વર્ષ 2020ની સરખામણીએ દેશમાં સાયબર ગુનાઓની સંખ્યા 5 ટકા વધીને 2021માં 52,974 થઈ ગઈ છે અને તે સતત વધી રહી છે. એક તરફ દેશ સતત ડિજિટલ ક્ષેત્રે આગળ વધી રહ્યો છે. તેની સામે સાયબર સુરક્ષા જેટલી સઘન હોવી જોઈએ એટલી સઘન થઈ ન હોય છાસવારે લોકોને મુશ્કેલીઓ ઉભી થઇ રહી છે.
સામાન્ય રીતે જે લોકો સાયબર ફ્રોડનો શિકાર બને છે તે સાયબર ક્રાઇમમાં ફરિયાદ તો નોંધાવે છે. પણ તેની ફરિયાદનું પરિણામ મળવાની શક્યતા ખૂબ ઓછી હોય છે. એવું નથી કે તંત્રની કામ કરવાની ઈચ્છા નથી. પણ સાયબર ફ્રોડ જેટલા હાઇટેક થયા છે તેટલું હાઈટેક થવામાં તંત્ર હજુ પાછળ છે.
નવી દિલ્હીમાં દેશની સૌથી મોટી મેડિકલ ઈન્સ્ટિટ્યૂટ ’ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ’ સાઈબર ક્રાઈમનો તાજેતરનો શિકાર બની છે. 23મી નવેમ્બરે તેનું સર્વર હેક થવાને કારણે ત્યાં ડિજિટલ સેવાઓ અટકાવી દેવામાં આવી હતી અને 30મી નવેમ્બર સુધી સતત 8મા દિવસે સ્થગિત કર્યા બાદ 1લી ડિસેમ્બરે પણ તે સંપૂર્ણપણે પુન:સ્થાપિત થઈ શકી નથી.
આ સાયબર હુમલો ચીન અથવા ઉત્તર કોરિયાના હેકર્સ દ્વારા કરવામાં આવ્યો હોવાની આશંકા છે અને હેકર્સે કથિત રીતે 200 કરોડ રૂપિયાની ’ક્રિપ્ટો કરન્સી’ તરીકે માંગણી પણ કરી છે. આ દેશના સૌથી મોટા સાયબર હુમલાઓમાંનો એક હોવાનું કહેવાય છે. તેમાં 4 થી 5 કરોડ દર્દીઓનો ડેટા હતો. જેના કારણે દર્દીઓ, તેમના પરિવારજનો અને વહીવટીતંત્ર માટે ભારે મુશ્કેલી ઉભી થઇ છે અને તમામ કાર્યવાહી કાગળ પર જાતે જ થતી હોવાનું સામે આવ્યું છે. હાલમાં એઇમ્સમાં ઓછામાં ઓછા 5000 કોમ્પ્યુટરનો ઉલ્લેખ છે. સર્વર પુન:સ્થાપિત કરવામાં આવ્યું હોવા છતાં, ઓનલાઈન સેવાઓ 6 ડિસેમ્બરથી તબક્કાવાર રીતે ફરી શરૂ થવાની સંભાવના છે અને તે સંપૂર્ણ રીતે પુન:પ્રાપ્ત થવામાં વધુ સમય લેશે.
આ મામલે એઇમ્સના બે કર્મચારીઓને સસ્પેન્ડ કરવામાં આવ્યા છે. એઇમ્સ મેનેજમેન્ટે ટોચના સરકારી અને ખાનગી આઇટી કંપનીઓ સાથે તેમના કોમ્પ્યુટર અને આઈ.ટી. સાથે સંબંધિત કામની કાળજી લેવા માટે અમે સંપર્કો સ્થાપિત કરવાનું પણ શરૂ કર્યું છે દરમિયાન, એઇમ્સ સર્વર હેક કેસ પછી, 1 ડિસેમ્બરે, અન્ય એક મોટા સાયબર હુમલામાં, જલ શક્તિ મંત્રાલયનું ટ્વિટર હેન્ડલ હેક થયું હોવાનું જાણવા મળ્યું છે, જેને પાછળથી સુધારી દેવામાં આવ્યું હતું. ચોક્કસપણે આ એક ગંભીર સમસ્યા છે જેને ટાળવા માટે નક્કર પગલાં લેવાની જરૂર છે જેથી ભવિષ્યમાં એઇમ્સ અને અન્ય સંસ્થાઓ આ પ્રકારની પરિસ્થિતિનો સામનો ન કરે જેમાં કરોડો લોકોનું જીવન સીધું જોડાયેલું હોય.
