બે વર્ષમાં મોંઘવારી દરને ઘટાડી 4%થી પણ નીચે લઈ જવા રિઝર્વ બેન્ક અને સરકાર પ્રયત્નશીલ
મોંઘવારી દર સતત ઘટી રહ્યો છે. એક સમયે આ દર 7.8 ટકાએ હતો. જે જુલાઈ મહિનામાં 6.71 ટકાએ પહોચ્યો છે. સરકારે અર્થતંત્રને મજબૂત બનાવવાના તમામ પ્રયાસો કર્યા જે સફળ નિવડતા હવે મોંઘવારી અને ફુગાવો સંપૂર્ણ અંકુશમાં આવી જશે. બે વર્ષમાં આ દર 4 ટકાથી નીચે આવવાના પ્રયાસો કરવામાં આવી રહ્યા છે. આ વાતની પુષ્ટિ ખુદ આરબીઆઇના ગવર્નરે પણ કરી છે.
રિઝર્વ બેંક ઓફ ઈન્ડિયાના ગવર્નર શક્તિકાંત દાસે એક ઈન્ટરવ્યુમાં કહ્યું હતું કે, ફુગાવાને અંકુશમાં લેવા માટે આરબીઆઈના પ્રયાસોએ તેમના પરિણામો દર્શાવ્યા છે, પરંતુ તે હજુ પણ 6 ટકાની મર્યાદાથી ઉપર છે. અમે ધીમે ધીમે મોંઘવારી દરને 4 ટકા સુધી નીચે લાવવાના તમામ પ્રયાસો કરીશું. આ માટે અર્થવ્યવસ્થાના વિકાસ પર કોઈ અસર ન પડે તેનું પણ ધ્યાન રાખવામાં આવશે.
આગળ જતાં ઊંચા ફુગાવાને નિયંત્રિત કરવામાં આવશે. આ સિવાય દેશની આર્થિક સ્થિતિ પહેલા કરતા સારી દેખાઈ રહી છે. કેન્દ્રીય બેંકે રોગચાળા પછી ઝડપી અને યોગ્ય પગલાં લીધાં છે. કાચા તેલની સાથે અન્ય ચીજવસ્તુઓના ભાવ પણ નીચે આવી રહ્યા છે. તેમણે કહ્યું કે નાણાકીય સ્થિરતા અંગે કોઈ ચિંતા નથી અને આરબીઆઈ પરિસ્થિતિના આધારે નિર્ણય લઈ રહી છે.
બેંકોની સ્થિતિ મજબૂત, તેના નાણાકીય પરિણામો પણ સારા
બેંકોના ખાનગીકરણના મામલે દાસે કહ્યું કે નિયમનકાર તરીકે અમે માર્ગદર્શિકા નક્કી કરી છે. તે દિશાનિર્દેશોનું પાલન થાય તે સુનિશ્ચિત કરવાનું અમારું કામ છે જેથી બેંકિંગ ક્ષેત્ર સુવ્યવસ્થિત રીતે કાર્ય કરવાનું ચાલુ રાખે. બેંકો મજબૂત છે અને તેઓ સારી રીતે મૂડીકૃત છે. અમે સુનિશ્ચિત કરીએ છીએ કે તેમના નાણાકીય પરિમાણો યોગ્ય છે. અમે બેંકોની માલિકી પ્રત્યે તટસ્થ છીએ. તેમની માલિકી કોની છે તેની અમને પરવા નથી.
ચાલુ ખાતાની ખાધ સારી સ્થિતિમાં, કોઈ નાણાકીય સમસ્યા નથી
દાસે કહ્યું કે બોન્ડની કામગીરી સારી રીતે ચાલી રહી છે. જ્યારે માર્કેટમાં કોઈ ગડબડ હશે ત્યારે જ અમે દરમિયાનગીરી કરીશું. દેશની ચાલુ ખાતાની ખાધ હાલમાં સારી સ્થિતિમાં છે અને કોઈ નાણાકીય સમસ્યા નથી. તેમણે ક્રિપ્ટોકરન્સી પર કહ્યું કે યોગ્ય સમયે અમે લોકોને ચેતવણી આપી છે. આ ચલણ નાણાકીય અસ્થિરતા તરફ દોરી શકે છે. દાસે કહ્યું કે આરબીઆઈ ફિનટેક કંપનીઓને પ્રોત્સાહન આપવાના પક્ષમાં છે. અમે ફિનટેકમાં નવીનતાને પ્રોત્સાહિત કરવા માટે ખાસ પ્રતિબદ્ધ છીએ. જો કે, તેના જોખમને ધ્યાનમાં રાખીને, નિયમનકારી વ્યવસ્થા જરૂરી છે.
પ્રથમ ક્વાર્ટરમાં જીડીપીમાં વૃદ્ધિ આવવાના અણસાર
જીડીપી પ્રથમ ત્રિમાસિક એટલે કે એપ્રિલ-જૂનમાં 15.7 ટકાના દરે વૃદ્ધિ પામી શકે છે. આવી વૃદ્ધિ દર્શાવતા ઘણા ચિહ્નો છે. એસબીઆઈના રિપોર્ટ અનુસાર, વૈશ્વિક ચિંતાઓ, ઉચ્ચ ફુગાવો અને અન્ય ભૌગોલિક-રાજકીય સમસ્યાઓ હોવા છતાં, અર્થવ્યવસ્થા સારી રીતે આગળ વધતી રહેશે. જીડીપીના આંકડા 31 ઓગસ્ટે જાહેર કરવામાં આવશે.
વિદેશી રોકાણકારોએ ભારતીય શેરબજાર માટે તિજોરી ખોલી
વિદેશી રોકાણકારોએ ભારતીય શેરબજાર માટે ફરી એકવાર તેમની તિજોરીઓ ખોલી છે. વિદેશી રોકાણકારો ભારતીય શેરબજારમાં મોટા પ્રમાણમાં રોકાણ કરી રહ્યા છે. નોંધનીય છે કે ભારતીય શેરબજારમાં નવ મહિના સુધી ભારે વેચવાલી બાદ વિદેશી રોકાણકારોએ જુલાઈ મહિનાથી રોકાણ કરવાનું શરૂ કર્યું હતું. હવે ઓગસ્ટ મહિનામાં તેણે પોતાનું રોકાણ વધુ વધાર્યું છે.
વિદેશી પોર્ટફોલિયો રોકાણકારો એ ઓગસ્ટમાં અત્યાર સુધીમાં આશરે રૂ. 44,500 કરોડનું રોકાણ કર્યું છે. યુ.એસ.માં નીચી ફુગાવા અને ડોલર ઇન્ડેક્સમાં ઘટાડા વચ્ચે ભારતીય બજારોમાં તેમનો વિશ્વાસ વધ્યો છે.ડિપોઝિટરી ડેટા અનુસાર, એફપીઆઈનું જુલાઈ મહિનામાં લગભગ રૂ. 5,000 કરોડનું ચોખ્ખું રોકાણ હતું. તે જ સમયે, ઓગસ્ટમાં અત્યાર સુધીમાં વિદેશી રોકાણકારોએ 44 હજાર કરોડ રૂપિયાથી વધુનું રોકાણ કર્યું છે. જુલાઈની સરખામણીમાં આ લગભગ નવ ગણું છે. આ મહિનાના બાકીના દિવસોમાં રોકાણ વધુ વધે તેવી શક્યતા છે.
