પેરિસ પેરાલિમ્પિકમાં ભારતે મેડલની સંખ્યા 24 પર પહોંચાડી દીધી છે. 4 સપ્ટેમ્બરે 4 ખેલાડીઓએ દેશ માટે મેડલ જીત્યા હતા. દિવસની રમત સમાપ્ત થાય તે પહેલા, ધરમવીરે ક્લબ થ્રોમાં ગોલ્ડ મેડલ જીત્યો હતો જ્યારે પ્રણવ સુરમાએ સિલ્વર મેડલ જીત્યો હતો.
પેરિસ પેરાલિમ્પિકમાં ભારતીય ખેલાડીઓનો ઝળકો જારી રહ્યો છે. મોડી રાત્રે કલબ થ્રોમાં દેશને બેવડી ખુશી મળી હતી. ભારતે આ ઈવેન્ટમાં ગોલ્ડ અને સિલ્વર બંને જીત્યા હતા. ભારત માટે ધરમબીરે 34.92 મીટરના થ્રો સાથે ગોલ્ડ મેડલ જીત્યો હતો જ્યારે પ્રણવ સુરમાએ 34.59ના શ્રેષ્ઠ થ્રો સાથે સિલ્વર મેડલ જીત્યો હતો. ભારતે પેરિસ પેરાલિમ્પિક્સમાં તેના પ્રદર્શનમાં સુધારો કર્યો અને 24મો મેડલ જીત્યો. ભારત હવે 5 ગોલ્ડ, 9 સિલ્વર અને 10 બ્રોન્ઝ સાથે મેડલ ટેલીમાં 13માં સ્થાને પહોંચી ગયું છે.
પેરિસ પેરાલિમ્પિક્સના ત્રીજા દિવસે ભારત માટે મેડલનો ધમધમાટ જોવા મળ્યો હતો. છેલ્લા ત્રણ દિવસમાં ભારતે તેના મેડલની સંખ્યા 7 થી વધારીને 24 કરી દીધી છે. રમતોના 7મા દિવસે, ભારતીય ખેલાડીઓએ કુલ 4 મેડલ જીત્યા, જેમાંથી 2 ગોલ્ડ અને 2 સિલ્વર મેડલ હતા.
ભારત માટે, દિવસની શરૂઆત સચિને સિલ્વર મેડલ જીતીને કરી અને ગોલ્ડ, સિલ્વર સાથે સમાપ્ત થયો. તીરંદાજ હરવિંદર સિંહે ગોલ્ડ જીતીને ઈતિહાસ રચ્યો હતો, જ્યારે દિવસની રમત પૂરી થાય તે પહેલા ધરમબીર સિંહે ગોલ્ડ અને પ્રણવે સિલ્વર મેડલ જીત્યો હતો. અત્યાર સુધીમાં ભારતે આ પેરાલિમ્પિક્સમાં 5 ગોલ્ડ સહિત કુલ 24 મેડલ જીત્યા છે, જે અત્યાર સુધીનું સર્વશ્રેષ્ઠ પ્રદર્શન છે.
મેન્સ ક્લબ થ્રો F51માં ભારતના ધરમબીરે ચોથા પ્રયાસમાં 34.92 મીટરનો થ્રો કર્યો હતો. જે આ ઈવેન્ટમાં નિર્ણાયક સાબિત થયો અને દેશ માટે ગોલ્ડ મેડલ લાવ્યો. પ્રણવે તેના પહેલા જ પ્રયાસમાં 34.59 મીટર ફેંક્યો હતો પરંતુ તેનાથી આગળ વધી શક્યો ન હતો. આ ઈવેન્ટમાં સર્બિયાના ઝેલ્ફો દિમિત્રીજેવિકે બ્રોન્ઝ મેડલ જીત્યો હતો. ભારતના અમિત કુમાર 10મા સ્થાને છે.
