છેલ્લા 4 મહિનામાં લીટર દીઠ ભાવમાં રૂ. 15થી 25નો ઘટાડો : હવે સ્થાનિક માર્કેટો સુધી ઘટાડો પહોંચે તેની જોવાતી રાહ
છેલ્લા ચાર મહિનામાં ખાદ્ય તેલના ભાવ સડસડાટ ઘટ્યા છે. લિટર દીઠ અંદાજે રૂ. 15-25નો ઘટાડો થયો છે.હજુ પણ ભાવમાં વધુ ઘટાડો થઈ શકે છે.હવે નવી ઘટેલી કિંમતો ટૂંક સમયમાં સ્થાનિક માર્કેટોમાં લાગુ થશે.
મોંઘવારીથી પરેશાન લોકો માટે રાહતના સમાચાર આવ્યા છે. આગામી દિવસોમાં ખાદ્યતેલોના ભાવમાં વધુ ઘટાડો થઈ શકે છે. ઈન્ડોનેશિયાએ પામ ઓઈલની નિકાસને પ્રોત્સાહન આપવા માટે મોટો નિર્ણય લીધો છે. 31 ઓગસ્ટ સુધીમાં ઈન્ડોનેશિયાએ પામ ઓઈલના તમામ ઉત્પાદનો પરની કસ્ટમ ડ્યુટી નાબૂદ કરી છે. ઈન્ડોનેશિયા વિશ્વનો સૌથી મોટો પામ ઓઈલ નિકાસ કરતો દેશ છે. બીજી તરફ વિદેશી બજારોમાં ખાદ્યતેલોના ભાવ તૂટ્યા છે. તાજેતરમાં, સરકારે તેની કિંમતોમાં ઘટાડા અંગે ચર્ચા કરવા માટે તેલ ઉદ્યોગના પ્રતિનિધિઓ સાથે બેઠક કરી હતી.
વિદેશી બજારોમાં ખાદ્યતેલના ભાવમાં તૂટવાની અસર હાલમાં દેશના છૂટક બજારમાં દેખાઈ રહી નથી. અત્યાર સુધી તેલની મહત્તમ છૂટક કિંમતમાં કોઈ ઘટાડો થયો નથી. ઓઈલના વૈશ્વિક ભાવમાં થયેલા ઘટાડાનો લાભ ગ્રાહકોને મળવાનો બાકી છે.
સરકારે આયાત ડ્યુટી ઉપર મુક્યો કાપ
ગત શુક્રવારે સરકારે ક્રૂડ પામ ઓઇલની આયાત ડ્યૂટીમાં 100 રૂપિયા પ્રતિ ક્વિન્ટલનો ઘટાડો કર્યો હતો. તે જ સમયે, સોયાબીન ડેગમની આયાત જકાતમાં પ્રતિ ક્વિન્ટલ રૂ. 50 અને પામોલિન તેલ પર રૂ. 200 પ્રતિ ક્વિન્ટલનો ઘટાડો કરવામાં આવ્યો હતો. વિદેશી બજારોમાં સોયાબીન તેલ-તેલીબિયાંના ભાવમાં પણ ઘટાડો જોવા મળ્યો હતો.
છૂટક બજારમાં ભાવ ઘટાડાની અસર હજુ નથી થઈ : સરકાર હરકતમાં
ઓઈલ કંપનીઓના પ્રતિનિધિઓ સાથે યોજાયેલી બેઠકમાં સરકારે એમઆરપીમાં લગભગ 15 રૂપિયા પ્રતિ લિટરનો ઘટાડો કરવાનો નિર્દેશ આપ્યો હતો. પરંતુ હજુ સુધી રિટેલ ભાવમાં કોઈ ઘટાડો જોવા મળ્યો નથી. સરકાર ઈચ્છે છે કે વિદેશી બજારમાં સસ્તા તેલનો લાભ સામાન્ય લોકોને પણ મળવો જોઈએ. પણ અત્યારે એવું થતું હોય એવું લાગતું નથી. જૂનમાં પણ ખાદ્ય તેલ બનાવતી કંપનીઓએ એમઆરપીમાં ઘટાડો કરવાની જાહેરાત કરી હતી.
ઇન્ડોનેશિયાનો નિકાસ વેરો ઘટાડવાનો નિર્ણય ભારત ઉપર અસર કરશે
ભારતે મે મહિનામાં 6,60,000 ટન પામ ઓઈલની આયાત કરી હતી. ભારત વિશ્વનો સૌથી મોટો પામ ઓઈલ આયાત કરનાર દેશ છે. ઈન્ડોનેશિયા દ્વારા પામ ઓઈલની નિકાસ જકાત ઘટાડવાની અસર ભારતમાં જોવા મળી શકે છે. ભારત ઇન્ડોનેશિયા પાસેથી વાર્ષિક આશરે 8 મિલિયન ટન પામ ઓઇલ ખરીદે છે. ભારતીય બજારમાં ખાદ્ય તેલના કુલ વપરાશમાં પામ તેલનો હિસ્સો 40 ટકા જેટલો છે.
