ટુર્નામેન્ટમાં અમદાવાદ, બનાસકાંઠા, પાટણ, કચ્છ સહિતના શહેરોમાંથી ટીમો ભાગ લેશે
ગુજરાત સ્ટેટ ફુટબોલ એસો. દ્વારા આયોજીત અને રાજકોટ ડીસ્ટ્રીકટ ફુટબોલ એસો. ના સહકારથી રમાડવામાં આવનાર ઇન્ટર ડીસ્ટ્રીકટ વુમન્સ ફુટબોલ ટુર્નામેન્ટનું આયોજન રેસકોર્ષ કોર્પોરેશનના ફુટબોલ મેદાનમાં તા. 19 થી કરવામાં આવનાર છે.
દર વર્ષે રમાતી આ ટુર્નામેન્ટમાંથી ગુજરાત વુમન્સ ફુટબોલ ટીમનું સિલેકશન કરવામાં આવે છે. અને તે ટીમ ગુજરાતનું પ્રતિનિધિત્વ કરે છે. આ વર્ષે આ ટુર્નામેન્ટનું નામ લેટ ગુલાબ ચૌહાણ મેમોરિયલ કપ આપવામાં આવનાર છે. ગુલાબ ચૌહાણ ફિફા ના રેફી રહી ચુકેલા છે અને ગુજરાત ફુટબોલ એસો.માં સેક્રેટરી તરીકે પણ સેવા બજાવી ચુકેલા છે. ગુજરાત ફુટબોલ ને આગળ લાવવામાં તેઓનો મોટો ફાળો રહ્યો છે.
આ ટુર્નામેન્ટમાં રાજકોટ, બનાસકાંઠા, ભાવનગર, અમદાવાદ, પાટણ, કચ્છ, વડોદરા, છોટાઉદયપુર , વલસાડ, ગાંધીનગર, સુરત તથા બોટાદની ટીમો ભાગ લેશે.
આ ટુર્નામેન્ટને સફળ બનાવવા ગુજરાત રાજય ફુટબોલ એસો. ના સેક્રેટરી મુળરાજસિંહ ચુડાસમા તથા સભ્યો સાથે ગુજરાત ફુટબોલ એસો. ના ઉપપ્રમુખ અને રાજકોટ ફુટબોલ ડીસ્ટ્રીકટ પ્રમુખ ગુણવંતભાઇ ડેલાવાળાની આગેવાની નીચે રાજકોટ ડીસ્ટ્રીકટ ફુટબોલ એસો. હોદેદારો સર્વે ડી.વી. મહેતા, મુકેશભાઇ બુંદેલા તથા સભ્યો જહેમત ઉઠાવી રહ્યા છે.
