બોલેરો પીકઅપ અને ટ્રક વચ્ચેની ટક્કરમાં ચાર દેરાણી-જેઠાણીના કરૂણ મોત : 18 ઈજાગ્રસ્ત

• ચોટીલા પાસે આપા ગીગાના ઓટલા નજીક ગમખ્વાર અકસ્માત
• લીંબડીના શિયાણી ગામનો પરિવાર પિતૃકાર્ય અર્થે સોમનાથ જવા નીકળ્યો’તો

ચોટીલા-રાજકોટ હાઇવે પર ગમખ્વાર અકસ્માતની ઘટના સામે આવી છે. ટ્રક અને પીકઅપ વાન ભટકાતા એક જ પરિવારની 4 મહિલાઓના ઘટનાસ્થળે જ મોત થયા છે. જ્યારે 18 થી વધુ લોકોને ઇજાઓ પહોંચી છે. લીંબડીના શિયાણીનો પરિવાર પિતૃકાર્ય અર્થે સોમનાથ જઈ રહ્યો હતો ત્યારે આ અકસ્માત નડ્યો હતો.

આ અકસ્માત અંગે મળતી માહિતી મુજબ લીંબડીના શિયાણી ગામના એક જ પરિવારના લોકો પિતૃ કાર્ય માટે સોમનાથ તરફ જઈ રહ્યા હતા. આ દરમિયાન ચોટીલા-રાજકોટ હાઇવે પર આપા ગીગાના ઓટલા નજીક પહોંચતા અકસ્માત સર્જાયો હતો. ટ્રક અને પિકઅપ વાન વચ્ચે ભયંકર ટક્કર થતાં પીકઅપમાં સવાર 4 મહિલાઓના ઘટનાસ્થળે જ મોત થયા છે. જ્યારે 18થી વધુ લોકોને ગંભીર ઇજાઓ પહોંચતાં સારવાર અર્થે ખસેડાયા છે. મળતી માહિતી મુજબ મૃતક ચારેય મહિલાઓ સગી દેરાણી જેઠાણી છે.

મધરાતે થયેલા આ ગંભીર અકસ્માતની જાણ થતાં પોલીસ તાત્કાલિક અકસ્માત સ્થળે પહોંચી હતી અને મૃતકોના મૃતદેહને પી.એમ અર્થે ખસેડ્યા હતા, જ્યારે ઇજાગ્રસ્તોને સારવાર અર્થે ખસેડીને આગળની તપાસ હાથ ધરી છે. પિતૃ કાર્ય માટે જતા એક જ પરિવારની 4 મહિલાઓના મોત થતાં પરિવારમાં શોકનું મોજુ ફરી વળ્યું છે.

મૃતકોની ઓળખ કરી લેવાઈ

ગોઝારા અકસ્માતમાં એક જ પરિવારની ચાર મહિલાઓ મોતને ભેંટી છે. જે ચારેય મહિલાઓની ઓળખ કરી લેવામાં આવી છે. જેમાં મગજીબેન રેથરીયા ઉ.વ.72, ગલાલબેન રેથરીયા ઉ.વ.60, મંજુબેન રેથરીયા ઉ.વ.65, ગૌરીબેન રેથરીયા ઉ.વ.68 તરીકે મૃતકોની ઓળખ કરવામાં આવી છે.