- આર્થિક ભીંસ ભાંગવા થાર કાર લૂંટી જનાર કુખ્યાત બેલડીને ઝડપી લેતી માલવિયાનગર પોલીસ
- કાર ગીરવે મૂકી રોકડી કરી લેવાના ઇરાદે લૂંટ ચલાવ્યાની કબૂલાત
- મિત ઉર્ફે ભાજી અને પ્રિતેશ ઉર્ફે દીકુ હત્યાની કોશિશ સહિતના ગુનામાં પોલીસ ચોપડે ચડી ચૂકેલા ગુનેગારો
- નીચે ઉતરી જાવ નહીંતર બંને ભાઈઓને છરી ઝીંકી પતાવી દઈશું : બેલડીની ધમકી
ટ્રાવેલ્સ શહેરના મવડી મેઈન રોડ પરથી ધોળા દિવસે છરીની અણીએ થાર કારની દિલધડક લૂંટનો બનાવ બનતા ખળભળાટ મચી ગયો હતો અને પોલીસમાં દોડધામ મચી ગઇ હતી. જો કે, માલવીયાનગર પોલીસે ગણતરીની કલાકોમાં આરોપી સુધી પહોંચી જઈ નામચીમ મિત ઉર્ફે ભાજી અને પ્રિતેશ ઉર્ફે દિકુ નામના શખ્સોને દબોચી લઇ થાર કાર કબ્જે કરી હતાં. આર્થિક ભીંસ દૂર કરવા લૂંટ કર્યાની બેલડીએ કબુલાત આપી હતી.
મામલામાં નાના મવા મેઈન રોડ પર લક્ષ્મીનગર મેઈન રોડ પર રહેતાં ધ્રુવેનસિંહ કૃપાલસિંહ જેઠવા (ઉ.વ.22) એ નોંધાવેલ ફરીયાદમાં આરોપી તરીકે બે અજાણ્યાં શખ્સોના નામ આપતા માલવીયાનગર પોલીસે લૂંટ સહિતની કલમ હેઠળ ગુનો નોંધી તપાસ હાથ ધરી હતી.વધુમાં ફરીયાદીએ જણાવ્યું હતું કે, તે ટ્રાવેલ્સનો ધંધો કરે છે. તેમના મિત્ર ધવલભાઈ મુકેશભાઈ સરધારાને તે છેલ્લા પાંચેક માસથી ઓળખે છે. ઘણી વખત તેઓ પાસે ભાડે કાર લેવા માટે કસ્ટમર આવે ત્યારે તેઓ ધવલ પાસેથી તેમની થાર કાર ભાડેથી લઈ કસ્ટમરને આપે છે.
ગત તા.24 ના ધવલની થાર કાર જેના નં. જીજે-02-એનએફ-6177 ફરિયાદીના નાનાભાઈ મિતરાજસિંહ ઓપરેશન કરાવેલ હોય જેથી તેને હોસ્પીટલ લઈ જવા માટે તેઓ વાપરવા માટે લાવેલ હતો. ગઈકાલે બપોરના સાડા બારેક વાગ્યાની આસપાસ તેઓ અને તેનો નાનો ભાઈ મિતરાજસિંહ થાર કાર લઈ ઘરેથી ધવલ સરધારાની મવડી ચોકડી શીવાલીક કોમ્પલેક્ષ પાંચમા માળે બાઈક રેન્ટ નામની ઓફીસે ગયેલ હતા. બપોરના 12/50 વાગ્યાની આસપાસ ત્યાથી ઘરે પરત જતા હતા. ત્યારે મવડી મેઈન રોડ પર આવેલ મોમાઈ પાન પાસે પહોચેલ ત્યારે અચાનક એક આઈ-20 સફેદ કલરની કાર ઉદયનગર બાજુથી નીકળી તેઓની કારની આડી રાખી દીધેલ હતી.તે કારમાં બે વ્યક્તિ બેસેલ હતા, તે બંન્નેમાથી પાતળા વ્યક્તિ પાસે છરી હતી અને છરીના ઈશારાથી તેમને થાર ગાડીમાથી નીચે ઉતરવાનું જણાવેલ પરંતુ તેઓ થાર કારમાથી નીચે ઉતરેલ ન હતો. જેથી બંન્ને વ્યક્તિ થાર કાર પાસે આવી કારનો કાચ ખુલ્લો હતો ત્યાંથી બંન્નેમાથી એક વ્યક્તિ જે શરીરે જાડો હતો તેણે થાર ગાડીની ચાવી કાઢી લઈ અને તેની સાથેનો પાતળો વ્યક્તિ ગાળો બોલી કહેલ કે, આ થાર કાર ધવલ સરધારાની છે તે અમને ખબર છે, અને અમારે લઈ જવાની છે તમો બંન્ને નીચે ઉતરી જાવ તેમ કહેતા યુવાન કારમાથી નીચે ઉતરી ગયેલ અને તેનો નાનો ભાઈ કારમા જ બેસી રહેલ હતો. આરોપીઓએ કહેલ કે, તું અમારી કારમા બેસી જા હું ધવલ સરધારા સાથે વાત કરાવી આપું, જેથી યુવાન તેની કારમા બેસી જતા આઈ-20 કાર એક પાતળો વ્યક્તિ ચલાવતો હતો અને અલ્કા સોસાયટી શેરી નં-05 મા ગયેલ ત્યાં છરી બતાવી કહેલ કે, કારમાથી ઉતરી જા અને તારા ભાઈને પણ ઉતારી દે નહીતર આ છરીના ઘોદા મારી તને અને તારા ભાઈને પતાવી દઈશું તેમ કહી ધક્કો મારી તેની કારમાંથી ઉતારી દીધેલ હતો. બાદમાં તેને તેના ભાઈને આ લોકોથી બચવા થાર ગાડીમાથી ઉતારી લેતા આ આરોપી છરી બતાવી ગાળો દઈ થાર કાર લઈને ભાગી ગયેલ હતા.
જેથી યુવાને તુરંત જ થાર કારના માલીક ધવલભાઈ સરધારાને કોલ કરી બનાવ બાબતે જણાવી પોલીસમા ફોન કરેલ હતો. થોડીવારમા પોલીસ બનાવ સ્થળે આવી જતા સમગ્ર બનાવની પોલીસને જાણ કરતાં પોલીસે ગુનો નોંધી તપાસ આદરી હતી.
બનાવની ગંભીરતા દાખવી શહેર પોલીસ કમિશ્નર બ્રજેશકુમાર ઝા, એડી. સીપી મહેન્દ્ર બગડીયા, ડીસીપી જગદીશ બાંગરવા, એસીપી રાધીકા ભારાઈ દ્વારા આરોપીને પકડવાની આપેલ સૂચનાથી માલવીયાનગર પોલીસ મથકના પીઆઈ જે.આર.દેસાઈના માર્ગદર્શન હેઠળ પીએસઆઈ ડી.એસ.ગજેરાની ટીમે સીસીટીવી કેમેરા અને બાતમીદારોના આધારે તપાસ હાથ ધરતાં તથા કર્મચારીઓ આરોપીઓને શોધી કાઢવા હેડ કોન્સ્ટેબલ અજય વિકમા, ભાવેશ ગઢવી, મનીષ સોઢીયા અને જયદિપસિંહ ભટ્ટીને થાર કાર નં. જીજે-03-એનએફ-6177ની લુંટ કરીને બે અજાણ્યા ઇસમો હાલ કાંગશીયાળી મેઇન રોડ તપન હાઇટર્સ સામે ખુલ્લા મેદાનમાં ઉભેલ છે, તેવી મળેલ ચોક્કસ બાતમીના આધારે ટીમે દોડી જઈ બંને શખ્સોની ધરપકડ કરી નામ પૂછતાં મિત ઉર્ફે ભાજી રમેશ ખગ્રામ (ઉવ.28, રહે. શ્રી નાથજી સોસાયટી શેરી નં ર વિશ્વેશ્વર મંદિર સામે મવડી મેઇન રોડ) અને તેની સાથેના શખ્સે પોતાનું નામ પ્રિતેશ ઉર્ફે દિકુ અલ્પેશ ગોટેચા (ઉ.વ.23, રહે. મારૂતીનંદનનગર શેરી નં.ર બ્લોક નં.50, વિશ્વેશ્વર મંદિર પાછળ) જણાવતાં તેની પાસેથી રૂ.7 લાખની થાર કાર કબ્જે કરી પૂછતાછ આદરી હતી.
વધુમાં પોલીસમાંથી પ્રાપ્ત વિગત અનુસાર આરોપી મિત ઉર્ફે ભાજી ગુનાહિત ઈતિહાસ ધરાવે છે અને તેની પાસે રૂપીયા ન હોવાથી આર્થિક ખેંચ દૂર કરવા તેણે કારની લૂંટ ચલાવી હતી. અગાઉથી તેને જાણ હતી કે, થાર કારનો મૂળ માલિક ધવલ સરધારા રૂપીયા વાળો માણસ છે અને આ ગાડી તેની છે તે લૂંટીને ગીરવે મૂકી દેશું, બાદમાં ધવલ તે ગાડી છોડાવી લેશે અને પોતાની આર્થિક ખેંચ દૂર થઈ જશે તેવા ઈરાદાથી લૂંટ ચલાવી હતી. ઉલ્લેખનીય છે કે, મિત ઉર્ફે ભાજી વિરુદ્ધ હત્યાનો પ્રયાસ સહિત સાત ગુના અને પ્રીતેષ ઉર્ફે દિકુ વિરુદ્ધ પણ હત્યાના પ્રયાસ સહિત 13 ગુના અને બે વખત પાસામાં પણ જેલની હવા ખાઈ ચુક્યો છે.
