કોવિડ- યુક્રેન યુદ્ધ વચ્ચે પણ ભારતનું અર્થતંત્ર મજબૂત ફુગાવાનો દર 7% ઉપર નહિ જ જાય, નાણામંત્રીની સંસદને ખાતરી
કેન્દ્રની ભાજપ સરકાર અત્યારે બે મુદાના કાર્યક્રમમાં જ એડીચોટીનું જોર લગાવી રહી છે. એક તો અર્થતંત્ર અને બીજું આંતકવાદથી સંપૂર્ણ મુક્તિ. અર્થતંત્ર ઉપર દેશવાસીઓનો વિશ્વાસ ડગમગ થવા લાગતા સરકાર વતી નાણામંત્રી નિર્મલા સીતારમને સંસદમાં ખૂબ મોટું નિવેદન આપ્યું છે. તેઓએ કહ્યું છે કે મંદીની ચિંતા ન કરતા, ભારતનું અર્થતંત્ર મજબૂત છે. ફુગાવાનો દર 7 ટકા ઉપર નહિ જ જાય તેવી પણ તેઓએ સંસદને ખાતરી આપી છે.
લોકસભામાં નિર્મલા સીતારમને કહ્યું કે ભારતની અર્થવ્યવસ્થા માત્ર વિશ્વના અમુક દેશો કરતાં સારી સ્થિતિમાં નથી, પરંતુ તે સૌથી ઝડપથી વિકસતી અર્થવ્યવસ્થાઓમાંની એક છે. ભારતમાં મંદીનો કોઈ ખતરો નથી. બ્લૂમબર્ગના સર્વે અનુસાર ભારતમાં મંદીની શૂન્ય શક્યતા છે. એટલું જ નહીં, નાણામંત્રીએ વિપક્ષ પર આરોપ લગાવ્યો કે મોંઘવારી પર ચર્ચા દરમિયાન માત્ર રાજકીય વાતો કરવામાં આવી હતી. તેમણે કહ્યું કે આ દરમિયાન 30 સાંસદોએ વધતી કિંમતો પર વાત કરી, પરંતુ આંકડા રજૂ કરવાને બદલે આ લોકો માત્ર રાજકીય મુદ્દાઓ પર બોલતા રહ્યા. જ્યારે નાણામંત્રી જવાબ આપી રહ્યા હતા ત્યારે કોંગ્રેસના સાંસદોએ ગૃહમાંથી વોકઆઉટ કર્યો હતો.
તેમણે કહ્યું કે યુપીએના સમયમાં દેશમાં મોંઘવારી 9 વખત ડબલ ડિજિટમાં હતી. રિટેલ ફુગાવો 22 મહિના માટે 9% થી ઉપર હતો, જ્યારે અમે ફુગાવો 7% થી નીચે લાવવાનો પ્રયાસ કરી રહ્યા છીએ. છેલ્લા 5 મહિનાથી સતત જીએસટી કલેક્શન 1.4 લાખ કરોડ રૂપિયાથી વધુ છે. 8 જૂનમાં ઈન્ફ્રાસ્ટ્રક્ચર સેક્ટર ડબલ ડિજિટમાં વધ્યું હતું. જૂનમાં કોર સેક્ટરે વાર્ષિક ધોરણે 12.7%ની વૃદ્ધિ નોંધાવી હતી. ભારતીય અર્થવ્યવસ્થા ખૂબ જ સકારાત્મક સંકેતો દર્શાવે છે.
તેઓએ ઉમેર્યું કે અમેરિકાના જીડીપીમાં બીજા ક્વાર્ટરમાં 0.9% અને પ્રથમ ક્વાર્ટરમાં 1.6%નો ઘટાડો થયો, જેને તેમણે બિનસત્તાવાર મંદી ગણાવી. ભારતમાં મંદીનો સવાલ જ નથી. બ્લૂમબર્ગના સર્વે મુજબ ભારતમાં મંદીની સંભાવના શૂન્ય છે.સરકાર દ્વારા લેવામાં આવેલા પગલા બાદ ખાદ્યતેલોના ભાવમાં ભારે ઘટાડો થયો છે. રોગચાળો હોવા છતાં, બીજી તરંગ, ઓમિક્રોન, રશિયા-યુક્રેન (યુદ્ધ), અમે ફુગાવાને 7% કે તેથી ઓછો રાખ્યો છે. તમારે તે માનવું પડશે.
નાણામંત્રીએ કહ્યું, ’બાંગ્લાદેશ આઈએમએફ પાસેથી 4.5 અબજ લોન માંગી રહ્યું છે. શ્રીલંકા 3.5 અબજની લોન માંગે છે અને પાકિસ્તાન 7 અબજની લોન માંગે છે. ભારતમાં સ્થિતિ એવી નથી.આપણી પાસે સંપૂર્ણ સંસાધનો છે.
શનિવારે રઘુરામ રાજને કહ્યું કે આરબીઆઈએ ભારતમાં વિદેશી મુદ્રા ભંડાર વધારવા અને પાકિસ્તાન અને શ્રીલંકા જેવા પાડોશી દેશોની સમસ્યાઓથી ભારતને બચાવવાનું સારું કામ કર્યું છે.આપણે જોવું પડશે કે વિશ્વમાં શું થઈ રહ્યું છે અને ભારત વિશ્વમાં શું સ્થાન ધરાવે છે.
દુનિયાએ આ પહેલા ક્યારેય આવી મહામારીનો સામનો કર્યો નથી. રોગચાળામાંથી બહાર આવવા માટે દરેક વ્યક્તિ પોતપોતાના સ્તરે શ્રેષ્ઠ પ્રયાસો કરી રહ્યા છે, તેથી હું ભારતના લોકોને શ્રેય આપું છું. ભારતની અર્થવ્યવસ્થા પ્રતિકૂળ પરિસ્થિતિઓમાં પણ સારી છે. ચીનની 4000 બેંકો નાદારીની આરે છે. ભારતમાં અનુસૂચિત વ્યાપારી બેંકોની ગ્રોસ એનપીએ 2022માં 5.9%ના 6 વર્ષની નીચી સપાટીએ છે. ચીનમાં બેંકો નાદારીની આરે છે પરંતુ ભારતમાં એનપીએ ઘટી રહી છે.
નાણાપ્રધાને કહ્યું કે મોંઘવારી ઘટાડવા માટે કઠોળ અને તેલીબિયાં પરની આયાત ડ્યૂટી ઘટાડવામાં આવી છે. મસૂર પરની આયાત ડ્યૂટી 30 ટકાથી ઘટાડીને શૂન્ય કરવામાં આવી છે. સ્ટીલ ઉદ્યોગ માટે પણ કેટલાક કાચા માલમાં કસ્ટમ ડ્યુટીમાં ઘટાડો કરવામાં આવ્યો છે, ત્યારબાદ સ્થાનિક બજારમાં સ્ટીલની કિંમતો નીચે આવી ગઈ છે.
