- મહારાષ્ટ્રના જાલનામાં સૂતેલા કામદારોના શેડ પર ટ્રક ચાલકે અજાણતા રેતી ઉતારી
- શેડ તૂટી પડતાં નીચે દબાયેલ એક સગીર સહિત 5 મજૂરોના મો*ત
બાંધકામ સ્થળ પર કામચલાઉ શેડમાં મજૂરો સૂઈ રહ્યા હતા ત્યારે ડ્રાઈવર રેતી ભરેલી ટિપર ટ્રક લઈને ત્યાં પહોંચ્યો અને અજાણતાં બધી રેતી શેડ પર ઢોળી દીધી, જેના કારણે મજૂરો શેડ નીચે ફસાઈ ગયા.
મહારાષ્ટ્રના જાલનામાં એક બાંધકામ સ્થળ પર કામદારો માટેના કામચલાઉ ‘શેડ’ પર ટ્રકમાંથી રેતી પડતાં એક સગીર સહિત પાંચ મજૂરોના કચડાઈને મોત થયા હતા. પોલીસે આ માહિતી આપી.
આ સંદર્ભમાં, એક અધિકારીએ જણાવ્યું હતું કે આ ઘટના જાફરાબાદ તાલુકાના પાસોડી-ચાંડોલમાં એક પુલ પ્રોજેક્ટ સાઇટ પર વહેલી સવારે બની હતી.
તેમણે કહ્યું કે મજૂરો બાંધકામ સ્થળ પર એક કામચલાઉ શેડમાં સૂઈ રહ્યા હતા ત્યારે ડ્રાઈવર રેતી ભરેલી ટીપર ટ્રક લઈને ત્યાં પહોંચ્યો અને અજાણતાં બધી રેતી શેડ પર ઢોળી દીધી, જેના કારણે મજૂરો તેની નીચે દટાઈ ગયા.
સૂત્રોના જણાવ્યા અનુસાર, રેતીના વજનને કારણે શેડ તૂટી પડ્યો હતો, જેના પગલે ટ્રક ચાલક ઘટનાસ્થળેથી ભાગી ગયો હતો.
અધિકારીએ જણાવ્યું કે કાટમાળમાંથી એક છોકરી અને એક મહિલાને બચાવી લેવામાં આવી છે. તેમણે કહ્યું કે કેસ નોંધવામાં આવ્યો છે અને ડ્રાઇવરને શોધવાના પ્રયાસો ચાલુ છે.
મૃ*તકોની ઓળખ સિલ્લોડ તાલુકાના ગોલેગાંવના રહેવાસી ગણેશ ધનવાઈ (60) અને તેમના પુત્ર ભૂષણ ધનવાઈ (16) અને જાફરાબાદ તાલુકાના પદ્માવતીના રહેવાસી સુનિલ સપકલ (20) તરીકે થઈ છે. તેમણે જણાવ્યું હતું કે અન્ય બે પીડિતોની ઓળખ હજુ સુધી થઈ શકી નથી.
