ગત રાત્રીએ 1 વાગ્યે લાગેલી આગને બુઝાવવા ફાયરની 50થી વધુ ટિમો કામે લાગી, સેનાની મદદ લેવાય : હજુ પણ લબકારા યથાવત : અંદાજે 10 અબજનું નુકસાન
કાનપુરની કાપડ માર્કેટના વિકરાળ આગ લાગવાની ઘટના પ્રકાશમાં આવી છે. જેમાં 600 દુકાનો બળીને ખાખ થઈ ગયાના અહેવાલ મળી રહ્યા છે. ગત રાત્રીએ 1 વાગ્યે લાગેલી આગને બુઝાવવા ફાયરની 50થી વધુ ટિમો કામે લાગી છે. સેનાની મદદ લેવાય છે તેમ છતાં હજુ પણ આગના લબકારા યથાવત છે.આ દુર્ઘટનાથી અંદાજે 10 અબજનું નુકસાન થયાનું જણાવાઈ રહ્યું છે.
કાનપુરમાં બાંસમંડી સ્થિત હમરાજ માર્કેટની બાજુમાં આવેલા એઆર ટાવરમાં ભીષણ આગ લાગી હતી. મોડી રાત્રે સર્જાયેલા અકસ્માતમાં આગએ વિકરાળ સ્વરૂપ ધારણ કર્યું હતું. અનેક ફાયર ફાઇટરો ઘટનાસ્થળે આગ પર કાબૂ મેળવવામાં લાગેલા છે. ટાવર લગભગ છ કલાકથી સળગી રહ્યો છે.આ અકસ્માતમાં પાંચ કોમ્પ્લેક્સ આગથી બળીને ખાખ થઈ ગયા છે. એક અંદાજ મુજબ 10 અબજથી વધુનું નુકસાન થયું છે. આ યુપીનું સૌથી મોટું રેડીમેડ હોલસેલ માર્કેટ છે. ફાયર બ્રિગેડના જવાનો દ્વારા હજુ પણ આગ ઓલવવાના પ્રયાસો ચાલુ છે.
કાનપુરના કમિશનર સ્થળ પર હાજર છે. આજુબાજુના જિલ્લાઓમાંથી પણ મદદ લેવામાં આવી રહી છે. પોલીસના જણાવ્યા અનુસાર પવનને કારણે આગ ઓલવવામાં મુશ્કેલી પડી રહી છે. એરફોર્સ, આર્મી, સીઓડી, ઓર્ડિનન્સના વાહનો પણ ઘટનાસ્થળે પહોંચી ગયા છે.
એઆર ટાવરમાં રેડીમેડ કપડાની હોલસેલ દુકાનો છે. જણાવવામાં આવી રહ્યું છે કે આગ શોર્ટ સર્કિટના કારણે લાગી હતી, જે ધીરે ધીરે આખી બિલ્ડિંગમાં ફેલાઈ ગઈ હતી. પોલીસનું કહેવું છે કે આગના કારણની ઝીણવટભરી તપાસ કરવામાં આવશે.
કાનપુર, ઉન્નાવ અને લખનૌ સહિત અનેક જિલ્લાઓની 50થી વધુ ફાયર બ્રિગેડની ગાડીઓ આગ ઓલવવામાં લાગેલી છે.
