- પ્રિપેઈડ મીટર માટે દિલ્હી દૂર!!
- એડવાન્સ પૈસા ભરવાના આકરા નિયમનું સંસદમાં બિલ પાસ કર્યા વગર કઈ રીતે લાગુ કરી શકાય? ધારદાર મુદા સાથે વિવાદ હાઇકોર્ટમાં પહોંચ્યો
ગુજરાતના અનેક શહેરોમાં વીજ તંત્ર દ્વારા પ્રિપેઇડ મીટર ફરજીયાત લગાવવામાં આવી રહ્યા છે. ગ્રાહકોના ભારે વિરોધ વચ્ચે પણ મીટર બદલાવવામાં આવી રહ્યા હોય તેવામાં આ મામલો હાઇકોર્ટમાં પહોંચ્યો છે. જેમાં મુખ્ય મુદ્દો એ ઉઠાવવામાં આવ્યો છે કે સંસદમાં બિલ પાસ કર્યા વગર એડવાન્સ પૈસા ભરવાનો આકરો નિયમ કઈ રીતે લાગુ કરી શકાય ?
વડોદરાના એક રહેવાસીએ નવા પ્રીપેડ સ્માર્ટ વીજળી મીટર લગાવવાના દબાણને પડકાર્યા બાદ ગુજરાત હાઈકોર્ટે મધ્ય ગુજરાત વિજ કંપની લિમિટેડ સહિત રાજ્ય અને કેન્દ્રીય સત્તાવાળાઓને નોટિસ પાઠવી હતી. આ અરજી વાસુદેવ ઠક્કર નામના વ્યક્તિ દ્વારા દાખલ કરવામાં આવી હતી, જેમાં જણાવ્યું હતું કે તેમની પાસે 10 અલગ-અલગ મિલકતોમાં 11 વીજ જોડાણ છે. તેઓ તેમની મિલકતો પર મનસ્વી રીતે સ્માર્ટ મીટર લગાવવાથી પરેશાન છે. અરજદારે ઇલેક્ટ્રિસિટી એક્ટ, 2003 અને સ્માર્ટ મીટરની જોગવાઈ હેઠળ તેની શક્તિનો ઉપયોગ કરવા માટે સેન્ટ્રલ ઇલેક્ટ્રિસિટી ઓથોરિટી દ્વારા 2019માં જારી કરાયેલ નોટિફિકેશન તરફ કોર્ટનું ધ્યાન દોર્યું હતું. તેમણે કહ્યું કે તેઓ પોસ્ટપેઇડ મીટરથી સંતુષ્ટ છે અને પ્રીપેઇડ સ્માર્ટ મીટર લગાવવા માંગતા નથી.
અરજદારે દલીલ કરી હતી કે સ્માર્ટ મીટર દ્વારા એડવાન્સ ફી વસૂલવાના નિયમો 2019માં બનાવવામાં આવ્યા હતા. જો કે, નિયમો 2003ના અધિનિયમ સાથે સુસંગત નથી, જે મુજબ આવા નિયમોને અમલમાં મૂકતા પહેલા સંસદમાં રજૂ કરવા આવશ્યક છે. તેમણે કહ્યું કે 2019 થી આ સંબંધમાં કોઈ બિલ કે નિયમન સંસદમાં રજૂ કરવામાં આવ્યું નથી. સંસદની મંજૂરી વિના જોગવાઈઓનો અમલ કરવો કાયદેસર નથી અને તેથી સ્માર્ટ મીટર લગાવવાનો નિર્ણય રદ કરવો જોઈએ.
વીજળી પ્રાથમિક જરૂરિયાત, તેનું બિલ એડવાન્સમાં ભરવું મધ્યમવર્ગ ન પરવડે
હજુ પણ સૌરાષ્ટ્ર સહિત ગુજરાતભરમાં મધ્યમ વર્ગની સંખ્યા સૌથી વધુ છે. આ ઉપરાંત ગરીબ વર્ગ પણ નોંધપાત્ર છે. તેઓ આખા મહિનાના બજેટ પ્રમાણે ઘર ચલાવતા હોય છે. કોઈ એક વસ્તુનો ખર્ચ વધે તો તેઓનું બજેટ ખોરવાય જતું હોય છે. તેવામાં વીજ તંત્રના પ્રિપેઇડ મીટરમાં એડવાન્સમાં પૈસા ભરવા તેમને પોષાય તેમ નથી. વીજ તંત્રએ એ પણ ધ્યાનમાં રાખવાની જરૂર છે કે વીજળી એ પ્રાથમિક જરૂરિયાત છે. જેમાં નફા કે સરળતાને અવગણી લોકોની જરૂરિયાત સમજીને નિર્ણયો લેવા જોઈએ.
હાઇકોર્ટે એમજીવીસીએલ, પાવર મિનિસ્ટ્રી અને કેન્દ્ર ઓથોરિટી પાસેથી 8 ઓગસ્ટ સુધીમાં જવાબ માંગ્યો
અરજદાર ઠક્કરને સાંભળ્યા બાદ જસ્ટિસ સંગીતા વિષને એમજીવીસીએલના મેનેજિંગ ડિરેક્ટર, પાવર મિનિસ્ટ્રી અને સેન્ટ્રલ ઇલેક્ટ્રિસિટી ઓથોરિટીના ચેરમેનને નોટિસ પાઠવી હતી. કોર્ટે તેમની પાસે 8 ઓગસ્ટ સુધીમાં જવાબ માંગ્યો છે, ત્યારબાદ વધુ સુનાવણી નક્કી કરવામાં આવી છે. ઠક્કરે પોતાનો કેસ પક્ષકાર તરીકે રૂબરૂમાં રજૂ કર્યો હતો. તેમણે તેમની અરજી ગુજરાતીમાં રજૂ કરી અને નિયમ તરફ ધ્યાન દોર્યું કે જેઓ તેમનો કેસ રજૂ કરે છે તેમને તેમની અરજી ગુજરાતીમાં રજૂ કરવાની અને કોર્ટને ગુજરાતીમાં સંબોધવાની છૂટ છે.
