મેંદરડા, જેતપુર, ગોંડલ, જુનાગઢ અને પડધરીમાંથી થયેલી બાઇક ચોરીનો ભેદ ઉકેલાયો
જેતપુરમાં પોલીસે બાઇક ચોર ગેંગને પકડી પાડી છે. પોલીસે ગેંગના ચાર સભ્યોની આઠ બાઇક સાથે ધરપકડ કરીને આગળની કાર્યવાહી ચલાવી છે. પ્રાથમીક પુછપરછમાં આ શખ્સોએ મેંદરડા, જેતપુર, ગોંડલ, જુનાગઢ, પડધરી સહીતના શહેરોમાંથી બાઇકની ઉઠાંતરી કરી હોવાનું પોલીસને જાણવા મળ્યું છે.
જેતપુર પોલીસને ખાનગી રાહે બાતમી મળી રહી કે ભાદરના સાંમાકાંઠે રહેતો રાકેશ ઉર્ફે રાહુલ મુકેશ દેવીપુજક તેમના મિત્રો સાથે બહાર ગામથી બાઇક ચોરી કરીને તેને ઘરે રાખતો હોય જેથી પોલીસે દરોડો પાડતા મકાનની બાજુમાં રાખેલા ૮ બાઇક મળી આવ્યા હતા. ૮ ચોરાઉ બાઇક મળતા પોલીસે રાકેશ ઉર્ફે રાહુલ મુકેશ સોલંકી, રવિ ઉર્ફે જીજો હસમુખ પરમાર, સાગર હસમુખ પરમાર, અને અન્ય એક સગીર વયના આરોપીને પકડી પાડયો હતો. પ્રાથમીક પુછપરછમાં આ ગેંગે કબુલાત આપી હતી કે તેઓએ જેતપુર, ગોંડલ, જુનાગઢ, મેંદરડા, ગોંડલ અને પડધરીમાંથી બાઇકની ઉઠાંતરી કરી હતી
