ઉત્તરપ્રદેશમાં ચૂંટણી જંગ: ભાજપ અને સમાજવાદી પાર્ટી વચ્ચે કેમ કાંટાની ટક્કર 

અબતક, નવી દિલ્હી

2022ની ઉત્તર પ્રદેશ વિધાનસભાની ચૂંટણીમાં અખિલેશ યાદવની આગેવાની હેઠળની સમાજવાદી પાર્ટી સત્તાધારી ભાજપની મુખ્ય પ્રતિસ્પર્ધી તરીકે ઉભરી હોવાનું જણાય છે. બીજી તરફ, માયાવતીના નેતૃત્વવાળી બહુજન સમાજ પાર્ટી અને કોંગ્રેસ પણ ભાજપ સરકાર સામે ગંભીર પડકાર ઊભો કરવા માટે સંઘર્ષ કરી રહી હોવાનું જણાય છે.

વર્તમાન રાજકીય પરિદ્રશ્યમાં ભાજપના મુખ્ય પ્રતિસ્પર્ધી તરીકે જોવામાં સપા અન્ય બે કરતા આગળ હોવાનું જણાય છે.યોગી આદિત્યનાથ અને અખિલેશ યાદવ બન્ને મુસ્લિમોના મત લેવા પણ સતત પ્રયત્નશીલ છે. ભાજપ સપાને તેના સૌથી નજીકના પ્રતિસ્પર્ધી તરીકે માને છે તેનું કારણ એ છે કે અખિલેશ યાદવની પાર્ટીનું પ્રદર્શન વર્ષ 2007 સિવાયની છેલ્લી ચાર વિધાનસભા ચૂંટણીઓમાં અને 2014ની લોકસભાની ચૂંટણીઓમાં શ્રેષ્ઠ રહ્યું છે.

રાજ્યમાં 19 ટકા વસતી મુસ્લિમોની અને 10 ટકા વસતી યાદવોની,
આ બન્નેનો ઝુકાવ અખિલેશની પાર્ટી તરફ હોવાથી તે ભાજપની સૌથી નજીકની પ્રતિસ્પર્ધી પાર્ટી

વધુમાં, અન્ય પક્ષોથી વિપરીત સપા પાસે મુસ્લિમો અને યાદવની મજબૂત વોટ બેંક છે. યુપીની 25 કરોડની વસ્તીમાં મુસ્લિમોની સંખ્યા 19 ટકા છે.  રાજ્યની વસ્તીના 41 ટકા ઓબીસીનો સમાવેશ થાય છે, જ્યારે યાદવોની વસ્તીની ટકાવારી લગભગ 10 ટકા છે.2001માં યુપીનું વિભાજન થયું અને તેમાંથી અલગ રાજ્ય ઉત્તરાખંડ બનાવવામાં આવ્યું.  વિભાજન પછી 2002માં યોજાયેલી પ્રથમ ચૂંટણીમાં, સપાએ 143 બેઠકો જીતી હતી અને 25.37 ટકા મત મેળવ્યા હતા.  બસપા 98 બેઠકો જીતીને અને 23.06 ટકા મતો મેળવીને બીજા ક્રમે છે. ભાજપે 88 બેઠકો જીતી હતી. અને 20.08 ટકા મતો મેળવ્યા હતા.  જ્યારે કોંગ્રેસે 25 બેઠકો જીતી હતી અને 8.96 ટકા મત મેળવ્યા હતા.

2007માં બસપાને 206 બેઠકો મળી હતી અને 30.43 ટકા મત મળ્યા હતા. સપા 97 બેઠકો જીતીને અને 25.43 ટકા વોટ શેર મેળવીને બીજા ક્રમે હતું, ભાજપે 51 બેઠકો જીતી હતી અને 16.97 ટકા વોટ શેર મેળવ્યા હતા. જ્યારે કોંગ્રેસે 22 બેઠકો જીતી હતી અને 8.61 ટકા મત મેળવ્યા હતા.2012માં, સપાએ 224 બેઠકો જીતી હતી અને 29.13 ટકા મત મેળવ્યા હતા.  ચૂંટણી પરિણામો જાહેર થયા બાદ અખિલેશ યાદવ મુખ્યમંત્રી બન્યા.

બસપા એ 80 બેઠકો જીતી અને 25.91 ટકા મત મેળવ્યા, ભાજપે 47 બેઠકો જીતી અને 15 ટકા મત મેળવ્યા,  જ્યારે કોંગ્રેસને 28 બેઠકો મળી હતી અને 11.65 ટકા મત મળ્યા હતા. 2017માં, જ્યારે ભાજપે કુલ 403 બેઠકોમાંથી 312 બેઠકો જીતી હતી અને 39.67 ટકા મત મેળવ્યા હતા.  સપાએ 47 બેઠકો જીતી અને 21.82 ટકા મત મેળવ્યા હતા. બસપાએ 19 બેઠકો જીતી અને 22.23 ટકા મત મેળવ્યા હતા અને કોંગ્રેસે 7 બેઠકો જીતી અને 6.25 ટકા મત મેળવ્યા હતા.