના અધ્યક્ષ બનાવ્યા. પરંતુ નિમણૂક પત્ર મળ્યાના બે કલાકમાં જ તેમણે “આ મારું ડિમોશન છે” એમ કહીને રાજીનામું આપી દીધું હતું.
આજે રાજકીય ગલિયારામાં જે પ્રશ્ન ઘૂમી રહ્યો છે તે એ છે કે શું ગુલામ નબી કોઈ નવી ઈનિંગની તૈયારી કરી રહ્યા છે.. તો શું આ રાજીનામાને આગામી જમ્મુ-કાશ્મીરની ચૂંટણી સાથે જોડીને જોઈ શકાય છે… અને સૌથી મહત્ત્વનો પ્રશ્ન એ છે કે, શું ભાજપ આ નવી ઇનિંગ્સમાં ભાગીદારની ભૂમિકામાં રહેશે?
