ભારત અને અમેરિકાએ 5મી 2+2 મંત્રી સ્તરીય મંત્રણામાં આતંકવાદનો ખાત્મો બોલાવી દેવા ઈઝરાયલને સમર્થન આપ્યું છે. બંને દેશો વ્યાપક વૈશ્વિક અને વ્યૂહાત્મક ભાગીદારીને વધુ મજબૂત કરવા માંગે છે. બંને દેશોના સંરક્ષણ અને વિદેશ મંત્રીઓએ ક્વાડ-જેવી મિકેનિઝમ દ્વારા મુક્ત, ખુલ્લા અને સમાવિષ્ટ ઈન્ડો-પેસિફિક માટે તેમની પ્રતિબદ્ધતાની પુનઃ પુષ્ટિ કરી છે. બંને દેશોએ સ્પષ્ટ કહ્યું કે, ચીનની આક્રમકતાનો સામનો કરવા માટે ભારત અને અમેરિકા વ્યૂહાત્મક મુદ્દાઓ પર સહમત છે.
પાકિસ્તાન-ચીનનો ઉલ્લેખ કર્યા વિના બંને દેશોએ આતંકવાદને પોષવા બાબતે સ્પષ્ટ ચેતવણી આપી
ભારત અને યુએસએ 5મી 2+2 મંત્રી સ્તરીય સંવાદમાં સંરક્ષણ અને સુરક્ષા સહયોગ વધારવા અને વેપાર અને તકનીકી ભાગીદારીને ગાઢ બનાવવાની રીતો પર ચર્ચા કરી છે. બંને દેશોએ કહ્યું કે તેઓ તેમની વ્યાપક વૈશ્વિક અને વ્યૂહાત્મક ભાગીદારીને વધુ મજબૂત કરવા માંગે છે.
આ 2+2 સંવાદમાં બંને દેશોના ધ્યાનનો એક વિષય આતંકવાદને રોકવાનો હતો. બંને દેશોએ હમાસનું નામ લીધા વગર સંયુક્ત રીતે આતંકવાદી હુમલા સામે ઈઝરાયેલને સમર્થન આપવાની જાહેરાત કરી હતી. જો કે 2+2 સંવાદમાં જારી કરાયેલા સંયુક્ત નિવેદનમાં પાકિસ્તાનનું નામ લેવામાં આવ્યું ન હતું પરંતુ કહેવામાં આવ્યું હતું કે તેણે પોતાની ધરતીનો ઉપયોગ આતંકવાદી ગતિવિધિઓ માટે ન થવા દેવો જોઈએ. સંરક્ષણ પ્રધાન રાજનાથ સિંહે કહ્યું કે ભારત-અમેરિકા વ્યૂહાત્મક ભાગીદારીની વિશેષતા પરસ્પર વિશ્વાસ છે. સિંહે તેમના અમેરિકન સમકક્ષ લોયડ ઓસ્ટિન સાથે દ્વિપક્ષીય બેઠક પણ કરી હતી. આ બેઠક ભારત અને અમેરિકા વચ્ચે ‘ટુ પ્લસ ટુ’ મંત્રી સ્તરીય સંવાદની પાંચમી આવૃત્તિના સમાપન પછી તરત જ થઈ હતી.
પૂર્વ લદ્દાખમાં ભારત અને ચીન વચ્ચે ત્રણ વર્ષથી વધુ જૂના સરહદ વિવાદ તેમજ હિંદ મહાસાગર ક્ષેત્રમાં ચીનના સૈન્ય જહાજોની વધતી ઘૂસણખોરી અંગેની ચિંતા વચ્ચે સંરક્ષણ પ્રધાન રાજનાથ સિંહની ટિપ્પણીઓ આવી છે. દ્વિપક્ષીય વાટાઘાટોમાં તેમની શરૂઆતની ટિપ્પણીમાં સિંઘે જણાવ્યું હતું કે, ભારત-યુએસ સંરક્ષણ સંબંધ વ્યૂહાત્મક ભાગીદારીમાં વિકસિત થયો છે જે પરસ્પર વિશ્વાસ, વહેંચાયેલ મૂલ્યો અને પ્રાદેશિક અને વૈશ્વિક સુરક્ષા જાળવવામાં પરસ્પર હિતોની વધતી માન્યતા દ્વારા વર્ગીકૃત થયેલ છે.
વાટાઘાટો પછી મીડિયા બ્રીફિંગમાં, ઓસ્ટિને કહ્યું કે બંને પક્ષોએ ચીન દ્વારા ઉભા થઈ રહેલા સુરક્ષા પડકારો વિશે વાત કરી. સંરક્ષણ મંત્રાલયે એક નિવેદનમાં જણાવ્યું હતું કે સિંહ અને ઓસ્ટીને સંરક્ષણ અને વ્યૂહાત્મક મુદ્દાઓ પર વ્યાપક ચર્ચા કરી હતી. તેમાં કહેવામાં આવ્યું છે કે સંરક્ષણ ઔદ્યોગિક સહયોગને વધારવા અને બંને પક્ષોના સંરક્ષણ ઉદ્યોગોને સહયોગી રીતે સંરક્ષણ પ્રણાલીઓના સહ-વિકાસ અને સહ-ઉત્પાદન માટે સક્ષમ બનાવવા પર વિશેષ ધ્યાન આપવામાં આવ્યું હતું. ઓસ્ટિન ઉપરાંત યુએસ ડેલિગેશનમાં ‘ટુ પ્લસ ટુ’ સંવાદમાં વિદેશ મંત્રી એન્ટની બ્લિંકનનો સમાવેશ થાય છે. ભારતીય પક્ષનું નેતૃત્વ વિદેશ મંત્રી એસ જયશંકર અને સિંહે કર્યું હતું.
