1960ના દશકની ટેકનોલોજી ધરાવતા આ લડાકુ વિમાનને સેવા નિવૃત્ત કરવાની પ્રક્રિયા સપ્ટેમ્બરથી શરૂ કરી 2025 સુધીમાં પૂર્ણ કરી દેવાશે
અંતે ફ્લાઈંગ કોફીન ગણાતા મિગ-21ને નિવૃત્તિ અપાશે. 1960ના દશકની ટેકનોલોજી ધરાવતા આ લડાકુ વિમાનની સંખ્યા અત્યારે 70 જેટલી છે. તેને સેવા નિવૃત કરવાની પ્રક્રિયા સપ્ટેમ્બરથી શરૂ કરી 2025 સુધીમાં પૂર્ણ કરી દેવાની જાહેરાત થઈ છે.
ભારતીય વાયુસેનાએ તેના કાફલામાં બાકી રહેલા મિગ-21 ફાઇટર સ્ક્વોડ્રનને તબક્કાવાર બહાર કરવા માટે ત્રણ વર્ષની સમયમર્યાદા નક્કી કરી છે. આ સ્ક્વોડ્રનમાંથી એક આ વર્ષે સપ્ટેમ્બરમાં પાછી ખેંચી લેવામાં આવે તેવી ધારણા છે, તેમ જાણકારી ધરાવતા લોકોએ શુક્રવારે જણાવ્યું હતું. તેમણે કહ્યું કે વાયુસેના આગામી પાંચ વર્ષમાં મિગ-29 ફાઈટર જેટના ત્રણ સ્ક્વોડ્રનને તબક્કાવાર બહાર કરવાની યોજના બનાવી રહી છે.
આ સાથે, તેમણે કહ્યું કે સોવિયેત મૂળના એરક્રાફ્ટ કાફલાને તબક્કાવાર બહાર કરવાની યોજના આઈએએફના આધુનિકીકરણ અભિયાનનો એક ભાગ છે અને આ પગલાને રાજસ્થાનના બાડમેરમાં મિગ-21 ક્રેશ સાથે કોઈ લેવાદેવા નથી. આ દુર્ઘટનામાં વિમાનમાં સવાર વિંગ કમાન્ડર એમ રાણા અને ફ્લાઇટ લેફ્ટનન્ટ યુનિક બલના જીવ ગયા હતા. આ ઘટના બાદ જૂનું મિગ એરક્રાફ્ટ ફરી એકવાર સમાચારમાં છે. જાણકારી ધરાવતા લોકોએ કહ્યું કે 2025 સુધીમાં મિગ-21ના તમામ ચાર સ્ક્વોડ્રનને કાફલામાંથી હટાવવાની યોજના છે.
વાયુસેના પાસે 70 જેટલા મિગ-21 લડાકુ વિમાન : વાયુસેનાને આધુનિક બનાવવાનો તખ્તો તૈયાર
શ્રીનગર સ્થિત સ્ક્વોડ્રન નંબર 51 માટે 30 સપ્ટેમ્બરની ’નંબર પ્લેટ’ તૈયાર થઈ જશે. ’નંબર પ્લેટ’ એ સ્ક્વોડ્રનને હટાવવાનો ઉલ્લેખ કરે છે. એક સ્ક્વોડ્રનમાં સામાન્ય રીતે 17-20 એરક્રાફ્ટ હોય છે. આ સ્ક્વોડ્રનને ’સ્વોર્ડઆર્મ્સ’ તરીકે પણ ઓળખવામાં આવે છે. તે 1999 ના કારગિલ યુદ્ધ દરમિયાન ’ઓપરેશન સફેદ સાગર’ તેમજ બાલાકોટ હવાઈ હુમલાના એક દિવસ પછી, 27 ફેબ્રુઆરી 2019 ના રોજ ભારતની જવાબી કાર્યવાહી સામેની ઝુંબેશમાં પણ સામેલ હતું.
વિંગ કમાન્ડર અભિનંદન વર્ધમાન સ્ક્વોડ્રન નંબર 51 ના હતા અને તેમણે હવાઈ અથડામણ દરમિયાન દુશ્મનના ફાઈટર જેટને ઠાર માર્યું હતું. આ માટે તત્કાલિન રાષ્ટ્રપતિ રામનાથ કોવિંદે તેમને ’વીર ચક્ર’થી સન્માનિત કર્યા હતા. અભિનંદન હવે ગ્રુપ કેપ્ટન છે. આઈએએફ કાફલામાં હાલમાં લગભગ 70 મિગ-21 લડાકુ વિમાનો અને 50 મિગ-29 વિમાનો છે. મિગ-21 લાંબા સમયથી ભારતીય વાયુસેનાનું મુખ્ય ફાઇટર એરક્રાફ્ટ રહ્યું છે. જો કે, એરક્રાફ્ટનો તાજેતરનો સલામતી રેકોર્ડ અત્યંત નબળો રહ્યો છે. મિગ એરક્રાફ્ટ 1963 થી એરફોર્સના કાફલામાં છે.
